Kumsada 38 - BIBLIA - traduson antigu in Krioulo

Judá ku Tamar

¹ Na ki tempu Judá disa si ermons, i bai fika ku un omi comadu Ira di prasa di Adulan.

² Judá oja la un fiju femia di un omi kananeu comadu Suá. I tomal, i kasa ku el.

³ I bin preña, i padi un fiju, i coma si nomi Er.

⁴ I torna preña, i padi utru fiju, i comal Onan.

⁵ I kontinua i padi utru fiju, i coma si nomi Selá. I staba na Kezib kontra i padil.

⁶ Judá toma minjer pa si purmeru fiju, Er; si nomi i Tamar.

⁷ Er, purmeru fiju di Judá, i seduba mau na uju di SIÑOR. Pabia di kila, SIÑOR matal.

⁸ Judá fala Onan: “Toma minjer di bu ermon, bu yardal, pa bu padi fiju ku el na konta di bu ermon.”

⁹ Ma Onan sibi kuma, si i padi fiju, i ka na sedu pa el. Asin, si i na ditaba ku si minjer, i ta darma si simenti na con, pa i ka padi na konta di si ermon.

¹⁰ Ki kusa ki fasi i mau na uju di SIÑOR; asin tambi SIÑOR matal.

¹¹ Judá fala Tamar, minjer di si fijus: “Fika viuva na kasa di bu pape te ora ku ña fiju Selá sedu garandi.” I fala asin pabia i pensa: “Talves Selá na muri suma si ermons.” Asin Tamar bai i fika na kasa di si pape.

¹² Tempu pasa ciu; minjer di Judá, fiju di Suá, muri. Dipus di konsola, Judá bai pa Timnat, pa omis ku na tiskiaba si karnel. Ira, si amigu adulamita, i bai ku el.

¹³ Algin konta Tamar: “Ala pape di bu omi bai Timnat pa tiskia si karnel.”

¹⁴ Tamar tira si bistidu di viuva, i kubri ku veu pa kamufla, i sinta na porton di Enain, ku sta na kamiñu di Timnat, pabia i oja kuma Selá seduba ja garandi, ma i ka dadu el pa minjer.

¹⁵ Judá ojal, i kuda kuma i minjer di mau fama, suma ki kubriba si rostu.

¹⁶ I bai pa el na kamiñu, pabia i ka sibiba kuma i minjer di si fiju. I falal: “Bin pa N dita ku bo.” Tamar puntal: “Ke ku bu na dan pa N dita ku bo?”

¹⁷ I falal: “N na mandau kabritu.” I puntal: “Bu na fikan ku un kusa te ora ku bu bin mandal?”

¹⁸ I puntal: “Kal kusa ku N na fikau ku el?” Tamar falal: “Bu karimbu ku si korda, ku ki manduku ku bu tene na mon.” I dal ki kusas, i dita ku el; i preña.

¹⁹ Tamar lanta i bai, i tira si veu, i torna bisti ropa di viuva.

²⁰ Judá manda kabritu na mon di si amigu adulamita, pa toma ki kusas ki fikaba na mon di minjer, ma i ka ojal.

²¹ I punta omis di ki kau: “Nunde ki minjer di mau fama ku staba na kamiñu lungu di porton di Enain?” E falal: “Nin un minjer di mau fama ka staba li.”

²² I riba pa Judá, i falal: “N ka ojal. Omis di ki kau e falan kuma nin un minjer di mau fama ka staba la.”

²³ Judá fala: “I pudi fika ku ki kusas. No ka misti pa jinti rinu. N mandal ki kabritu ma bu ka bai ojal.”

²⁴ Dipus di kuas tris mis, algin bin konta Judá: “Ala Tamar, minjer di bu fiju, i fasi suma minjer di mau vida. Gosi i preña.” Judá fala: “Bo tiral fora pa i kemadu.”

²⁵ Oca ke na tiral fora, i manda konta pape di si omi: “N preña ku omi ku tene e kusas. Jubi si bu pudi rapara kin ku tene e karimbu ku korda, ku e manduku.”

²⁶ Judá rapara elis, i fala: “El i mas justu di ki mi, pabia N ka dal ña fiju Selá.” Asin nunka mas i ka durmi ku el.

²⁷ Na tempu ki na padiba, i teneba jemias na si bariga.

²⁸ Oca ki na padi, un di mininus tira si mon fora. Partera toma liña burmeju, i maral na ki mon, i fala: “Es ku sai purmeru.”

²⁹ Ma i rukuji si mon; si ermon sai. Partera falal: “Asin ku bu romba, bu bin sai!” Pa kila i comadu Perez.

³⁰ Dipus, si ermon ku teneba korda burmeju na si mon i bin sai; i comadu Zerá.