Kumsada 34 - BIBLIA - traduson antigu in Krioulo

Dina disonradu

¹ Dina, fiju ku Leia padi ku Jakó, i sai pa bai jubi minjeris di ki tera.

² Siken, fiju di Amor, eveu, ku seduba ŝef di ki tera, i ojal, i tomal, i disonral.

³ Na si korson i sinti amor forti pa Dina, fiju di Jakó; i amal, i papia ku el ku bon manera.

⁴ Siken rabida pa si pape Amor, i falal: “Toman es pa i sedu ña minjer.”

⁵ Oca ku Jakó obi kuma si fiju Dina disonraduba, si fijus staba na kampu ku si limarias. I kala tok e bin.

⁶ Amor, pape di Siken, i bin pa Jakó pa papia ku el.

⁷ Fijus di Jakó bin di matu, e obi kila, e fika tristi dimas, e paña raiba ciu, pabia Siken fasi un kusa fiu dimas na uju di Israel, suma ki dita ku fiju di Jakó, kusa ki ka dibi di fasi.

⁸ Amor fala elis: “Ña fiju Siken i sta namoradu di bo fiju. N pidi bos, bo dal el pa i kasa.

⁹ Asin bo pudi sedu parenti ku nos, bo ta da bo fijus femia pa nos, bo toma no fijus femia pa bos.

¹⁰ Bo pudi mora na no metadi. Ali tera bo dianti. Bo ta mora, bo fasi bo nogos; utru terenu pudi sedu di bos propi.”

¹¹ Siken fala pape ku ermons di Dina: “N misti oja fabur bo dianti. N na da bos kil ku bo pidin.

¹² Bo pudi buri pres di kasamenti, bo pidi pursentis. N na da bos tudu kil ku bo misti. N misti son pa bo dan e bajuda pa ña minjer.”

¹³ Manera ku se irma Dina disonraduba, fijus di Jakó ruspundi Siken ku si pape Amor ku nganu,

¹⁴ e fala elis: “No ka pudi fasi un kusa suma es, pa no da no irma pa un omi ku ka sirkunsidadu, pabia es i ta sedu un borgoña pa nos.

¹⁵ No na seta son si bo bida suma nos; tudu macus na bo metadi pa e sirkunsidadu.

¹⁶ Asin no na da bos no fijus femia, no na kasa ku bo fijus femia. No na mora ku bos, no na sedu un pobu,

¹⁷ ma si bo ka seta sedu sirkunsidadu, no na toma no irma, no bai.”

¹⁸ Ki palabra i parsiba bon pa Amor ku si fiju Siken.

¹⁹ Asin ki joven, ku seduba mas rispitadu na tudu familia di si pape, i ka tarda na fasi kil ke pidiba, pabia i gostaba ciu di fiju di Jakó.

²⁰ Amor ku si fiju Siken e bai pa porton di prasa, e papia ku omis di ki prasa, e fala elis:

²¹ “Ki omis e misti sedu no amigus. No disa elis e mora ne tera, e fasi nogos li. E kau tene manga di lugar pa elis. No pudi kasa se fijus femia; e pudi kasa di nos.

²² Ma ki omis e na seta mora ku nos, pa no sedu un pobu, son si tudu macu na no metadi sirkunsidadu suma elis.

²³ Nta tudu se limarias ku kusas ke tene ka na sedu di nos? No seta es ke na fala; e na mora ku nos.”

²⁴ Tudu omis ku moraba na ki prasa seta palabra di Amor ku Siken. Asin tudu macu sirkunsidadu.

Falsiamentu di Simeon ku Levi

²⁵ Na terseru dia, kontra e staba ku dur forti, dus fiju di Jakó, Simeon ku Levi, ku junta mame ku pape ku Dina, e toma kada kin si spada, e yentra na prasa, nin jinti ka spera, e mata tudu macu.

²⁶ E mata Amor ku si fiju Siken ku spada; e toma Dina na kasa di Siken, e bai.

²⁷ Dipus di ki matansa, ki utru fijus di Jakó e bin toma tudu kusa na prasa, pabia la ku se irma disonradu.

²⁸ E paña se karnelis, se bakas, se burus, ku tudu kil ku tenba na prasa ku na pontas, e tomal.

²⁹ E leba tudu kusa di balur. Minjeris ku mininus lebadu prezu. E tira tudu kil ku tenba na se kasas.

³⁰ Jakó rabida i fala Simeon ku Levi: “Bo tisin un garandi kansera. Bo pui jinti de tera, ku sedu kananeus ku perizeus, pa e kuda mal di mi, suma anos i un pobu puku na numeru. E na bin junta tudu kontra mi, e na kaba ku mi ku tudu ña familia.”

³¹ E puntal: “Nta el i pudiba trata no irma suma minjer di mau vida?”