Kumsada 26 - BIBLIA - traduson antigu in Krioulo

Isak ku Abimelek

¹ I tenba fomi na tera, fora di ki purmeru fomi na tempu di Abraon. Isak bai pa Abimelek, rei di filisteus, na Jerar.

² SIÑOR bin pa Isak, i falal: “Ka bu bai pa Ejitu; fika na tera ku N mandau pa bu fika nel.

³ Mora ne tera un bokadu; ami N na sta ku bo, N na da tudu e teras pa bo ku bu jorson. N na konfirma palabra ku N jurmenta pa Abraon, bu pape.

⁴ N na pui bu jorson pa i ciu suma strelas di seu; N na da bu jorson tudu e teras. Tudu nasons di mundu na bensuadu pabia di bu jorson,

⁵ pabia Abraon ta obinba, i kumpri tudu ña mandadu, ña ordi, ña regra ku ña lei.”

⁶ Asin Isak fika i mora na Jerar.

⁷ Oca omis di ki kau puntal di si minjer, i fala elis: “I ña irma.” I medi fala kuma i si minjer, pa omis ka bin matal pabia di Rebeka, suma i bonitu.

⁸ I tardaba la, tok un dia Abimelek, rei di filisteus, jubi na janela, i oja Isak na divirti ku si minjer Rebeka.

⁹ Abimelek coma Isak, i falal: “Na bardadi, i bu minjer! Ke ku manda bu fala i bu irma?” Isak falal: “Pabia N kuda kuma N pudi matadu pabia del.”

¹⁰ Abimelek puntal: “Es i ke ku bu fasinu? Kualker omi di ña pobu pudiba dita ku bu minjer. Asin bu na tisiba kulpa riba di nos.”

¹¹ Abimelek avisa tudu jinti, i fala elis: “Kualker algin ku pui mon ne omi o na si minjer i ten ku matadu.”

¹² Isak labra na ki tera; na ki mesmu anu i kuji sen bias mas di ki kil ki sumiaba, pabia SIÑOR bensual.

¹³ I bida riku; si rikesas kumsa na buri, tok i bin sedu riku dimas.

¹⁴ I teneba manga di karnel ku baka ku manga di kriadu, tok filisteus nveẑa del.

¹⁵ Fontis ku kriadus di si pape Abraon kobaba oca Abraon staba inda di vida, filisteus ntupi elis, e inci ku reia.

¹⁶ Abimelek fala Isak: “Sai na no metadi; gosi ja bu forsa ciu, i mas di nos.”

¹⁷ Asin Isak munda di la, i bai pui tenda na kobon di Jerar, i mora la.

¹⁸ I torna koba fontis ku kobaduba na tempu di Abraon si pape, ku filisteus tapaba oca Abraon muriba ja. Isak pui elis mesmu nomis ku si pape puiba elis.

¹⁹ Kriadus di Isak koba na ki kobon, e bin diskubri un fonti ku ta lagua.

²⁰ Bakiaduris di Jerar jusia ku bakiaduris di Isak, e fala: “E yagu i di nos!” E ku manda i coma nomi di ki fonti Esek, suma ke jusiaba.

²¹ E torna koba mas utru fonti, ma e jusia riba di kila tambi. Asin i comal Sitna.

²² I munda di la, i torna koba utru fonti. Ningin ka jusia riba del. Asin i comal Reobot, i fala: “Gosi ja, SIÑOR danu mas lugar; no na buri na tera.”

²³ Di la i bai pa Berseba.

²⁴ Ki di noti SIÑOR bai pa el, i falal: “Ami i Deus di bu pape Abraon. Ka bu medi, pabia N sta ku bo. N na bensuau, N na buri numeru di bu jorson, pabia di ña servu Abraon.”

²⁵ Isak kumpu un altar la, i coma nomi di SIÑOR. I yarma si tenda la; si kriadus koba fonti.

Abimelek fasi kontratu ku Isak

²⁶ Abimelek bin di Jerar pa jubil, ku Auzat si konsijadur, ku Fikol, ŝef di si tropas.

²⁷ Isak punta elis: “Ke ku manda bo bin jubin, suma bo nfastian, bo tiran na bo metadi?”

²⁸ E ruspundil: “No oja klaru kuma SIÑOR sta ku bo. E ku manda no oja kuma i dibi di ten juramentu na no metadi, anos ku bo. No misti fasi kontratu ku bo

²⁹ ku bu ka na fasinu mal, suma anos no ka toka na bo, ma no fasiu son ben, no mandau ku pas. Gosi, benson di SIÑOR sta riba di bo.”

³⁰ Isak fasi festa pa elis; e kume, e bibi.

³¹ E mandurga, e jurmenta, e dispidi ŋutru ku pas.

³² Na ki mesmu dia, kriadus di Isak bai kontal di fonti ke kobaba, e falal: “No oja yagu!”

³³ I comal Seba. Asin ki prasa bin ta comadu Berseba, te gosi.

³⁴ Oca Esaú teneba korenta anu di idadi, i kasa ku Judit, fiju di un eteu comadu Beeri; i kasa tambi ku Basemat, fiju di utru eteu comadu Elon.

³⁵ Esis e tisi garandi kasabi pa Isak ku Rebeka.