Kumsada 40 - BIBLIA - traduson antigu in Krioulo

José splika dus suñu

¹ Mas tardi, kil ku ta ntrega kopu di biñu pa rei di Ejitu, ku paderu di rei, e bin yara kontra se mestre, rei di Ejitu.

² Faraó bin paña raiba garandi kontra si dus ŝef, ku sedu ŝef di kilis ku ta ntrega kopu di biñu pa rei, ku ŝef di paderus.

³ I pui elis prezu na kasa di kapiton di guarda, na kalabus nunde ku José staba prezu.

⁴ Kapiton di guarda pui José pa i sedu se nkargadu, pa i ba ta toma konta delis, i sirbi elis. E bin tarda la manga di tempu.

⁵ Kada un di ki dus omi ku staba prezu na kalabus, kil ku ta ntregaba kopu, ku paderu di rei di Ejitu, e suña na ki mesmu noti; kada suñu tene si propi signifikadu.

⁶ Oca José bai pa elis parmaña, i oja kuma e staba tarpajadu

⁷ Asin i punta ki ŝefis di Faraó, ku staba prezu ku el na kasa di si dunu: “Pabia di ke ku bo rostu sta tristi aos?”

⁸ E falal: “Anos dus no suña, ma i ka ten kin ku na splikanu e suñus.” José punta elis: “I ka Deus ku ta splika suñus? Bo kontan es bo suñus.”

⁹ Ŝef di koperus konta José si suñu, i falal: “Na ña suñu N oja un pe di uva ña dianti.

¹⁰ Na ki pe di uva i tenba tris ramu. Oca i na rebenta fojas, si flor bin sai; kacus di uva torna maduru.

¹¹ Kopu di Faraó staba na ña mon. N toma ki uvas, N pirmi elis na kopu di Faraó, N ntregal kopu na si mon.”

¹² José falal: “Es i si signifikadu: Ki tris ramu e sedu tris dia.

¹³ Dentru di tris dia Faraó na tirau pa fora, i na ribantau na bu lugar; bu na da kopu di Faraó na si mon konformi bu kustumu antigu oca bu seduba si koperu.

¹⁴ Ma ora ku tudu na kuriu ben, lembra di mi, bu sinti pena di mi; bu ta papia ku Faraó aserka di mi, bu ta fasin sai ne kau,

¹⁵ pabia N tiradu ku forsa di tera di ebreus; nin li tambi N ka fasi nada pa N pudu ne koba.”

¹⁶ Kontra ŝef di paderus oja kuma José splikaba suñu diritu, i falal: “Ami tambi N suña, kuma tris sestu di pon branku staba riba di ña kabesa.

¹⁷ Na ki sestu di riba i tenba tudu koldadi kumida ku paderus ta fasi pa Faraó, ma kacus na kumelba na ki sestu riba di ña kabesa.”

¹⁸ José falal: “Es i si signifikadu: Ki tris sestu e sedu tris dia.

¹⁹ Dentru di tris dia Faraó na tirau fora, i na pindrau na un po; kacus na kume bu karni.”

²⁰ Na terseru dia, ku Faraó fasi anus, i fasi un festa pa tudu si ŝefis. I tira ŝef di koperus fora, ku ŝef di paderus, dianti di se kumpañeris.

²¹ I ribanta ŝef di koperus na si lugar, pa i pudi torna ntrega kopu na mon di Faraó,

²² ma i nforka ŝef di paderus, suma ku José splika ki suñu.

²³ Ma ŝef di koperus ka bin lembra di José; i diskisi del.