Kumsada 29 - BIBLIA - traduson antigu in Krioulo

Jakó ciga na fonti di Aran

¹ Asin Jakó lanta, i bai pa tera di jinti ku moraba na ladu di saida di sol.

² I oja un fonti na matu, ku tris koral di karnel ku ditaba lungu del, pabia na ki fonti e ta bibinti karnel. I tenba un pedra garandi riba di fonti.

³ Tudu koral di karnel ta juntaba; jinti ta tira pedra riba di fonti, e ta bibinti elis; dipus e ta torna pedra na si lugar riba di fonti.

⁴ Jakó punta bakiaduris: “Ña ermons, abos i di nunde?” E ruspundil: “Anos i di Aran.”

⁵ I punta elis: “Bo ka kunsi Labon, fiju di Naor?” E ruspundil: “No kunsil.”

⁶ I punta elis: “I sta la bon?” E ruspundil: “I sta bon. Ala si fiju Rakel na bin ku karnel.”

⁷ I fala elis: “Sol kinti inda. Es i ka ora di ruma karnelis. Bo da elis di bibi, bo bai bakia elis.”

⁸ E falal: “No ka pudi, tok karnelis ruma tudu, jinti bin tira pedra riba di fonti pa no bibinti karnelis.”

Jakó kontra ku Rakel

⁹ Oca i na papia inda ku elis, Rakel bin ku karnelis di si pape, pabia i seduba bakiadur.

¹⁰ Oca ku Jakó oja Rakel, fiju di Labon, ermon di si mame, ku karnelis di Labon, i ciga, i tira pedra na fonti, i bibinti ki karnelis di Labon.

¹¹ Jakó da Rakel beẑu, i yalsa si fála, i cora.

¹² I konta Rakel kuma el i parenti di si pape, fiju di Rebeka. Rakel kuri i bai konta si pape.

¹³ Oca Labon obi noba di Jakó, fiju di si irma, i kuri pa bai dal kontrada. I barsal, i dal beẑu, i lebal pa si kasa. Jakó konta Labon tudu e kusas.

¹⁴ Labon falal: “Na bardadi, abo i os di ña karni.” Jakó fika ku el un mis.

¹⁵ Dipus Labon punta Jakó: “Suma abo i ña ermon, bu na tarbaja pa mi di grasa? Kontan kal ku na sedu bu pagamentu.”

¹⁶ Labon teneba dus fiju femia. Nomi di mas beju seduba Leia, mas nobu seduba Rakel.

¹⁷ Leia teneba ujus fraku, ma Rakel tene bon forma di po di kurpu ku rostu bonitu.

¹⁸ Jakó gostaba di Rakel. I fala Labon: “N na tarbaja pa bo seti anu pa bu fiju mas nobu, Rakel.”

¹⁹ Labon falal: “Minjor pa N dau el di ki N da utru omi. Fika ku mi.”

²⁰ Asin Jakó tarbaja seti anu pa Rakel. I seduba na si uju suma nada, pabia i gostaba ciu del.

Labon ngana Jakó

²¹ Jakó fala Labon: “Ña tempu kaba ja. Dan ña minjer, pa N pudi kasa.”

²² Labon junta tudu omis di ki kau, i fasi festa,

²³ ma di tardi, i toma si fiju Leia, i lebal pa Jakó. I dita ku el.

²⁴ Labon toma si katibu Zilpa, i da si fiju Leia el pa i tenel suma katibu.

²⁵ Oca sol mansi, Jakó oja kuma i Leia. I rabida i punta Labon: “Ke ku manda bu fasin asin? Nta N ka tarbaja pa bo pa Rakel? Pabia di ke ku bu nganan?”

²⁶ Labon falal: “I ka asin ku no ta fasi ne tera, pa mas pikininu kasadu purmeru di ki mas garandi.

²⁷ Kabanta semana di Leia, dipus no na dau ki utru tambi; bu ta tarbaja ku mi mas seti anu.”

Jakó kasa ku Rakel

²⁸ Jakó fasi suma ki faladu, i kabanta semana di Leia. Dipus Labon dal si fiju Rakel pa i sedu si minjer.

²⁹ Labon da si katibu Bila pa i sedu katibu di Rakel si fiju.

³⁰ Jakó dita ku Rakel tambi; i gostaba del mas di ki Leia. I tarbaja ku Labon mas seti anu.

³¹ SIÑOR oja kuma Jakó ka muitu gosta di Leia, i judal pa i tene fijus, ma Rakel ka pudiba padi.

Fijus di Jakó

³² Leia preña, i padi un fiju, i comal nomi di Ruben, pabia i fala: “SIÑOR oja ña kansera. Gosi ña omi na bin gosta di mi.”

³³ I torna preña mas, i padi un fiju, i comal Simeon, i fala: “SIÑOR obi kuma N ka amadu; e ku manda i dan e fiju tambi.”

³⁴ I torna preña utru bias, i padi un fiju, i fala: “E bias ña omi na bin junta ku mi, pabia N padi e tris fiju ku el.” Asin i comal nomi di Levi.

³⁵ I torna preña mas, i padi un fiju, i fala: “E bias, N na ngaba SIÑOR.” Pabia di kila, i coma si nomi Judá. Dipus i para padi.