Kumsada 35 - BIBLIA - traduson antigu in Krioulo

Deus manda Jakó pa Betel

¹ Dipus, Deus fala Jakó: “Lanta, bu bai pa Betel, bu mora la, bu kumpu altar pa Deus ku bin parsi pa bo oca bu na kuriba di bu ermon Esaú.”

² Jakó fala si familia ku tudu kilis ku staba ku el: “Bo tira deusis strañu ku sta na bo metadi. Bo purifika, bo torkia bo ropa.

³ No na lanta, no bai pa Betel. La N na kumpu altar pa ki Deus ku kudin na ki dia ku N foronta, kil ku staba ku mi na tudu kamiñu ku N yanda.”

⁴ Asin e ntrega Jakó tudu deusis strañu ke teneba, ku tudu brinkus di se orejas. Jakó ntera elis bas di karvaju ku staba juntu di Siken.

⁵ E bai. Medu di Deus kai riba di ki prasas na roda delis. Asin e ka kuri tras di fijus di Jakó.

⁶ Jakó ku tudu jinti ku staba ku el e ciga na kau comadu Luz (ku sedu Betel) ku sta na tera di Kanaan.

⁷ I kumpu altar, i coma nomi di ki lugar El Betel, pabia i la ku Deus parsilba kontra i na kuri di si ermon.

Mortu di Debora

⁸ Debora, minjer ku kria Rebeka, muri, i nteradu pertu di Betel, bas di un karvaju. Pabia di kila ki arvuri i comadu Alon-Bakut.

⁹ Dipus di Jakó bin di Padan Aran, Deus torna parsi pa el, i bensual,

¹⁰ i falal: “Bu nomi i Jakó, ma disna di gosi bu ka na comadu mas Jakó. Israel na sedu bu nomi.” Asin i pul nomi di Israel.

¹¹ Deus falal mas: “Ami i Deus ku ten tudu puder. Bu na padi, tok bu jorson ciu. Bu na sedu pape di un nason, ku manga di nason. Reis na sai na bu jorson.

¹² Tera ku N da Abraon ku Isak, N na dau el. Dipus di bo N na dal pa bu jorson.”

¹³ Deus disal na ki kau nunde ki na papiaba ku el.

¹⁴ Jakó firmanta un kuluna di pedra na ki kau nunde ku Deus papiaba ku el; i darma oferta di biñu riba del, tambi i darma azeiti.

¹⁵ I coma nomi di ki kau nunde ku Deus papiaba ku el Betel.

Benjamin padidu, Rakel muri

¹⁶ E sai di Betel pa pega kamiñu. Oca ke faltaba inda pa ciga Efrata, Rakel padi, ma i teneba manga di kansera na partu.

¹⁷ Oca ki na kansaba dimas, partera falal: “Ka bu medi, pabia bu na bin tene mas e fiju.”

¹⁸ Oca Rakel sta kuas pa muri, na si folgu di kabantada, i coma nomi di si fiju Benoni, ma si pape comal Benjamin.

¹⁹ Asin Rakel muri, i nteradu na kamiñu di Efrata, ku sedu Belen.

²⁰ Jakó firmanta un pedra di lembransa riba di kau ki nteradu nel. Te aos ki pedra sta la pa sinala kau ku Rakel nteradu nel.

²¹ Israel bai pa dianti, i torna yarma si tenda dianti di Migdal Eder.

²² Oca Israel na moraba na ki tera, Ruben bai i durmi ku Bila, kumadri di si pape. Israel bin sibil. Jakó teneba dozi fiju macu.

Fijus di Jakó

²³ Fijus di Leia e sedu Ruben (purmeru fiju di Jakó), dipus Simeon, Levi, Judá, Isakar ku Zebulon.

²⁴ Fijus di Rakel e sedu José ku Benjamin.

²⁵ Fijus di Bila, katibu di Rakel, e sedu Dan ku Naftali.

²⁶ Fijus di Zilpa, katibu di Leia, e sedu Gad ku Aser. Esis e sedu fijus di Jakó ku padidu na Padan Aran.

²⁷ Jakó bin pa si pape Isak na Manre, ku sta pertu di Kiriat-Arba, ku sedu Ebron, nunde ku Abraon ku Isak moraba.

²⁸ Isak vivi tok i ciga na idadi di sentu i oitenta anu.

²⁹ I da si folgu di kabantada, i muri, i rukujidu pa si papes, oca ki kompleta si dias. Si fijus Esaú ku Jakó e nteral.