Kumsada 24 - BIBLIA - traduson antigu in Krioulo

Abraon manda buska minjer pa Isak

¹ Abraon beju ba ja; SIÑOR bensualba na tudu kusa.

² Abraon fala si servu ku mas tardaba ku el, ku ta tomaba konta di tudu ki teneba: “Pui bu mon bas di ña perna.

³ N misti pa bu jurmenta pa SIÑOR, Deus di seu ku tera, ku bu ka na ranja minjer pa ña fiju na metadi di bajudas di jinti di Kanaan nunde ku N mora,

⁴ ma bu na bai pa ña tera, pa ña parentis, bu na buska un minjer la pa ña fiju Isak.”

⁵ Servu puntal: “Nta si minjer ka misti bin ku mi pa e tera, N pudi ribanta bu fiju na tera nunde ku bu sai nel?”

⁶ Abraon ruspundi i falal: “Di nin un manera ka bu leba ña fiju pa la.

⁷ SIÑOR, Deus di seu, ku tisin di kasa di ña pape, di tera di ña parentis, i papia ku mi, i jurmenta, i fala kuma i na da e tera pa ña jorson. El ku na manda si anju pa i bai bu dianti, pa bu pudi ranja minjer la pa ña fiju.

⁸ Si minjer ka misti bin ku bo, bu na kapli de juramentu ku bu na fasin, ma di kualker manera, ka bu leba ña fiju pa la.”

⁹ Asin ki servu pui si mon bas di perna di Abraon si mestre, i jurmental riba de nogos.

¹⁰ Dipus, ki servu, ku tenba konta di tudu rikesa di Abraon, i toma des di si kamelus, i bai pa Mesopotamia, pa prasa di Naor.

¹¹ I pui kamelus finka juju lungu di un fonti di yagu fora di prasa, di tardiñu, na ora ku minjeris ta bai kata yagu.

¹² I fala: “O SIÑOR, Deus di ña mestre Abraon, dan un bon kontrada aos, bu fasi bondadi pa ña mestre Abraon.

¹³ Ali N firma lungu di fonti di yagu. Bajudas de prasa e na bin kata yagu.

¹⁴ N misti pa i sedu asin: N na pidi un bajuda pa i baŝa si puti pa N pudi bibi. Si i falan: ‘Bibi; N na tisi yagu tambi pa bu kamelus,’ N ta sibi kuma i es ku bu marka pa bu servu Isak. Si i bin sedu asin, N ta sibi kuma bu mostra bu bondadi pa ña mestre.”

Kontrada ku Rebeka

¹⁵ Antis di kaba papia, i oja Rebeka na bin ku si puti riba di ombra, ku seduba fiju di Betuel, fiju di Milka, minjer di Naor, ermon di Abraon.

¹⁶ Bajuda i bonitu ba dimas; i ka kunsiba inda omi. I ria pa fonti, i kata si puti, i subi.

¹⁷ Servu kuri pa bai dal kontrada, i falal: “Disan pa N bibi un bokadiñu di yagu di bu puti.”

¹⁸ Bajuda falal: “Ñu pudi bibi.” I janti i baŝa si puti riba di si mon, i patil yagu.

¹⁹ Oca i kaba patil yagu, i falal: “N na kata tambi yagu pa bu kamelus, tok e kaba bibi.”

²⁰ I bai kinti-kinti ku ki yagu ki teneba na puti, i darmal na tina. I torna kuri pa fonti pa kata mas yagu, i fika i kata pa tudu si kamelus.

²¹ Ki omi fika kaladu, i na jubil diritu, pa i pudi sibi si SIÑOR na fasi pa si bias tene bon rusultadu.

²² Oca ku kamelus kaba bibi, omi toma un anel di uru di mas di sinku grama, ku dus pulsera di uru ku pesa mas di sen grama pa si mon.

²³ I puntal: “Abo i fiju di kin? Di fabur, kontan si i ten kau pa no durmi na kasa di bu pape.”

²⁴ I ruspundi i falal: “Ami i fiju di Betuel, fiju ku Milka padi ku Naor.”

²⁵ I torna fala mas: “No tene manga di paja ku utru kumida pa limarias, ku kau di durmi.”

²⁶ Ki omi mpina, i adora SIÑOR,

²⁷ i fala: “N na ngaba SIÑOR, Deus di ña mestre Abraon, ku ka disa di mostra si bondadi ku si bardadi pa ña mestre. Pa mi, N pudi fala kuma SIÑOR gian na kamiñu pa kasa di parentis di ña mestre.”

²⁸ Bajuda kuri, i bai konta e kusas tudu na kasa di si mame.

²⁹ Rebeka teneba un ermon comadu Labon. Kila kuri pa bai da kontrada ku ki omi na fonti.

³⁰ Oca ki oja ki anel, ku pulseras na mon di si irma, i obi kombersa di si irma Rebeka oca i na konta ke ku ki omi falalba, i sai i bai pa ki omi, i ojal i firmaba ku si kamelus lungu di fonti.

³¹ I falal: “Yentra; abo i omi ku SIÑOR bensua; ke ku manda bu sta fora? Ami N purpara ja kasa, ku kau pa kamelus.”

³² Ki omi bai pa kasa. Jinti tira kargu na kamelus, e da elis paja ku utru kumida. E tisi yagu pa omi ku si kumpañeris pa e laba pe.

³³ E pui kumida dianti di omi, ma el i fala: “N ka na kume tementi N ka konta bos kusa ku N ten pa fala.” Labon falal: “Konta.”

