Kumsada 45 - BIBLIA - traduson antigu in Krioulo

José konta si ermons el i kin

¹ José ka pudiba nguenta dianti di jinti ku staba ku el; i papia risu, i fala: “Abos, bo sai li.” Asin ningin ka fika ku José kontra i mostra si ermons el i kin.

² I cora risu, tok ejipsius obil. Jinti di kasa di Faraó obil.

³ José fala si ermons: “Ami i José. Ña pape bibu inda?” Si ermons ka pudi ruspundil, pabia e panta si dianti.

⁴ José fala si ermons: “Bo ciga pertu di mi.” E ciga. I fala elis: “Ami i José, bo ermon ku bo bindi pa Ejitu.

⁵ Ka bo fika ŝatiadu, nin ka bo korson fika pisadu manera ku bo bindin pa li, pabia Deus mandan dianti di bos pa salba vida di jinti.

⁶ I ten ja dus anu di fomi na tera. I na sobra inda sinku anu ki ka na ten nin labra nin kebra.

⁷ Deus mandan dianti di bos pa bo jorson ka pirdi na tera, pa guarda bos ku vida ku garandi libramentu.

⁸ Asin i ka abos ku mandan li, ma i Deus, ku fasin pa N sedu pape di Faraó, ŝef di tudu si kasa, gubernadur di tudu tera di Ejitu.

⁹ Bo janti; bo bai pa ña pape, bo falal kuma si fiju José fala: ‘Deus i pun pa N sedu gubernadur di tudu tera di Ejitu; bin pa mi; ka bu tarda.

¹⁰ Bu na mora na tera di Gosen, bu na sta pertu di mi, abo ku bu fijus ku bu netus, ku bu karnelis ku bakas, ku tudu ku bu tene.

¹¹ N na sustentau la, pabia i na ten sinku anu di fomi ku falta inda. Bin pa bu ka muri ku fomi, abo ku bu familia ku tudu ku bu tene.’

¹² “Bo pudi oja ku bo uju propi, ku ña ermon Benjamin tambi, kuma i sedu ami propi ku na papia ku bos.

¹³ Bo konta ña pape di tudu ña fama li na Ejitu, ku tudu ke ku bo oja; bo janti pa tisi ña pape li.”

¹⁴ I barsa si ermon Benjamin, i cora. Benjamin barsal, i cora tambi.

¹⁵ I beẑa tudu si ermons, i cora riba delis. Dipus, si ermons papia ku el.

Faraó obi aserka di ermons di José

¹⁶ Oca noba obidu na palasiu kuma ermons di José bin, Faraó ku tudu si ŝefis e fika kontenti.

¹⁷ Faraó fala José: “Fala bu ermons: ‘Bo fasi asin: Bo karganta bo limarias, bo riba pa tera di Kanaan,

¹⁸ bo tisi bo pape ku bo familias pa mi. N na da bos minjor parti di tera di Ejitu; bo na kume fartura di tera.’

¹⁹ Tambi bu ta konta elis: ‘Bo toma karus na tera di Ejitu pa bo mininus, bo minjeris, ku bo pape; bo bin.

²⁰ Ka bo kuda na kusas ku bo na fika, pabia minjor di tudu tera di Ejitu i na sedu di bos.’ ”

²¹ Asin ku fijus di Israel fasi. José da elis karus konformi ordi di Faraó. Tambi i da elis kumida pa kamiñu.

²² I da kada kin un komple, ma i da Benjamin 3,5 kilu di prata ku sinku komple.

²³ I manda si pape des buru kargantadu ku minjor kusas di Ejitu, ku des buru kargantadu ku miju ku pon, ku kumida pa si pape na kamiñu.

²⁴ I dispidi si ermons. Oca ke na bai i fala elis: “Ka bo bai jusia na kamiñu.”

²⁵ E sai na Ejitu, e bai pa tera di Kanaan, pa Jakó se pape,

²⁶ e falal: “José sta di vida, i sedu gubernadur na tudu Ejitu.” Jakó dismaja na si korson, pabia i ka fia na se palabra.

²⁷ Oca ke konta se pape Jakó tudu ki palabras ku José fala elis, el propi i oja karus ku José manda pa lebal, si spiritu riba nel.

²⁸ Israel fala: “I justa ja! Ña fiju José sta bibu inda. N na bai ojal antis di N muri.”