Kumsada 9 - BIBLIA - traduson antigu in Krioulo

Kontratu ku Deus fasi ku Noe

¹ Deus bensua Noe ku si fijus, i fala elis: “Bo padi ciu, tok bo inci mundu.

² Tudu limarias di tera ku tudu kacus di seu, ku tudu limarias ku ta rasta na con, ku tudu pis na mar, e na fika ku garandi medu di bos. E ntregadu na bo mon.

³ Tudu limaria bibu ku ta bulbuli i na sedu pa bo kumida. Suma ku N da bos planta verdi, gosi ja N na da bos tudu kusa.

⁴ “Ma ka bo kume karni ku tene inda si vida dentru, ku sedu si sangi.

⁵ Tambi, sangi di vida di bos omis, si algin darmal, N na fasil justisa. N na fasi justisa ku tudu limaria ku tira vida di omi. Tambi N na fasi justisa ku tudu omi ku tira vida di si kumpañer omi.

⁶ Kil ku darma sangi di algin, utru algin ten ku darma si sangi, pabia Deus kumpu jinti, i parsinti elis ku el Deus.

⁷ Ma abos, bo padi manga di fiju, pa bo pudi ciu, bo inci mundu.”

⁸ Deus fala Noe ku si fijus:

⁹ “N na fasi ña kontratu ku bos, ku bo jorson dipus di bos,

¹⁰ ku tudu limarias bibu ku sta ku bos — kacus, limarias di kasa ku di matu, tudu kilis ku sai na barku ku bos.

¹¹ N na fasi ña kontratu ku bos kuma, N ka na torna kaba ku tudu kriatura bibu ku yagu di diluviu. I ka na torna ten diluviu pa kaba ku mundu.”

¹² Deus fala mas: “Es i sinal di kontratu ku N pui na metadi di mi ku bos, ku tudu kriatura bibu ku sta ku bos, ku tudu jorsons ku na bin dipus di bos.

¹³ N pui ña arku-iris na nuven suma sinal di kontratu na metadi di mi ku tera.

¹⁴ Ora ku N tisi nuvens riba di tera, arku-iris ojadu na ki nuvens,

¹⁵ N ta lembra di ña kontratu ku bos, ku tudu limarias bibu di tudu koldadi. Yagu ka na torna mas na diluviu pa kaba ku tudu kriatura bibu.

¹⁶ Ora ku arku-iris parsi na nuven, N na ojal, N na lembra di kontratu ku ka na kaba na metadi di Deus ku tudu kriatura bibu di tudu koldadi ku sta na mundu.”

¹⁷ Deus fala Noe: “Es i sinal di kontratu ku N fasi entri mi ku tudu ku tene vida na mundu.”

Noe ku si fijus

¹⁸ Fijus di Noe ku sai na barku e seduba Sen, Kan ku Jafé. (Kan i seduba pape di Kanaan.)

¹⁹ Ki tris fiju di Noe, se jorsons bin inci tera.

²⁰ Noe, ku seduba labradur di con, i paranta orta di pe di uva,

²¹ i bibi biñu di ki uva tok i cami, i dita nun na si tenda.

²² Kan, ku sedu pape di Kanaan, oja manera ku si pape staba nun; i bai konta si dus ermon la fora.

²³ Asin Sen ku Jafé e toma panu, e pul na se ombra, e yanda ku tras, e kubri kurpu di se pape. Se rostu staba viradu na manera ke ka oja kurpu nun di se pape.

²⁴ Noe disperta di si biñu, i sibi ke ku si fiju pikininu fasil,

²⁵ i fala: “Kanaan na maldisuadu! I na sedu servu mas bas pa si ermons.”

²⁶ I fala tambi: “SIÑOR Deus di Sen, pa i ngabadu! Pa Kanaan sedu servu di Sen.

²⁷ Pa Deus buri terenu di Jafé; pa si jorson mora na tendas di Sen; pa Kanaan sedu si servu.”

²⁸ Dipus di diluviu, Noe vivi trizentus i sinkuenta anu.

²⁹ Tudu vida di Noe i novsentus i sinkuenta anu. Dipus, i muri.