Kumsada 4 - BIBLIA - traduson antigu in Krioulo

Kain ku Abel

¹ Adon dita ku si minjer. Eva preña, i padi un fiju comadu Kain, i fala: “Ku ajuda di SIÑOR N tene un fiju macu.”

² Mas tardi i padi si ermon Abel. Abel seduba bakiadur di karnel; Kain i labradur.

³ Dia ciga, Kain leba utru fruta di tera pa da oferta pa SIÑOR.

⁴ Abel tambi leba partis gurdu di purmeru fijus di si karnel. SIÑOR risibi Abel ku si oferta ku kontentamentu,

⁵ ma i ka risibi Kain nin si oferta. Kain paña raiba, tok si rostu muda.

⁶ SIÑOR punta Kain: “Ke ku manda bu paña raiba? Pabia di ke ku bu rostu muda?

⁷ Nta si bu fasi kusa diritu, bu ka na setadu? Ma si bu fasi kusa ku ka sta diritu, pekadu na montiau na porta. I misti manda na bo, ma bu ten ku dominal.”

⁸ Kain fala si ermon Abel: “No bai matu.” Oca e sta na matu, Kain lanta kontra si ermon Abel, i matal.

⁹ SIÑOR punta Kain: “Nunde bu ermon Abel?” I ruspundi i falal: “N ka sibi. Nta ami ki bakiadur di ña ermon?”

¹⁰ SIÑOR puntal: “Ke ku bu fasi? Sukuta! Sangi di bu ermon i na gritan la na con.

¹¹ Gosi abo i maldisuadu, bu serkadu di tera ku yabri si boka pa risibi na bu mon sangi di bu ermon.

¹² Ora ku bu labra con, nada i ka na dau. Bu na ba ta yanda-yanda, bu ka na tene kau sertu di mora na tera.”

¹³ Kain fala SIÑOR: “Ña kastigu i mas di ki kil ku N pudi nguenta.

¹⁴ Aos bu na serkan na tera; N ten ku sukundi di bu rostu. N na ba ta yanda-yanda na tera, sin kau sertu di mora. Tudu kin ku ojan, i na matan.”

¹⁵ SIÑOR rabida i falal: “Algin ku mata Kain, i na kastigadu seti bias.” SIÑOR pui sinal na Kain pa kualker algin ku ojal pa ka i matal.

¹⁶ Asin Kain sai na pursensa di SIÑOR, i bai mora na tera di Nod, na ladu di Eden na saida di sol.

¹⁷ Kain dita ku si minjer. Kila preña, i padi un fiju comadu Enok. Kain kumpu un tabanka, i comal nomi di si fiju Enok.

¹⁸ Enok padi Irad, Irad padi Meujael, Meujael padi Metusael, Metusael padi Lamek.

¹⁹ Lamek kasa dus minjer; nomi di un son i seduba Ada; utru, si nomi i Zila.

²⁰ Ada padi Jabal, ku seduba pape di kilis ku ta mora na tenda, e kria limarias.

²¹ Nomi di si ermon i seduba Jubal; es i sedu pape di tudu kilis ku ta toka arpa ku flauta.

²² Zila tambi padi Tubal-Kain, ku kumpu tudu koldadi feramentu di kobri ku feru. Irma di Tubal-Kain i seduba Naamá.

²³ Lamek fala si minjeris: “Ada ku Zila, bo sukutan; abos minjeris di Lamek, bo sukuta ña ditu. N mata un joven manera ki fidin, i masan.

²⁴ Si Kain pudi vingadu seti bias, Lamek ten ku vingadu seti te setenta bias.”

²⁵ Adon torna dita ku si minjer; I padi un fiju, i comal nomi di Set, i fala: “Deus dan utru fiju na konta di Abel, manera ku Kain matal.”

²⁶ Set padi tambi un fiju, i comal nomi di Enos. Na ki tempu jinti kumsa na coma nomi di SIÑOR.