Kumsada 28 - BIBLIA - traduson antigu in Krioulo

Isak manda Jakó pa Padan-Aran

¹ Isak coma Jakó, i bensual, i falal: “Ka bu kasa ku minjer di fijus di Kanaan.

² Lanta, bu bai pa Padan-Aran, pa kasa di Betuel, pape di bu mame, bu buska bu minjer na metadi di fijus di Labon, ermon di bu mame.

³ Deus ku ten tudu puder i ta bensuau, i ta fasiu pa bu padi manga di fiju, pa bu jorson padi ciu, bu bin sedu manga di jorson.

⁴ I ta dau benson di Abraon, abo ku bu jorson, pa bu yarda tera nunde ku bu na mora nel suma stranjeru, ku Deus da Abraon.”

⁵ Asin, Isak manda Jakó; kila bai pa Padan-Aran, pa Labon, fiju di Betuel, arameu, ermon di Rebeka, mame di Jakó ku Esaú.

⁶ Esaú obi kuma Isak bensua Jakó, i mandal pa Padan-Aran pa i buska minjer. I obi kuma, oca ki na bensual, i falal: “Ka bu kasa ku minjer di fijus di Kanaan.”

⁷ I oja tambi kuma ku Jakó obi si pape ku si mame, i bai pa Padan-Aran.

⁸ Tambi i rapara kuma minjeris di Kanaan e ka bali dianti di uju di Isak si pape.

⁹ Asin Esaú bai pa Ismael, i kasa ku utru minjer, ku sedu Maalat, irma di Nebaiot, fiju di Ismael, fiju di Abraon. Es i fora di minjeris ki kasaba ja.

Jakó oja vison di skada

¹⁰ Jakó sai di Berseba, i bai pa Aran.

¹¹ I ciga na un kau, i durmi la, pabia sol noti ba ja. I toma un pedra di ki kau, i fasil turbuseru.

¹² I suña ku un skada ku puduba na con tok i na toka na seu. Anjus di Deus na subi, e na ria nel.

¹³ SIÑOR staba riba di ki skada, i falal: “Ami i SIÑOR, Deus di bu pape Abraon, Deus di Isak. E tera ku bu dita nel, N na dau el, ku bu jorson.

¹⁴ Bu jorson na ciu suma reia na con; bu terenu na bai desdi kaida di sol te na si saida, di norti pa sul. Tudu rasas di mundu na sortiadu pabia di bo ku bu jorson.

¹⁵ Ami N sta ku bo, N na guardau pa nunde ku bu na bai. N na ribantau pa e tera, pabia N ka na disau, tok N fasi ke ku N falau.”

¹⁶ Jakó korda na sonu, i fala: “Bardadi! SIÑOR sta ne kau, ma N ka sibiba.”

¹⁷ Jakó sinti medu, i fala: “E kau meduñu! Es i ka utru kau si i ka sedu kasa di Deus. Es i porta di seu.”

Kuluna di Betel

¹⁸ Jakó mandurga parmaña sedu, i toma ki pedra ki puiba suma turbuseru, i fasil suma kuluna, i darma azeiti riba del.

¹⁹ I coma nomi di ki kau Betel. Nomi di ki prasa purmeru i seduba Luz.

²⁰ Jakó jurmenta i fala: “Si Deus sta ku mi, i guardan ne bias ku N sta nel, i dan kusa di kume, ku ropa pa N bisti,

²¹ si N riba ku pas pa kasa di ña pape, SIÑOR na sedu ña Deus.

²² E pedra ku N pui suma kuluna i na sedu kasa di Deus. Di tudu kil ki dan, sin falta, na kada des N na tornal un.”