Kumsada 7 - BIBLIA - traduson antigu in Krioulo

Diluviu

¹ Dipus SIÑOR fala Noe: “Yentra na barku, abo ku tudu bu familia, pabia N ojau justu na metadi di jinti de tempu.

² Leba ku bo seti macu ku seti femia di kada koldadi limaria ku ta roniadu ku el, o ku ta kumedu, bu leba dus (macu ku femia) di kada koldadi limaria ku ka ta roniadu ku el, nin i ka ta kumedu.

³ Bu toma tambi seti macu ku seti femia di kada koldadi kacu, pa bu guarda elis bibu pa e pudi kontinua padi na tera.

⁴ Si seti dia pasa, N na manda cuba na tera korenta dia ku korenta noti. N na kaba ku tudu kriatura bibu ku N kumpu na tera.”

⁵ Noe fasi tudu kil ku SIÑOR mandal.

⁶ Noe teneba idadi di seizentus anu oca ku diluviu di yagu bin na tera.

⁷ Noe yentra na barku, el ku si fijus, si minjer, ku minjeris di si fijus, pa pudi kapli di yagu di diluviu.

^8-9 E yentra tambi na barku ku Noe, dus dus, macu ku femia, di limarias, kilis ku ta fasidu ronia ku kilis ku ka ta fasidu ronia, ku kacus, ku limarias ku ta rasta, suma ku Deus manda Noe.

¹⁰ I pasa seti dia; yagu di diluviu kai riba di tera.

¹¹ Na anu 600 di vida di Noe, na dia 17 di sugundu mis, na ki mesmu dia, i rebenta tudu fontis di koba fundu, i yabri janelas di seu.

¹² Cuba cubi na tera korenta dia ku korenta noti.

¹³ Na ki mesmu dia, Noe yentra na barku, ku si fijus Sen, Kan ku Jafé, ku si minjer, ku minjeris di si tris fiju.

¹⁴ Tudu limarias di matu suma se koldadi, ku tudu koldadi limaria di kasa, ku tudu koldadi limaria ku ta rasta na con, ku tudu koldadi kacu, ku tudu bicu ku tene asa —

¹⁵ tudu limarias ku tene folgu di vida, e yentra dus dus pa Noe na barku.

¹⁶ E yentra macu ku femia di tudu limarias ku tene vida, suma ku Deus manda Noe. SIÑOR fica porta pa fora.

¹⁷ Diluviu kontinua korenta dia; yagu inci, i boianta barku riba.

¹⁸ Yagu kontinua na inci riba di tera. Barku na boiaba riba di yagu.

¹⁹ Yagu kontinua na inci tok i kubri tudu monti altu ku sta bas di seu.

²⁰ I inci tok i paña seti metru riba di montis.

²¹ Tudu limarias bibu ku staba na tera muri, suma kacus ku limarias di kasa, ku di matu, ku tudu kilis ku ta rasta na con, ku tudu jinti.

²² Tudu kusas ku staba na kau seku ku teneba folgu di vida na se naris, e muri.

²³ Tudu kriatura bibu ku staba na tera i kabadu ku el; jinti, ku limarias, ku kilis ku ta rasta, ku kacus di seu, e kabadu ku el. Noe fika el son, ku kilis ku staba ku el na barku.

²⁴ Yagu inciba na tera sentu i sinkuenta dia.