Lukas 1 - BIBLIA - traduson antigu in Krioulo

Kumsada

¹ Siñor Teófilu, manga di jinti buska manera di skirbi storia di ke ku kontisi na no metadi.

² E skirbi ke ku utrus kontanu ku matiba disna di kumsada, ku sedu ja pursoris de palabra.

³ Asin, Siñor, manera ku N punta tok N paña pe di tudu e kontisimentus disna di kumsada, N oja kuma N dibi di skirbiu pa N kontau na ordi,

⁴ pa bu pudi paña pe diritu di kusas ku bu kontadu ja.

Anju konta kuma Jon na padidu

⁵ Oca Erodis seduba rei di Judeia, i tenba un saserdoti ku comadu Zakarias ku pertensiba grupu di saserdotis di Abias. Si minjer i di jorson di saserdoti Aron. Si nomi i Isabel.

⁶ Elis tudu dus e ta yandaba diritu dianti di Deus; e ta guardaba mandamentu ku lei di Siñor; ningin ka pudi culi elis dedu.

⁷ E ka teneba fiju, pabia Isabel i sebadu. Elis tudu dus e teneba idadi avansadu.

⁸ Un dia Zakarias tenba sirvis; i na fasi si tarbaju di saserdoti dianti di Deus.

⁹ Konformi kustumu di saserdotis i kujidu pa sorti pa i yentra na lugar sagradu di Siñor pa kema nsensu.

¹⁰ Tudu multidon di jinti staba fora; e na ora na ora di nsensu.

¹¹ Zakarias oja un anju di Siñor sikidu na ladu direita di altar di nsensu.

¹² Oca ki ojal, i panta, i fika ku medu.

¹³ Anju falal: “Ka bu medi, Zakarias, pabia bu orason obidu. Isabel bu minjer i na padi un fiju macu; bu na pul nomi di Jon.

¹⁴ Bu na sinti kontentamentu ku alegria. Manga di jinti na kontenti ora ki padidu,

¹⁵ pabia i na sedu algin garandi dianti di Siñor. I ka na bibi biñu nin bibida forti. Spiritu Santu na sta nel desdi bariga di si mame.

¹⁶ I na pui manga di fiju di Israel riba pa Siñor se Deus.

¹⁷ I na bai dianti di Siñor na spiritu ku puder di Elias, pa torna korson di papes pa fijus, pa pui brabus pa e pensa suma bon jinti, pa i pudi purpara pobu di Siñor pa e sta pruntu pa el.”

¹⁸ Zakarias punta anju: “Kuma ku N pudi ten sertesa des? Ami N beju; ña minjer tambi i tene idadi avansadu.”

¹⁹ Anju ruspundi i falal: “Ami i Gabriel ku ta sta dianti di Deus pa sirbil. I mandan pa N papia ku bo, pa dau e bon noba,

²⁰ ma suma ku bu ka fia na ña palabra, bu na fika mudu; bu ka na pudi papia te tempu ku e kusa kontisi, pabia i ten ku sedu na tempu markadu.”

²¹ Pobu na peraba Zakarias, e dimira suma ki tarda na lugar sagradu.

²² Oca ki sai, i ka pudiba papia. E ntindi janan kuma i oja vison na lugar sagradu. I na papia ku elis ku sinal, ma i fika mudu.

²³ Oca si dias di tarbaju na kasa di Deus kaba, Zakarias riba pa kasa.

²⁴ I pasa un tempu, Isabel si minjer paña bariga. I fika son dentru sinku mis, i fala:

²⁵ “Siñor fasin garandi kusa; i jubi pa mi, i tiran ña borgoña dianti di jinti.”

Anju konta kuma Jesus na padidu

²⁶ Oca ku bariga di Isabel na bai ja pa seis mis, Deus manda anju Gabriel pa prasa di Galileia ku comadu Nazaré,

²⁷ pa un bajuda ku tene nomi di Maria, ku staba pa kasa ku un omi ku comadu José, di jorson di Davi.

²⁸ Anju yentra nunde ki staba, i falal: “Minjer sortiadu, N dijau pas. Siñor sta ku bo, i mostra garandi fabur pa bo.”

²⁹ Oca ku Maria obi ki palabra, i panta dimas; i na kuda nos kila i kal koldadi manteña.

³⁰ Anju falal: “Maria, ka bu medi, pabia bu oja fabur dianti di Deus.

³¹ Jubi, bu na paña bariga, bu na padi un fiju, bu na pul nomi di Jesus.

³² I na sedu algin garandi, i na comadu Fiju di ki Deus ku sta riba di tudu. Siñor Deus na dal renu di Davi, si pape di antigu.

³³ I na rena pa sempri riba di jorson di Jakó. Si renu ka na kaba.”

³⁴ Maria punta anju: “Kuma ku es pudi sedu suma ku N ka kunsi omi inda?”

³⁵ Anju ruspundi i falal: “Spiritu Santu na ria riba di bo; puder di ki Deus ku sta riba di tudu i na kubriu ku si sombra. E ku manda ki mininu santu ku bu na padi i na comadu Fiju di Deus.