³⁴ I fala: “Ami i servu di Abraon.

³⁵ SIÑOR darma benson ciu na ña mestre, tok i sedu riku. I dal karnelis, bakas, prata, uru, servus macu ku femia, kamelus ku burus.

³⁶ Sara, minjer di ña mestre, i padi un fiju ku el na si bejisa; Abraon da ki fiju tudu kil ki tene.

³⁷ Ña mestre fasin pa N jurmenta, i falan: ‘Ka bu buska minjer pa ña fiju na metadi di fijus di kananeus ku N mora na se tera.

³⁸ Bu na bai pa kasa di ña pape, pa ña familias, bu ta buska minjer pa ña fiju.’

³⁹ N punta ña mestre: ‘Nta, si minjer ka seta bin ku mi?’

⁴⁰ El i falan: ‘SIÑOR ku N yanda na si dianti, i na manda si anju ku bo, i na pui bu bias pa i da bon rusultadu, pa bu pudi ranja minjer pa ña fiju na ña familia, na kasa di ña pape.

⁴¹ Asin bu ta kapli di ña juramentu. Ora ku bu bai pa kasa di ña familia, si e nega dau bajuda, bu na kapli di ña juramentu.’

⁴² Aos N ciga na fonti, N fala: ‘SIÑOR, Deus di ña mestre Abraon, si bu na dan bon rusultadu ne bias ku N sta nel,

⁴³ pa i sedu asin. Ali N sta lungu di fonti di yagu. Si un bajuda bin pa bin kata yagu, si N falal pa i patin un bokadiñu di yagu di si puti,

⁴⁴ si el i falan pa N bibi, i na kata yagu pa ña kamelus tambi, N ta sibi kuma es i minjer ku SIÑOR marka pa fiju di ña mestre.’

⁴⁵ “Antis di N kaba papia na ña sintidu, Rebeka na binba ja ku si puti na ombra. I ria pa fonti, i kata yagu. N pidil pa i patin yagu pa N bibi.

⁴⁶ El i janti, i rianta si puti riba di si ombra, i falan: ‘Bibi; tambi N na da bu kamelus pa e bibi.’ N bibi; el tambi i da ña kamelus di bibi.

⁴⁷ N puntal: ‘Abo i fiju di kin?’ El i ruspundi i falan: ‘Ami i fiju di Betuel, fiju di Naor, ki padi ku Milka.’ Na ki ora N pul anel na si naris, ku pulsera na si mon.

⁴⁸ N mpina N adora SIÑOR, N ngaba SIÑOR, Deus di ña mestre Abraon, kil ku kumpañan pa kamiñu sertu, pa N pudi ranja fiju di ermon di ña mestre pa si fiju.

⁴⁹ Gosi, si bo na mostra bondadi ku bardadi pa ña mestre, bo fasin pa N sibi; si kontra bo ka na fasil, bo ta fasin tambi pa N sibi, pa N bai jubi na utru kau.”

⁵⁰ Labon ku Betuel ruspundi e falal: “E kusa i bin di SIÑOR. No ka pudi falau nada, nin ben nin mal.

⁵¹ Ali Rebeka sta bu dianti; tomal, bu leba, pa i sedu minjer di fiju di bu mestre, suma ku SIÑOR fala.”

⁵² Oca servu di Abraon obi e kombersa, i mpina pa con dianti di SIÑOR.

⁵³ Dipus i tira kusas di prata ku di uru, ku ropa, i da Rebeka. I da tambi kusas di balur pa si ermon ku si mame.

⁵⁴ Dipus, el ku omis ku staba ku el e kume, e bibi, e durmi la, e lanta parmaña. Ki omi fala: “Disan N riba pa ña mestre.”

⁵⁵ Ermon ku mame di Rebeka falal: “Disa bajuda pa i fika ku nos pa i tene dias, nin si i des dia; i ta bai.”

⁵⁶ Ma omi fala elis: “Ka bo tujin, pabia SIÑOR dan bon rusultadu na ña bias. Bo disan N bai pa N pudi riba pa ña mestre.”

⁵⁷ E falal: “No coma bajuda, no puntal.”

Rebeka seta kasa ku Isak

⁵⁸ E coma Rebeka, e puntal: “Bu na bai ku e omi?” I fala elis: “N na bai.”

⁵⁹ E dispidi se irma Rebeka, ku minjer ku krial, ku servu di Abraon ku si omis.

⁶⁰ E bensua Rebeka, e falal: “No irma, pa bu sedu mame di milyons di jinti; pa bu jorson ngaña se inimigus, e toma se prasas.”

⁶¹ Rebeka lanta, ku si bajudas, e monta kamelus, e bai ku ki omi. Asin servu di Abraon toma Rebeka, i bai ku el.

⁶² Isak bin pa ladu di fonti di Laai Roi, pabia i moraba na sul di Kanaan.

⁶³ Un dia di tardi i sai pa bai ora na matu. I yalsa kabesa, i oja kamelus na bin.

⁶⁴ Rebeka tambi yalsa si kabesa, i oja Isak, i ria na kamelu,

⁶⁵ i punta servu di Abraon: “Es i kal omi ku na bin na kamiñu di matu pa bin danu kontrada?” Servu ruspundi i falal: “Es i ña mestre.” Rebeka toma si veu, i kubri ku el.

⁶⁶ Servu konta Isak tudu ke ki fasiba.

⁶⁷ Isak leba Rebeka pa tenda di si mame Sara, i tomal, i kasa ku el, i amal. Asin Isak konsoladuba dipus di mortu di si mame.