Kumsada 41 - BIBLIA - traduson antigu in Krioulo

José splika suñus di Faraó

¹ Dus anu pasa. Faraó suña kuma i firmaba lungu di riu Nilu.

² Seti baka bonitu, gurdu, e bin sai na riu, e kumsa na kume paja.

³ Dipus di ki purmerus, utru seti baka, fiu, magru, sai na riu, e bai para lungu di ki utrus na praia.

⁴ Ki bakas fiu, magru, e bin kume ki seti baka bonitu, gurdu. Dipus Faraó korda.

⁵ I torna durmi, i suña utru bias, kuma i na rebenta na mesmu pe seti fiju di miju, garandi, bonitu.

⁶ Dipus, utru seti fiju bin rebenta, pikininu, kemadu ku bentu ku bin di saida di sol.

⁷ Ki fijus pikininu e nguli ki fijus garandi, bonitu. Faraó korda, i nota kuma i suña nan.

⁸ Oca sol mansi, Faraó fika tarpajadu na si sintidu. I manda coma tudu jambakus ku tudu omis jiru na Ejitu. I konta elis si suñus, ma ningin ka pudi splikal el.

⁹ Dipus, ŝef di koperus fala Faraó: “Aos N lembra di ña pekadu.

¹⁰ Oca ku Faraó paña raiba di si servus, i pun na kalabus, tudu ku ŝef di paderus, na kau di kapiton di guarda.

¹¹ Anos dus no suña na mesmu noti; kada suñu teneba si propi signifikadu.

¹² I tenba un joven ebreu ku staba ku nos, katibu di kapiton di guarda. No kontal no suñus; i splikanu elis konformi suñu di kada kin.

¹³ Suma ki splikanu, asin propi ki bin sedu. Ami N ribantadu pa ña lugar; paderu nforkadu.”

¹⁴ Faraó manda coma José. E tiral logu di ki koba. I rapa barba, i torkia si ropa, i bai pa Faraó.

¹⁵ Faraó fala José: “Ami N suña un suñu. Ningin ka pudi splikan el, ma N obi ja faladu di bo kuma, ora ku bu obi suñu, bu ta splikal.”

¹⁶ José ruspundi Faraó: “Es i ka sta na mi, ma Deus na da Faraó un rasposta di pas.”

¹⁷ Faraó fala José: “Na ña suñu N staba di pe na praia di riu.

¹⁸ I sai na riu seti baka gurdu, bonitu; e kumsa na kume paja la.

¹⁹ Utru seti baka magru, fiu, e bin sai se tras. Nunka N ka ciga di oja baka fiu suma kila na tudu tera di Ejitu.

²⁰ Ki bakas magru, fiu, e kume ki purmeru seti baka gurdu,

²¹ ma, mesmu dipus de kume elis, ningin ka pudiba rapara nada, pabia e parsiba fiu suma na kumsada. Na ki ora N korda.

²² “Dipus, na utru suñu, N oja na mesmu pe di miju i sai seti fiju garandi, bonitu.

²³ I rebenta se tras utru seti fiju seku, magru, kemadu ku bentu ku bin di saida di sol.

²⁴ Ki fijus magru e bin nguli ki seti fiju bon. N konta e kusas tudu pa jambakusis, ma ningin ka sibi splikan el.”

²⁵ José fala Faraó: “Suñus di Faraó e sedu un kusa son. Deus mostra Faraó kusa ki na bin fasi.

²⁶ Ki seti baka bonitu e sedu seti anu; ki seti fiju di miju bonitu e sedu tambi seti anu. Suñu sedu un kusa son.

²⁷ Ki seti baka magru, fiu, ku sai dipus delis e sedu seti anu, suma ki seti fiju di miju pikininu ku kemadu pa bentu ku bin di ladu di saida di sol; e na sedu seti anu di fomi.

²⁸ “I suma palabra ku N fala ja ku Faraó. Deus mostra Faraó ke ki na bin fasi.

²⁹ Seti anu di garandi fartura na bin na tudu tera di Ejitu,

³⁰ ma seti anu di fomi na bin dipus del. Tudu ki fartura na tera di Ejitu na diskisidu; fomi na dana tera.