³⁶ Jubi, Isabel tambi, bu parenti, i paña bariga na si bejisa. Jinti fala kuma i ka ta padi, ma i sta ja na mis di seis.

³⁷ I ka ten nada ku Deus ka pudi fasi.”

³⁸ Maria fala: “Alin li, ami i servu di Siñor. Pa i kontisi na mi suma ku bu fala.” Anju bai, i disal.

Maria bai visita Isabel

³⁹ Na ki dias Maria lanta, i bai dipresa pa ladu di montaña, pa un prasa di Judá,

⁴⁰ i yentra na kasa di Zakarias, i fala Isabel manteña.

⁴¹ Oca ku Isabel obi manteña di Maria, mininu salta dentru di si bariga. Spiritu Santu inci Isabel na ki ora;

⁴² i grita ku vos altu, i fala: “Abo i sortiadu mas di ki tudu minjeris. Fiju ku bu na padi i sortiadu.

⁴³ Ami i kin, pa mame di ña Siñor bin visitan?

⁴⁴ Oca ku N obi bu manteña, mininu salta di alegria dentru di mi.

⁴⁵ Sortiadu i kil ku fia, pabia kusas ku Siñor kontal ten ku sedu.”

Kantiga di Maria

⁴⁶ Maria fala: “Ña korson na mostra garandesa di Siñor;

⁴⁷ ña spiritu i kontenti ku Deus ña Salbadur,

⁴⁸ pabia i lembra di mi, si servu umildi. Disna di gosi tudu jinti na ba ta coman ‘Sortiadu’,

⁴⁹ pabia Deus di puder fasin garandi kusas; si nomi i santu.

⁵⁰ I na ten pena di kilis ku rispital, ku se fijus pa dianti.

⁵¹ Ku si mon i fasi kusas garandi ku mostra si puder. I pajiga kilis ki garandiosu, ku planus di se korson.

⁵² I tira reis di se tronus; i yalsa mansus.

⁵³ I inci fomentis di bon kusas; i serka rikus ku mon limpu.

⁵⁴ I bin juda Israel si servu, suma ki falaba no papes antigu.

⁵⁵ I lembra di mostra si pena pa Abraon, ku fijus di si fijus pa sempri.”

⁵⁶ Maria fika ku Isabel kuas tris mis; dipus i riba pa si kasa.

Jon Batista padidu

⁵⁷ Oca ku tempu ciga, Isabel padi un fiju macu.

⁵⁸ Oca ku si visiñus ku si parentis obi di garandi bondadi ku Deus fasi pa el, elis tudu ku Isabel e fika kontenti.

⁵⁹ Oca ku mininu ten oitu dia ki padidu, e bin pa sirkunsidal. E mistiba pul nomi di si pape Zakarias,

⁶⁰ ma si mame ruspundi i fala elis: “Nau, i na comadu Jon.”

⁶¹ E falal: “Bu ka tene ningin na bu familia ku tene ki nomi.”

⁶² E punta si pape ku sinal kuma ki misti pa mininu comadu.

⁶³ I pidi un taguasiñu, i skirbi: “Si nomi i Jon.” Tudu jinti fika dimiradu.

⁶⁴ Ki ora si boka yabri, si lingua yalsa; i kumsa na papia, i na ngaba Deus.

⁶⁵ Tudu si visiñus fika ku medu. Noba de kusas spaja pa tudu reẑion di montaña di Judeia.

⁶⁶ Kilis ku obil e ta fika e na kuda, e ta punta: “Ke ku e mininu na bin sedu?” Mon di Siñor staba riba del.

Kantiga di Zakarias

⁶⁷ Spiritu Santu yentra na Zakarias, pape di mininu, i pui palabra na si boka. Zakarias fala:

⁶⁸ “No ngaba Siñor Deus di Israel, pabia i bin visita si pobu, i liberta elis.

⁶⁹ I lantanda pa nos un Salbadur ku ten garandi puder di jorson di si servu Davi.

⁷⁰ Disna di tempu antigu i konta na boka di si santu anunsiaduris

⁷¹ kuma, i ta libranu di no inimigus, ku mon di kilis ku odianu;

⁷² kuma, i ta mostra pena pa no papes; i ta lembra di si santu kontratu,

⁷³ ku juramentu ki fasi pa Abraon, no pape antigu.

⁷⁴ I jurmenta kuma i ta libertanu di mon di no inimigus, pa no pudi sirbil sin medu,

⁷⁵ pa no sedu puru i justu si dianti tudu dias di no vida.

⁷⁶ Abo, ña fiju, bu na comadu anunsiadur di Deus ku sta riba di tudu, pabia bu na bai dianti di Siñor pa purpara si kamiñu,

⁷⁷ pa da si pobu kuñisimentu di salbason ku purdon di se pekadu.

⁷⁸ Suma no Deus ten garandi pena ku amor, e ku manda sol di mandrugada di seu na lanta riba di nos,

⁷⁹ pa numia kilis ku sinta na sukuru, na sombra di mortu, pa gia no pe na kamiñu di pas.”

⁸⁰ Mininu kirsi, i fika kada bias mas forti na spiritu. I ta moraba na lala, te dia ki parsi dianti di pobu di Israel.