Kumsada 27 - BIBLIA - traduson antigu in Krioulo

Isak manda Esaú pa i fasil un gisadu

¹ Oca ku Isak beju ba ja, si uju bida sukuru, tok i ka pudi oja. I coma Esaú, si fiju mas beju, i falal: “Ña fiju.” Kila kudi i falal: “Alin li.”

² Isak falal: “Jubi gosi N beju. N ka sibi dia di ña mortu.

³ Asin, toma bu arma ku sedu bu mansasa ku fleŝas, bu bai pa matu pa montia un limaria pa mi,

⁴ bu kusñan un gisadu sabi ku N ta gosta, bu tisin el pa N kume, pa N pudi bensuau antis di N muri.”

⁵ Rebeka na sukutaba oca Isak na papia ku si fiju Esaú. Esaú bai matu pa bai montia pa i pudi tisi kusa pa si pape.

Rebeka ku Jakó ngana Isak

⁶ Rebeka fala si fiju Jakó: “Jubi, N obi bu pape i na papia ku bu ermon Esaú, i falal:

⁷ ‘Tisin un limaria, bu kusñan gisadu sabi pa N pudi kume; N ta bensuau na pursensa di SIÑOR antis di N muri.’

⁸ Asin, ña fiju, sukutan, bu fasi kil ku N mandau.

⁹ Bai pa koral, bu tisin dus fiju di kabra gurdu, pa N pudi kusña gisadu sabi pa bu pape, suma ku el i ta misti.

¹⁰ Bu ta lebal pa bu pape, pa i kume, pa i dau si benson antis di muri.”

¹¹ Jakó fala si mame Rebeka: “Jubi, ña ermon Esaú i omi ku ciu kabelu na kurpu; ami N ka tene kabelu ciu.

¹² Ña pape i pudi palpan; N ta sedu nganadur na si uju. Asin, te pa N oja benson, N ta tisi maldison riba di ña kabesa.”

¹³ Si mame falal: “Ña fiju, disa maldison pa i kai riba di mi; obi son ke ku N falau, bu bai tisin elis.”

¹⁴ I bai toma elis, i leba pa si mame. Kila kusña un gisadu sabi suma ku si pape ta misti.

¹⁵ Dipus Rebeka toma ropa mas bonitu di si fiju mas beju, Esaú, ki rakadalba na kasa, i bisti Jakó, si fiju mas pikininu.

¹⁶ Tambi i kubri si mon ku parti di garganti ku ka tene kabelu ku kuru di kabra.

¹⁷ I ntrega ki gisadu sabi, ku pon ki kumpu, na mon di si fiju Jakó.

¹⁸ I bai pa si pape, i falal: “Papa.” I kudil, i falal: “Alin li, ña fiju. Abo i kin?”

¹⁹ Jakó fala si pape: “I ami, Esaú, bu purmeru fiju. N fasi suma ku bu falan. Lanta, bu sinta, bu kume un bokadu di karni ku N montia, pa bu pudi bensuan.”

²⁰ Isak punta si fiju: “Kuma ku bu ojal dipresa asin, ña fiju?” El i ruspundil: “SIÑOR bu Deus ku mandal pa i bai kontra ku mi.”

²¹ Isak fala Jakó: “Ciga li, ña fiju, pa N palpau, pa N pudi sibi si abo i ña fiju Esaú o nau.”

²² Jakó ciga lungu di Isak si pape. Kila palpal, i falal: “Fála i suma di Jakó, ma mon i suma di Esaú.”

²³ Asin i ka raparal, pabia si mon teneba kabelu suma mon di si ermon Esaú. E ku manda i bensual,

²⁴ ma i puntal: “Na bardadi, abo i ña fiju Esaú?” Jakó falal: “Ami i el.”

²⁵ Isak falal: “Tisin ki karni ku bu montia, pa N pudi kume; dipus N ta dau benson.” I cigantal el, i kume; i lebal tambi biñu, i bibi.

²⁶ Si pape Isak falal: “Ciga li, ña fiju, bu dan beẑu.”

²⁷ Jakó bai pa el, i dal beẑu. Si pape sinti ceru di si ropa, i bensual, i falal: “Ceru di ña fiju i suma ceru di un matu ku SIÑOR bensua.

²⁸ Pa Deus dau serenu di seu, pa i pui bu terenu pa i gurdu, pa bu tene manga di trigu, ku biñu fresku.

²⁹ Pa utru jinti sirbiu; nasons pa e mpina bu dianti; pa bu sedu siñor riba di bu ermons; fijus di bu mame pa e mpina bu dianti. Kilis ku ta maldisuau, pa e sedu maldisuadu; kilis ku ta bensuau, pa e sedu bensuadu.”

³⁰ Dipus di Isak bensua Jakó, kila kaba sai son dianti di si pape, si ermon Esaú ciga di montia.

³¹ El tambi i kusña un gisadu sabi, i lebal pa si pape, i falal: “Papa, lanta, bu kume un bokadu di karni ku N montia, pa bu pudi dan bu benson.”

³² Si pape Isak puntal: “Abo i kin?” I falal: “Ami i Esaú, bu fiju mas beju.”

³³ Isak tirmi ku forsa, i punta: “Nta kin ku montia, i tisin karni? N kumel antis di bu yentra, N dal ña benson. Ki benson ka pudi maina.”

³⁴ Oca Esaú obi palabra di si pape, si korson findil, i pupa ku forsa, i fala: “Papa, bensuan tambi!”

³⁵ Isak falal: “Bu ermon bin ku nganu, i toma bu benson.”

³⁶ Esaú falal: “Nomi di Jakó i justal! Es fasi dus bias ki nganan. I toma ña diritu di sedu purmeru fiju; gosi i toma ña benson!” Dipus i punta: “Bu ka guarda nin un benson pa mi?”

³⁷ Isak ruspundi i fala Esaú: “N pul pa i sedu siñor riba di bo. N dal tudu si ermons pa e sedu si servus. N dal trigu ku biñu nobu pa e sustental. Ke gora ku N pudi fasi pa bo, ña fiju?”

³⁸ Esaú fala si pape: “Nta bu tene son un benson, Papa? Bensuan tambi, Papa.” Dipus i kumsa na cora risu.

³⁹ Si pape Isak ruspundi i falal: “Bu na mora lunju di terenu gurdu, lunju di serenu di seu.

⁴⁰ Bu na vivi ku spada na mon; bu na sirbi bu ermon, ma tempu na ciga ku bu na sedu rebeldi, bu na sakudi si korenti na bu garganti.”

⁴¹ Esaú sinti rankor kontra Jakó pabia di ki benson ku si pape dalba. I fala na si sintidu: “Dias di cur di ña pape i pertu. Dipus N na mata ña ermon Jakó.”

⁴² Oca Rebeka kontadu ke ku si purmeru fiju Esaú falaba, i manda coma si fiju mas nobu, Jakó, i falal: “Bu ermon Esaú na konsola ku planu pa matau.

⁴³ Gosi, ña fiju, fasi ke ku N na falau. Lanta bu kuri pa Labon, ña ermon na Aran.

⁴⁴ Mora ku el un bokadu tok raiba di bu ermon pasa.

⁴⁵ Ora ku ki raiba ki ten pa bo bin kaba, i diskisi ke ku bu fasil, N na manda rekadu pa bu riba. Pabia di ke ku N na pirdi bos dus na un dia?”

⁴⁶ Rebeka fala Isak: “N sta disgostadu di ña vida pabia de minjeris eteu. Si Jakó kasa ku un minjer de tera, un fiju di Et suma esis li, ke ku ña vida na bali?”