Kumsada 6 - BIBLIA - traduson antigu in Krioulo

Maldadi di omi

¹ Oca ku omis kumsa na ciu na tera, e padi fijus femia.

² Fijus di Deus oja kuma fijus femia di omis e bonitu. E kasa ku kilis ke mistiba.

³ SIÑOR fala: “Ña spiritu ka na fika na omi pa sempri, pabia si kurpu ten ku muri. Pabia des, i na vivi son 120 anu.”

⁴ Na ki tempu, ku mas tardi tambi, i tenba jigantis na tera. Oca ku fijus di Deus junta ku fijus femia di omis, e padi fijus. Esis e seduba balentis ki tenba na ki tempu antigu, omis di fama.

⁵ SIÑOR oja maldadi di omis na buriba na tera. Tudu se manera di pensa na se korson i seduba son mau.

⁶ SIÑOR fika ripindidu manera ki kumpu omi na tera; si korson staba tristi.

⁷ Asin SIÑOR fala: “N na kaba ku tudu jinti ku N kumpu, N na tira elis na tera, desdi omi, tudu ku limarias, ku kilis ku ta rasta, ku kacus ku ta bua na seu, pabia N ripindi manera ku N kumpu elis.”

⁸ Ma SIÑOR kontenti ku Noe.

Noe

⁹ Es i storia di Noe. Noe seduba un omi justu, ku staba sin kulpa na metadi di jinti di si tempu. I ta yandaba ku Deus.

¹⁰ Noe padi tris fiju macu ku sedu Sen, Kan ku Jafé.

¹¹ Tera staba mal na uju di Deus; jinti na abusaba na se kumpañer.

¹² Deus oja kuma ku tera staba mal, pabia tudu jinti na tera na yandaba na mau kamiñu.

¹³ Deus fala Noe: “Ami N na kaba ku tudu jinti, pabia tera inci abusu ku maldadi. N na kaba ku elis tudu ku tera.

¹⁴ Kumpu pa bo un barku di bon madera, bu pui kuartus nel. Dentru ku fora bu ta foral ku alkatron.

¹⁵ Bu na kumpul de manera: 133 metru di kumprimentu, 22 metru di largura, ku 13 metru di altura.

¹⁶ Bu na pui kubertura na barku, bu disa spasu di 44 sentimetru entri kubertura ku ladu di barku. Bu ta pui porta na ladu; bu ta fasi un sobradi pa bas, sugundu ku terseru.

¹⁷ N na manda diluviu di yagu riba di tera, pa kaba ku tudu kriaturas bas di seu ku tene folgu di vida. Tudu ku sta na tera na muri,

¹⁸ ma N na fasi un kontratu ku bo. Bu na yentra na barku, abo ku bu fijus, ku bu minjer, ku minjeris di bu fijus.

¹⁹ Bu ten ku yentranda dus di kada koldadi limaria bibu, macu ku femia, pa guarda elis bibu ku bo.

²⁰ Dus di kada koldadi kacu, ku kada koldadi limaria, ku tudu koldadi kilis ku ta rasta, e na bin pa bo, pa bu pudi guarda elis bibu.

²¹ Bu na toma tudu koldadi kumida ku ta kumedu, bu guardal, pa i sedu kumida pa bo, suma pa elis tambi.”

²² Noe fasi tudu suma ku Deus mandal.