Lukas 10 - BIBLIA - traduson antigu in Krioulo

Jesus manda setenta disipulu

¹ Dipus, Siñor kuji mas setenta disipulu, i manda elis dus dus pa e bai dianti pa tudu prasa ku lugaris nunde ki tenba ku bai.

² I fala elis: “Bardadi, kebur i garandi, ma tarbajaduris puku. Bo pidi Siñor, ki Dunu di kebur, pa i manda tarbajaduris pa si kebur.

³ Bo bai; N na manda bos suma fiju di karnel na metadi di lubu.

⁴ Ka bo leba kartera, nin saku, nin sandalia, nin ka bo para pa fala manteña na kamiñu.

⁵ “Na kada kasa ku bo yentra, bo fala purmeru: ‘N dija pas pa e kasa.’

⁶ Si i sta la un algin di pas, bo manteña di pas ta fika riba del, ma si i ka sta, i ta riba pa bos.

⁷ Bo fika na ki mesmu kasa, bo kume, bo bibi kil ke tene, pabia tarbajadur mersi si pagu. Ka bo munda pa kada kasa.

⁸ “Si bo yentra na un prasa ke risibi bos, bo kume kil ke pui bo dianti.

⁹ Bo kura duentis ku sta la, bo fala elis: ‘Renu di Deus ciga pertu di bos.’

¹⁰ Ma si bo yentra na un prasa ku bo ka risibidu, bo ta sai na si ruas, bo fala:

¹¹ ‘Te reia di bo prasa ku pega na no pe, no na konkoñil suma sinal kontra bos, ma bo pudi sibi sertu kuma renu di Deus ciga pertu di bos.’

¹² N na fala bos kuma, Deus na mas ten pena di Sodoma na ki dia di ki di ki prasa.

Prasas di jinti ku ka ripindi

¹³ “Koitadi di bo, Korasin! Koitadi bo, Betsaida! Si milagris ku fasidu na bo metadi fasiduba na prasas di Tiru ku Sidon, se moraduris na ripindiba ja disna, e bisti saku, e sinta na sinsa.

¹⁴ Asin Deus na mas ten pena di Tiru ku Sidon na dia di juisu di ki di bos.

¹⁵ Abo Kafarnaun, bu misti yalsa te na seu? Ma bu na baŝadu te na nfernu.”

¹⁶ Dipus i fala disipulus: “Kin ku sukuta bos, i ami ki sukuta; kin ku nega bos, i ami ki nega. Kin ku negan, i nega kil ku mandan.”

¹⁷ Ki setenta riba ku kontentamentu, e falal: “Siñor, si no fala na bu nomi, te dimonius ta obdisinu!”

¹⁸ Jesus fala elis: “N oja Satanas suma raiu i kai di seu.

¹⁹ Jubi, N da bos puder pa masa kobras ku lakaran, pa vensi tudu forsa di inimigu. Nada ka na fasi bos mal.

²⁰ Kontudu ka bo kontenti manera ku spiritus na obdisi bos, ma bo kontenti suma bo nomis sta skritu na seu.”

Kontentamentu di Jesus

²¹ Na ki ora Spiritu Santu inci Jesus ku alegria. I fala: “Obrigadu, ña Pape, Siñor di seu ku tera, pabia bu sukundi e kusas pa jinti jiru ku ntindidu, bu mostra mininus el. I bardadi, ña Pape, pabia asin ku bu misti fasi.

²² “Ña Pape ntregan tudu kusas. Ningin ka sibi kin ki Fiju si i ka Pape; ningin ka sibi kin ki Pape si i ka Fiju, ku kilis ku Fiju misti mostra elis.”

²³ I rabida pa si disipulus, i fala elis aparti: “Sortiadu i ujus ku na oja kil ku bo oja.

²⁴ N na fala bos kuma, manga di anunsiadur ku rei dija oja kil ku bo na oja, ma e ka ojal; tambi pa obi kil ku bo na obi, ma e ka obil.”

Samaritanu di bon korson

²⁵ I tenba un dutur di lei ku misti spurmenta Jesus. I lanta i puntal: “Mestre, ke ku N dibi di fasi pa N tene vida ku ka ta kaba?”

²⁶ Jesus puntal: “Kuma ki sta skritu na lei? Si bu lei, kuma ku bu ta ntindil?”

²⁷ I ruspundi i falal: “Ama Siñor bu Deus ku tudu bu korson, ku tudu bu alma, ku tudu bu forsa, ku tudu bu ntindimentu. Ama tambi bu kumpañer suma bo propi.”

²⁸ Jesus falal: “Bu ruspundi diritu. Fasi asin, bu ta tene vida.”

²⁹ Ma i mistiba justifika si kabesa, i punta Jesus: “Kin ki ña kumpañer?”

³⁰ Jesus ruspundi i falal: “I tenba un omi ku sai di Jerusalen pa bai Jerikó, i kontra ku ladrons. E pañal, e dispil, e sutal, e bai, e disal kuas mortu.

³¹ Na ki mesmu kamiñu i bin na pasa un saserdoti. I oja ki omi, i pasa di largu.

³² Na mesmu manera tambi un omi di jorson di Levi ciga na ki lugar, i ojal, i pasa di largu.

³³ Ma un omi di Samaria ku na bai bias ciga pertu del, i ojal, i sinti pena del,

³⁴ i bai pa el, i untal azeiti ku biñu na kaus ki molosta, i pul ligadura, i montal riba di si buru, i lebal pa un penson, i toma konta del.

³⁵ Oca ku sol mansi, i tira dus mueda di prata, i da dunu di penson, i falal: ‘Toma konta del. Tudu ku bu gasta mas, ora ku N riba N na pagau el.’

³⁶ Ke ku bu oja? Kal de tris jinti ku sedu kumpañer di ki omi ku kai na mon di ladrons?”

³⁷ I ruspundi: “Kil ku mostral bondadi.” Jesus falal: “Bai, bu fasi suma ku el i fasi.”

Marta ku Maria

³⁸ Jesus ku si disipulus e kontinua se kamiñu. I yentra na un tabanka; un minjer ku comadu Marta risibil na si kasa.

³⁹ I teneba un irma ku comadu Maria, ku bin sinta na pe di Jesus pa obi si palabra.

⁴⁰ Marta staba tarpajadu ku manga di tarbaju. I bai pa Jesus, i falal: “Siñor, bu ka oja kuma ña irma disan ami son ku tarbaju? Falal pa i bin judan.”

⁴¹ Jesus ruspundi i falal: “Marta, Marta, bu sta fadigadu, tarpajadu ku manga di kusa,

⁴² ma i un kusa son ki pirsis. Maria kuji kil ki mas minjor; i ka na tiradu el.”