Kumsada 37 - BIBLIA - traduson antigu in Krioulo

José ku si ermons

¹ Jakó mora na tera nunde ku si pape moraba, ku sedu tera di Kanaan.

² Asin ki kontisi na vida di Jakó. Oca José teneba disaseti anu, i ta bakiaba karnelis ku si ermons, fijus di Bila ku fijus di Zilpa, minjeris di si pape. José sempri i ta bin konta se pape mau kusas aserka delis.

³ Israel amaba José mas di ki tudu si fijus, pabia i padil kontra i beju ba ja. I fasil un kamisoti bonitu ku manga di kor.

⁴ Oca si ermons oja kuma se pape amal mas di ki elis tudu, e disgosta del; e ka pudiba ja papia ku el ku pas.

⁵ José suña un suñu ki konta si ermons; kila bin pui e mas disgosta del.

⁶ I fala elis: “Bo sukuta e suñu ku N suña.

⁷ No na maraba miju na lugar. Ña maradura lanta i firma; bo maraduras rodial, e mpina pa el.”

⁸ Si ermons falal: “Aa! Bu na rena riba di nos? Abo ku na manda riba di nos?” Elis e mas disgosta del pabia di si suñu, ku palabras ki na konta.

⁹ I suña inda utru suñu, i konta si ermons, i fala: “Bo sibi ke? N suña inda utru kusa, ku sol, lua ku onzi strela e mpina tudu ña dianti.”

¹⁰ Oca i konta si pape ku si ermons, si pape bin raprindil, i puntal: “Es i kal suñu ku bu suña? Nta ami ku bu mame ku bu ermons no na bin mpina tudu na con bu dianti?”

¹¹ Si ermons nveẑaba del, ma si pape rakada ki kusa na si korson.

Ermons di José bindil

¹² Si ermons bai bakia koral di se pape pertu di Siken.

¹³ Israel fala José: “Bu sibi kuma bu ermons e sta pertu di Siken, e na bakia. Bin, N na mandau pa elis.” I ruspundil: “N sta pruntu.”

¹⁴ Si pape falal: “Bai, bu jubi kuma ku bu ermons sta, tambi kuma ku koral sta; bu tisin rasposta.” Asin i mandal desdi kobon di Ebron. José ciga na Siken.

¹⁵ Manera ki na yanda-yanda na buska si ermons, un omi kontra ku el, i puntal: “Ke ku bu na buska?”

¹⁶ I ruspundil: “N na buska ña ermons. Di fabur, kontan nunde ke na bakia.”

¹⁷ Ki omi falal: “E sai ja li. N obi e na fala kuma e na bai pa Dotan.” Asin José yanda tras di si ermons, i oja elis na Dotan.

¹⁸ E ojal di lunju, antis di i ciga nunde elis; e monta planu pa matal.

¹⁹ E fala ŋutru: “Bo jubi, ala suñadur garandi na bin!

²⁰ Bo bin no matal, no botal na un de kobas; no na fala kuma un limaria mau di matu kumel. No na oja ke ku na bin sedu di si suñus!”

²¹ Oca Ruben obi ki palabra, i tenta kaplintil na se mon, i fala: “Ka no tiral vida.

²² Ka bo darma sangi! Bo botal son ne koba li na lala, ma ka bo bota mon nel.” Ruben fala asin pa pudi kaplintil na se mon, pa ribantal pa si pape.

²³ Oca José ciga nunde si ermons, e tiral ki kamisoti bonitu di manga di kor ki bistiba,

²⁴ e paña José, e botal na koba, pabia ki koba ka teneba nada; nin yagu ka staba la.

²⁵ Oca ke sinta pa kume, e yalsa kabesa, e oja un grupu di ismaelitas na bin di Jilead. Se kamelus na tisiba purfumus, bálsamu ku mira ke na lebaba pa Ejitu.

²⁶ Judá fala si ermons: “Es i kal purbitu ku no na ten si no mata no ermon, no sukundi si mortu?

²⁷ Bo bin no bindil pa ki ismaelitas. No mon ka na botadu riba del, pabia es i sedu no ermon, ku tene no sangi propi.” Si ermons seta.

²⁸ Oca ku nogosiaduris midianita pasa, e yalsa José na koba, e bindil pa vinti mueda di prata pa ismaelitas, ku bin leba José pa Ejitu.

²⁹ Ruben bin riba pa koba, i oja kuma José ka staba ja la. I rumpi si ropa,

³⁰ i bai pa si ermons, i fala elis: “Rapas ka sta la! Nunde ku N pudi bai gosi?”

^31-32 E toma ki kamisoti bonitu di José, di manga di kor, e mata un kabritu, e tinji ki ropa ku sangi, e mandal pa se pape, e falal: “No oja e ropa. Jubi diritu, bu rapara si i sedu di bu fiju o nau.”

³³ I raparal, i fala: “Es i kamisoti di ña fiju! Un limaria di matu kumel. Sertamenti José bidantadu padas padas!”

³⁴ Jakó rumpi ropa ki bistiba, i pui saku na kurpu, i miskiña si fiju pa manga di dia.

³⁵ Tudu si fijus macu ku femia lanta pa konsolal, ma i nega pa i konsoladu. I fala: “Na bardadi, N ten ku cora ña fiju te dia ku N bai pa el na kau di jinti ku muri.” Asin si pape cora pa José.

³⁶ Midianitas bindi José na Ejitu na mon di Potifar, kapiton di guarda, ofisial di Faraó.