³¹ Ki fartura na tera i ka na lembradu pabia di ki fomi ku na bin ten dipus, pabia i na sedu un kusa duru.

³² Ke ku manda suñu bin pa Faraó na dus forma i pabia i un kusa ku Deus rezolvi ja fasi; dipus i ten dipresa pa fasil.

³³ “E ku manda Faraó ten ku ranja un omi ntindidu, ku ten jiresa, pa pul riba di tera di Ejitu.

³⁴ Tambi Faraó dibi di pui ŝefis riba di tera, pa toma kintu parti di kebur di Ejitu na ki seti anu di fartura.

³⁵ E dibi di junta kumida ne bon anus ku na bin, pa rakada miju bas di ordi di Faraó, pa guardal diritu na prasas.

³⁶ Ki kumida na sedu reserva pa tera na ki seti anu di fomi ku na bin riba di Ejitu, pa jinti ka muri di fomi.”

Faraó pui José pa i sedu gubernadur di Ejitu

³⁷ E planu parsi bon pa Faraó ku tudu si ŝefis.

³⁸ Faraó punta elis: “Nta no na oja un omi suma es ku tene spiritu di Deus?”

³⁹ I rabida i fala José: “Suma Deus fasiu sibi es tudu, i ka ten algin ntindidu o jiru suma bo.

⁴⁰ N na pou riba di ña kasa; tudu ña pobu na sta bas di bu ordi. Son ami ku na sta riba di bo, suma N sta na tronu.”

⁴¹ Asin Faraó fala José: “Ali N pou riba di tudu tera di Ejitu.”

⁴² Faraó tira anel di si mon, i pul na mon di José. I bistil ropa di liñu finu, i pul un fiu di uru na si garganti.

⁴³ José sai na sugundu karu ku Faraó teneba; omis na gritaba si dianti: “Bo finka juju!” Asin Faraó pul riba di tudu tera di Ejitu.

⁴⁴ Faraó fala José: “Ami i Faraó, ma sin bu palabra ningin ka na lantanda si mon o si pe na tudu Ejitu.”

⁴⁵ Faraó coma nomi di José Zafenat-Paneia; i dal Asenat, fiju di Potífera, saserdoti di On, pa i sedu si minjer. José ta yandaba na tudu tera di Ejitu.

⁴⁶ I teneba idadi di trinta anu kontra i yentra na sirvis di Faraó, rei di Ejitu. José sai na pursensa di Faraó, i yanda na tudu tera di Ejitu.

⁴⁷ Na ki seti anu di fartura, con pruduzi ciu.

⁴⁸ José junta tudu kumida di ki seti anu di fartura na Ejitu; i rakada ki kumida na prasas. Na kada prasa i guarda kumida ku rukujidu na ki area.

⁴⁹ Asin José junta manga di miju, tok i ciu suma reia di mar. I ciu dimas tok i bin para kontal, pabia i ka pudiba ja mas midil.

⁵⁰ Antis di ki anus di fomi ciga, José padi dus fiju ku Asenat, fiju di Potífera, saserdoti di On.

⁵¹ José coma nomi di ki purmeru fiju Manasés, pabia i fala: “Deus fasin diskisi di tudu ña kansera, ku tudu kasa di ña pape.”

⁵² I coma nomi di sugundu Efrain, pabia i fala: “Deus fasin kirsi na tera di ña kansera.”

⁵³ Ki seti anu di fartura na tera di Ejitu bin kaba.

⁵⁴ Ki seti anu di fomi kumsa, suma ku José falaba ja. I tenba fomi na tudu utru teras, ma na tudu tera di Ejitu i tenba kumida.

⁵⁵ Oca ku fomi na kumsa sintidu na tudu Ejitu, jinti raklama pa Faraó pa pidil kumida. Faraó fala tudu jinti di Ejitu: “Bo bai pa José, bo fasi tudu kil ki manda bos.”

⁵⁶ Oca ku fomi staba na tudu tera, José yabri armazens, i bindi miju pa pobu di Ejitu, pabia fomi i duru ba na tera di Ejitu.

⁵⁷ Jinti di tudu utru teras e bai pa Ejitu pa kumpra miju na mon di José, pabia fomi seduba duru na tudu teras.