Kumsada 21 - BIBLIA - traduson antigu in Krioulo

Isak padidu

¹ SIÑOR mostra fabur pa Sara suma ki falaba, i fasi Sara ki kusa ki kontalba.

² Sara preña, i da Abraon un fiju na si bejisa, na tempu markadu ku Deus falalba.

³ Ki fiju ku Sara padi ku el, Abraon pul nomi di Isak, ku signifika kuma i ta ri.

⁴ Oca si fiju Isak teneba oitu dia, Abraon sirkunsidal suma ku Deus mandalba.

⁵ Abraon teneba sen anu di idadi oca ku si fiju Isak padidu.

⁶ Sara fala: “Deus fasin ri. Tudu kil ku obi e kusa i na ri ku mi.”

⁷ I torna fala: “Kin ku pudiba fala Abraon kuma Sara na mamantaba fiju? Ma N padil un fiju na si bejisa.”

Agar ku Ismael

⁸ Mininu kirsi, i tiradu na mama. Na ki dia ki tiradu na mama, Abraon fasi garandi festa.

⁹ Sara oja fiju ku Agar di Ejitu padiba ku Abraon na fasi trosa.

¹⁰ I fala Abraon: “Pui fora e katibu ku si fiju, pabia fiju de katibu ka na yarda ku ña fiju Isak.”

¹¹ E palabra ka sabi Abraon pabia di si fiju Ismael,

¹² ma Deus falal: “Ka bu fika ku kasabi aserka di rapas ku bu katibu. Obi tudu ke ku Sara na falau, pabia i na Isak ku bu jorson na kontadu.

¹³ Ma N na fasi tambi fiju di katibu pa i sedu un nason, pabia el i bu fiju.”

¹⁴ Abraon lanta mandrugada, i toma pon, ku un garafa di yagu, i da Agar. I pui elis na si ombra, i dispidil, tudu ku mininu. Agar pega kamiñu, i yanda-yanda na lala di Berseba.

¹⁵ Oca ku yagu kaba na garafa, i sintanda mininu bas di un arvuri.

¹⁶ I bai, i sinta lunju un bokadu, suma un tiru di mansasa, pabia i fala: “N ka pudi oja mininu na muri.” I sinta la na ki kau, i kumsa na cora.

¹⁷ Deus obi fála di mininu. Anju di Deus la na seu i coma Agar, i puntal: “Agar, ke ku teneu? Ka bu ten medu, pabia Deus obi fála di rapas desdi kau nunde ki sta.

¹⁸ Lanta, bu bai lantanda rapas, bu pegal na mon, pabia ku el N na fasi un garandi nason.”

¹⁹ Deus yabri Agar uju, i oja un fonti di yagu. I bai, i inci si garafa di yagu, i da rapas pa i bibi.

²⁰ Deus staba ku rapas; i kirsi, i mora na lala, i bin sedu montiadur ku mansasa.

²¹ I mora na lala di Paran; si mame buskal minjer di Ejitu.

Abimelek fasi kontratu ku Abraon

²² Na ki tempu, Abimelek ku Fikol, ŝef di si tropas, e fala Abraon: “Deus ta sta ku bo na tudu ku bu ta fasi.

²³ Asin, jurmentan, na nomi di Deus, ku bu ka na nganan, ami nin ña fiju nin ña netu. Suma ku N fasiu ben, bu ta fasin ben tambi, ku ña tera ku bu bin mora nel.”

²⁴ Abraon falal: “N na jurmenta.”

²⁵ Dipus Abraon keŝa Abimelek pabia di un fonti di yagu ku servus di Abimelek robaba ku forsa.

²⁶ Abimelek falal: “N ka sibi kin ku fasi e kusa. Bu ka kontan; N kumsa na obil nan aos.”

²⁷ Abraon toma karnelis ku bakas, i da Abimelek; e fasi kontratu.

²⁸ Abraon pui aparti seti karnelsiñu femia di si koral.

²⁹ Abimelek punta Abraon: “Pabia di ke ku e seti karnelsiñu pudu aparti?”

³⁰ I ruspundi i falal: “Toma e seti karnelsiñu femia na ña mon, pa e sirbi di tustumuñu kuma ami ku koba e fonti.”

³¹ E ku manda ki kau comadu Berseba, pabia i la ke jurmentaba nel.

³² Oca ke kaba fasi kontratu na Berseba, Abimelek lanta, ku Fikol, ŝef di si tropas, e riba pa tera di filisteus.

³³ Abraon paranta un pe di tamarisk na Berseba, i coma nomi di SIÑOR la, ku sedu Deus ku ka ten kumsada nin kabantada.

³⁴ Abraon kontinua mora na tera di filisteus pa manga di tempu.