Kumsada 2 - BIBLIA - traduson antigu in Krioulo

¹ Asin seu ku tera, ku tudu ki kusas ciu ku staba nelis, e kaba fasidu.

² Oca ku Deus kaba fasi si tarbaju, na setimu dia i diskansa di tudu ki na fasiba.

³ Deus bensua setimu dia, i pul un dia aparti, pabia na ki dia i diskansa di tudu ki tarbaju di kumpu kusas.

Jardin di Eden

⁴ Asin ki kontisi oca seu ku tera kumpudu. Oca SIÑOR Deus kumpu tera ku seu,

⁵ planta ka tenba inda na tera, nin paja ka nasiba inda, pabia SIÑOR Deus i ka mandaba inda cuba riba di tera, nin i ka tenba omi ku na labra con,

⁶ ma serenu ta lantaba na con, i ta regua tudu tera.

⁷ SIÑOR Deus bin kumpu omi ku reia di con, i supral na si naris, i da folgu di vida. Omi bin sedu kriatura bibu.

⁸ SIÑOR Deus fasi jardin na tera comadu Eden na saida di sol, i toma omi ki kumpuba, i pul la.

⁹ SIÑOR Deus fasi pa arvuris nasi na tera, ku bonitu ba pa oja, i bon pa kume. Arvuri ku ta da vida staba na metadi di jardin, ku arvuri ku ta da kuñisimentu di ben ku mal.

¹⁰ Un riu sai na Eden pa regua jardin. I bin rapati, i torna na kuatru riu pikininu.

¹¹ Nomi di ki purmeru riu i Pison. Es i ta rodia tudu tera di Avilá, nunde ki ten uru.

¹² Uru di ki tera i bon. I ten la tambi purfumu ku pedra di balur comadu sardonika.

¹³ Nomi di sugundu riu i Jion. E riu i ta rodia tudu tera di Kus.

¹⁴ Nomi di terseru riu i Tigri. Es ta bai pa Asiria na ladu di saida di sol. Nomi di kuartu riu i Eufrates.

¹⁵ SIÑOR Deus toma omi, i pul na jardin di Eden pa i labral, i toma konta del.

¹⁶ SIÑOR Deus da omi ordi, i falal: “Bu sta libri pa kume fruta di tudu arvuri ku sta na jardin,

¹⁷ ma arvuri ku ta da kuñisimentu di ben ku mal, ka bu kumel, pabia dia ku bu kumel, bu na muri.”

Deus kumpu minjer

¹⁸ SIÑOR Deus fala: “I ka bon pa omi fika el son. N na kumpul un algin ku na judal, pa i sedu si kumpañer.”

¹⁹ Oca ku SIÑOR Deus toma reia, i kumpu tudu limarias di matu, ku tudu kacus di seu, i leba elis pa Adon, pa jubi kuma ku Adon na coma elis. Tudu ki limarias bibu ku Adon coma se nomi, e fika ku ki nomi.

²⁰ Asin Adon pui nomi na tudu limarias di kasa, ku kacus di seu, ku limarias di matu. Ma omi ka teneba kin ku na judal, pa i sedu si kumpañer.

²¹ Asin SIÑOR Deus pui omi pasa ku sonu, i tira un os di si kostela, i fica karni na ki kau.

²² Ku ki kostela ku SIÑOR Deus tiraba di omi, i kumpu minjer, i lebal pa Adon.

²³ Adon fala: “Es gosi i os di ña os, karni di ña karni. I na comadu minjer pabia i tiradu di omi.”

²⁴ Pabia di kila, omi ten ku disa si pape ku si mame, i junta ku si minjer; elis dus e ta sedu un kurpu son.

²⁵ Elis dus e staba nun, omi ku si minjer; nin e ka burguñu.