Lukas 12 - BIBLIA - traduson antigu in Krioulo

Avisu kontra finjimentu

¹ I junta un multidon di milyaris di jinti, tok e na masa ŋutru. Jesus kumsa na papia purmeru ku si disipulus, i fala elis: “Bo toma sintidu ku fermentu di fariseus, ku sedu finjimentu.

² I ka ten nada kubridu ku ka na bin diskubridu, nin sukundidu ku ka na bin sibidu,

³ pabia tudu ku bo papia na sukuru i na obidu na lus; kil ku bo fala na sigridu dentru di kasa i na kontadu riba di kasa pa tudu obi.

No ka dibi di medi omi

⁴ “Ña amigus, N na fala bos: Ka bo ten medu di kilis ku ta mata kurpu, dipus e ka pudi fasi mas nada.

⁵ N na mostra bos kin ku bo dibi di medi. Bo medi Deus, kil ku, dipus di mata, i ten puder pa bota na nfernu. Sin, N na fala bos, i el ku bo dibi di medi.

⁶ Nta sinku jamba ka ta bindidu pa bokadiñu di mueda? Ma Deus ka diskisi di nin un delis.

⁷ Te kabelu di bo kabesa, Deus sibi se numeru. Asin ka bo medi, pabia bo mas bali di ki manga di kacu.

Seta o nega Kristu

⁸ “N na fala bos kuma, tudu algin ku konta dianti di jinti kuma el i di mi, tambi ami, Fiju di omi, N ta konta dianti di anjus di Deus kuma el i di mi,

⁹ ma kin ku negan dianti di jinti, i na negadu dianti di anjus di Deus.

¹⁰ “Deus ta purda tudu kil ku fala un palabra kontra Fiju di omi, ma i ka na purda kil ku fala palabra mau kontra Spiritu Santu.

¹¹ “Ora ke leba bos pa kasas di juntamentu, o dianti di ŝefis ku otridadis, ka bo kuda kuma ku bo na bai difindi, o ke ku bo na ruspundi,

¹² pabia Spiritu Santu na nsina bos na ki ora ke ku bo dibi di fala.”

Komparason di riku ku ka ten juisu

¹³ Algin falal na metadi di multidon: “Mestre, fala ña ermon pa i rapati yardansa ku mi.”

¹⁴ Jesus falal: “Omi, kin ku pun pa N sedu juis o rapatidur na bo metadi?”

¹⁵ I fala pobu: “Bo toma sintidu, bo libra di tudu koldadi kubisa, pabia vida di algin i ka sta na manga di kusa ki tene.”

¹⁶ I konta elis un storia, i fala: “Lugar di un omi riku i padi ciu.

¹⁷ I na kuda gora na si kabesa, i punta: ‘Ke ku N na fasi? N ka tene nin un kau pa rukuji ña frutus.’

¹⁸ Dipus i fala: ‘N sibi ke ku N na fasi. N na kebra ña bembas, N ta torna kumpu utrus mas garandi; la ku N na rukuji tudu ña arus ku utru kusas ku N labra.’

¹⁹ N ta fala ña kabesa: ‘Omi, bu tene manga di kusa guardadu pa manga di anu. Diskansa, bu kume, bu bibi, bu divirti.’

²⁰ Ma Deus falal: ‘Tulu, e di noti li bu ten ku ntrega bu vida. Kil ku bu purpara, pa kin ki na sedu?’

²¹ Asin ki ta sedu ku algin ku ta junta rikesa pa si kabesa, ma i ka riku dianti di Deus.”

Fiansa na Deus

²² Dipus i fala si disipulus: “E ku manda N na konta bos: Ka bo fadiga ku kusa di bo vida, pa kil ku bo na kume; nin pa kurpu, ke ku bo na bisti.

²³ Vida i mas bianda; kurpu i mas ropa.

²⁴ Bo jubi pa korvus; e ka ta sumia, e ka ta kebra, e ka tene bemba nin armazen, ma Deus ta sustenta elis; abos, bo bali mas di ki kacus.

²⁵ Kal di bos ku pudi kuda tok i buri un palmu na si altura?

²⁶ Nta si bo ka pudi fasi e kusas pikininu, ke ku manda bo na fadiga pa ki utrus?

²⁷ Bo jubi flor, kuma ki ta kirsi; i ka ta tarbaja nin i ka ta tisi panu. N na konta bos kuma, nin Salomon propi, ku tudu si ronku, i ka bisti suma un delis.

²⁸ Si Deus ta bisti paja asin, ku sta na matu aos, amaña i na botadu na fugu, ku fadi abos, jinti di puku fe.

