Kumsada 50 - BIBLIA - traduson antigu in Krioulo

Nteru di Jakó

¹ José kai riba di si pape, i cora, i beẑal.

² Dipus i da ordi pa medikus na si sirvis pa e mbalsama si pape; asin medikus mbalsama Israel.

³ E leba korenta dia, pabia es i seduba tempu ki pirsis pa e mbalsama. Ejipsius cora Jakó setenta dia.

⁴ Oca dias di cur pasa, José bai pa ŝefis di kasa di Faraó, i fala elis: “Si N oja fabur na bo ujus, N pidi bos pa bo papia ku Faraó, bo falal kuma

⁵ ña pape pun pa N jurmenta, i falan: ‘Ami N na muri. Nteran na koba ku N purpara pa mi na tera di Kanaan.’ Gosi N na pidiu lisensa pa N bai ntera ña pape. Dipus N na riba.”

⁶ Faraó falal: “Bai bu ntera bu pape, suma el i fasiu pa bu jurmenta.”

⁷ Asin José bai ntera si pape. Tudu ŝefis di Faraó, jinti garandi di si kasa, ku tudu garandis di tera di Ejitu, bai ku el,

⁸ suma tambi tudu jinti di kasa di José, si ermons, ku jinti di kasa di si pape; son se mininus, ku se karnelis ku bakas, ke disa na tera di Gosen.

⁹ Karus ku jinti di kabalu bai ku el tambi. Jinti ciu ba dimas.

¹⁰ Oca ke ciga na kau di masa trigu di Atad, ku sta lungu di riu Jordon, e cora risu, di kumpridu. José fasi si pape un cur pa seti dia.

¹¹ Oca jinti ku mora na ki tera, kananeus, oja cur na kau di masa trigu di Atad, e fala: “Jubi kuma ku ejipsius na cora risu!” Pabia di kila, e coma nomi di ki kau lungu di Jordon Abel-Mizrain, ku signifika cur di ejipsius.

¹² Asin fijus di Jakó fasi suma ki manda elis.

¹³ E lebal pa tera di Kanaan, e nteral na koba na terenu di Makpela, lungu di Manre, ku Abraon kumpra, tudu ku ki terenu. na mon di Efron, eteu, pa i sedu kau di nteru.

¹⁴ Dipus di ntera si pape, José riba pa Ejitu, el ku si ermons, ku tudu kilis ku baiba ku el pa mati nteru.

José da si ermons animu

¹⁵ Dipus di mortu di se pape, ermons di José fala: “Talves José rakada un kusa kontra nos; sertamenti i na bin vinganu tudu mal ku no fasil.”

¹⁶ Asin, e manda algin pa i bai fala José: “Antis di bu pape muri, i disa ordi

¹⁷ pa no falau kuma, el i na rogau pa bu purda kusas mau ku bu ermons fasi, ku se pekadu, pabia e fasi mal. Gosi no na rogau pa bu purda no pekadu, anos ku sedu servus di Deus di bu pape.” José cora oca ki kontadu ki rekadu.

¹⁸ Dipus, si ermons propi e bin, e mborka na con si dianti, e falal: “Ali no sta suma bu servus.”

¹⁹ José fala elis: “Ka bo medi. Nta ami N sta na lugar di Deus?

²⁰ Bo mistiba fasin mal, ma Deus bidanta ki mal pa ben, pa salba vida di manga di jinti, suma ku bu na oja ne dias.

²¹ Ka bo medi; ami N na sustenta bos ku bo mininus.” Asin i konsola elis, i papia bon palabra ku kalma se korson.

Mortu di José

²² José fika na Ejitu, el ku tudu familia di si pape. I vivi sentu i des anu,

²³ i oja fijus ku netus di Efrain. Tambi fijus di Makir, fiju di Manasés, pudu na ragas di José dipus de padidu.

²⁴ Dipus, José fala si ermons: “Ami N na muri, ma di sertesa Deus na bin juda bos, i na fasi pa bo sai ne tera pa tera ki jurmenta pa da Abraon, Isak ku Jakó.”

²⁵ José pui fijus di Israel pa e jurmenta, i fala elis: “N sibi sertu kuma Deus na bin juda bos. Na ki tempu bo na tira ña os li, bo lebal.”

²⁶ Asin José muri na idadi di sentu i des anu. E mbalsamal, e pui na un kaŝon na Ejitu.