Kumsada 25 - BIBLIA - traduson antigu in Krioulo

Utru fijus di Abraon

¹ Abraon toma utru minjer comadu Ketura.

² Es padi ku el Zinran, Joksan, Medan, Midian, Jisbak ku Suá.

³ Joksan padi Sebá ku Dedan. Fijus di Dedan seduba Asurin, Letusin ku Leumin.

⁴ Fijus di Midian seduba Efá, Efer, Enok, Abida ku Elda. Es tudu e sedu fijus di Ketura.

⁵ Abraon disa tudu ki teneba pa Isak.

⁶ Ocal bibu inda, i da pursentis pa fijus di si kumadris, i manda elis pa tera ku sta na ladu di saida di sol, lunju di si fiju Isak.

Mortu di Abraon

⁷ Tudu vida di Abraon i sedu di sentu i setenta i sinku anu.

⁸ I muri ku bon bejisa, un omi di idadi; i lebadu pa si pobu.

⁹ Si fijus Isak ku Ismael nteral na koba di Makpela, na terenu di Efron, fiju di Zoar, eteu, ku staba pertu di Manre,

¹⁰ ki terenu ku Abraon kumpraba na mon di fijus di Et. La ku Abraon nteradu, ku Sara si minjer.

¹¹ Dipus di mortu di Abraon, Deus bensua si fiju Isak, ku moraba lungu di fonti di Laai-Roi.

Jorson di Ismael

¹² Es i lista di jorson di Ismael, fiju di Abraon, kil ku Agar, di Ejitu, katibu di Sara, padiba ku el.

¹³ Es i nomi di fijus di Ismael, konformi se jorson. Purmeru fiju di Ismael seduba Nebaiot; dipus i padi Kedar, Adbeel, Mibsan,

¹⁴ Misma, Dumá, Masá,

¹⁵ Adar, Tema, Jetur, Nafis, ku Kedemá.

¹⁶ Esis i fijus di Ismael, dozi ŝef di familias; se nomis dadu pa se tabankas ku se moransas.

¹⁷ Tudu vida di Ismael i sentu i trinta i seti anu. I muri, i lebadu pa si pobu.

¹⁸ Si jorson moraba na metadi di tera di Avilá ku Sur, pertu di Ejitu, na ladu di saida di sol, na kamiñu pa Asiria. E vivi lunju di tudu utru fijus di Abraon.

Jorson di Isak

¹⁹ Es i storia di Isak, fiju di Abraon. Abraon padi Isak.

²⁰ Oca Isak teneba korenta anu di idadi, i kasa ku Rebeka, fiju di Betuel, arameu di Padan Aran, irma di Labon, ku seduba tambi arameu.

²¹ Isak fika i na ora SIÑOR pa si minjer, pabia i ka ta padi. SIÑOR obi si orason. Rebeka, si minjer, preña.

²² Fijus na bulbuliba dentru di si bariga. I punta: “Ke ku manda N sta asin?” I bai punta SIÑOR.

²³ SIÑOR falal: “Dus nason ku sta na bu bariga. Bu na padi dus jorson ku na separa. Un jorson na sedu mas forti di ki ki utru; Ki mas garandi na sirbi ki mas pikininu.”

Esaú ku Jakó padidu

²⁴ Oca tempu ciga pa i padi, i teneba jemias na si bariga.

²⁵ Purmeru padidu burmeju, kurpu kubridu ku kabelu suma ropa di kabelu. Pabia di kila, i pudu nomi di Esaú.

²⁶ Dipus si ermon padidu; si mon pega kalkañada di Esaú. Pabia di kila, i pudu nomi di Jakó. Isak teneba sesenta anu kontra e padidu.

²⁷ Mininus kirsi. Esaú bin ten jitu na montia; i gostaba di vida di matu, ma Jakó sedu un omi ketu, ku ta fika lungu di tendas.

²⁸ Isak gostaba di Esaú, pabia i ta kontenti ku karni ki ta montia, ma Rebeka gostaba di Jakó.

²⁹ Un dia Jakó kusña un gisadu. Esaú bin di matu kansadu,

³⁰ i fala Jakó: “Ten pasensa, tira utru di ki gisadu burmeju pa N kume, pabia N kansa.” Pabia di kila, e pul nomi di Edon.

³¹ Jakó falal: “Son ora ku bu bindin bu diritu di purmeru fiju.”

³² Esaú falal: “Jubi, N sta kuas pa muri! Ke ku diritu di purmeru fiju na balin?”

³³ Jakó falal: “Jurmenta gosi.” I jurmenta, i bindi Jakó diritu di purmeru fiju.

³⁴ Jakó da Esaú pon, ku ki gisadu burmeju ku parsi fison. I kume, i bibi, i lanta, i bai. Asin i njuti si diritu di purmeru fiju.