²⁹ “Asin, ka bo fadiga pa punta-punta ke ku bo na kume, o ke ku bo na bibi,

³⁰ pabia jinti di mundu e ta buska tudu e kusas. Bo Pape sibi kuma bo pirsisa delis.

³¹ Bo buska renu di Deus, bo ta dadu tudu e kusas tambi.

Rikesa na seu

³² “Ña karnelsiñus, ka bo medi, pabia bo Pape misti da bos renu.

³³ Bo bindi kil ku bo tene, bo da pobris. Bo ranja pa bos kartera ku ka ta beju, ku rikesa na seu ku nunka ka ta kaba, nunde ku ladron ka ta ciga, nin bagabaga ka ta kumel,

³⁴ pabia, kau ku bo rikesa sta nel, la tambi ku bo korson ta sta.

Servus ku na bisia

³⁵ “Bo sta purparadu ku sintu maradu, ku lus na kanderu.

³⁶ Bo sedu suma omis ku na pera se patron ora ki na riba di festa di kasamenti, pa ora ki ciga, i bati, logu e pudi yabril porta.

³⁷ Sortiadu ki servus ku, ora ku se patron ciga, i oja elis e na bisia. Na bardadi N na fala bos kuma, i ta mara si sintu, i pui elis sinta na mesa, i ciga, i sirbi elis.

³⁸ Nin ki bin me-noti o na purmeru galu, si i oja ki servus e na bisia, e sortiadu.

³⁹ Bo obi e kusa: si dunu di kasa sibiba ora ku ladron na bin, i ta bisiaba, i ka ta disa pa i rombal kasa.

⁴⁰ Asin bo sta tambi pruntu, pabia Fiju di omi na bin na ora ku bo ka pensa.”

⁴¹ Pedru puntal: “Siñor, bu da e komparason son pa nos o pa tudu jinti?”

⁴² Siñor falal: “Kin ki nkargadu fiel i jiru ku si patron pui riba di si servus pa i da elis se kiñon di kumida na ora?

⁴³ Sortiadu i ki servu ku si patron, ora ki bin, i ojal i na fasi asin.

⁴⁴ Na bardadi N na fala bos, i na nkargal di tudu kusa ki tene.

⁴⁵ Ma si ki servu fala na si kabesa kuma si patron na tarda pa bin, i kumsa na suta servus macu ku femia, i na kume, i na bibi, i na cami,

⁴⁶ patron di ki servu na bin na un dia ki ka na peral, na un ora ki ka sibi, i na kastigal risu, i na juntal ku jinti ku ka sedu krenti.

⁴⁷ “Servu ku sibi vontadi di si patron, ma i ka pruntia, nin i ka fasi suma ku si patron misti, i ta kastigadu ku manga di suti,

⁴⁸ ma kil ku ka sibi, i fasi kusa ku mersi kastigu, i ta dadu puku suti. Kil ku dadu ciu i ta pididu ciu; kil ku ntregadu ciu i na pididu mas ciu.

Jesus tisi divison

⁴⁹ “N bin bota fugu na tera. N misti son pa i sindi ja.

⁵⁰ N ten ku batisadu ku sertu batismu; N sta ku kasabi tok e kusa kontisi, i pasa.

⁵¹ Bo kuda kuma N bin tisi pas na tera? Nau, N bin tisi divison.

⁵² Di gosi pa dianti, i na sta sinku jinti na un kasa; e na dividi tris kontra dus, dus kontra tris.

⁵³ E na sta divididu, pape kontra fiju, fiju kontra pape, mame kontra fiju femia, fiju femia kontra mame, mame kontra minjer di si fiju, minjer di si fiju kontra el.”

Sinal di tempu

⁵⁴ I fala tambi multidon: “Ora ku bo oja nuven na subi di kaida di sol, bo ta fala logu: ‘Cuba na bin.’ I ta bin bin.

⁵⁵ Ora ku bentu na supra di sul, bo ta fala: ‘Kalur na ten.’ I ta ten.

⁵⁶ Finjiduris! Bo sibi rapara sinal di seu ku tera. Kuma ku bo ka sibi gora rapara sinal de tempu?

⁵⁷ “Ke ku manda bo ka pudi rapara ke ki diritu ku bo kabesa propi?

⁵⁸ Ora ku bu na bai na otridadi ku kil ku na keŝa di bo, buska ruma ki asuntu ku el na kamiñu, pa ka i bin lebau pa juis, juis ta ntregau na polisia, polisia ta botau na kalabus.

⁵⁹ N na falau kuma, bu ka ta sai la tementi bu ka kabanta paga tudu.”