Kumsada 16 - BIBLIA - traduson antigu in Krioulo

Agar ku Ismael

¹ Sarai, minjer di Abron, i ka padiba nin un fiju ku el. I teneba un minjer katibu di Ejitu, comadu Agar.

^2-3 Oca ku Abron kompleta des anu ki mora na tera di Kanaan, Sarai falal: “SIÑOR tujin padi fiju. Bai bu dita ku ña katibu; talves i pudi padi fiju na ña konta.” Abron obi kil ku Sarai falal. Asin, Sarai, si minjer, toma Agar, si katibu di Ejitu, i da si omi el pa i sedu si minjer.

⁴ Abron dita ku Agar; kila preña. Oca ki sibi kuma i preña, i kumsa njuti si siñora.

⁵ Sarai fala Abron: “I bu kulpa ku N na sufri asin. N pui ña katibu na bu mon; jubi gosi, manera ki preña, i na njutin! SIÑOR i na julga entri mi ku bo.”

⁶ Abron falal: “Ali bu katibu, i sta na bu mon. Fasil kil ku bu oja i bon.” Sarai kastiga Agar; kila kuri del.

⁷ Anju di SIÑOR ojal lungu di fonti di yagu na lala, na kamiñu di Sur.

⁸ I falal: “Agar, katibu di Sarai, di nunde ku bu bin; pa nunde ku bu na bai?” I falal: “N na kuri di Sarai, ña siñora.”

⁹ Anju di SIÑOR falal: “Riba pa bu siñora, bu baŝa bu kabesa bas di si mon.”

¹⁰ Anju torna falal: “N na buri bu jorson; e na ciu tok e ka na pudi kontadu.”

¹¹ Anju di SIÑOR torna fala mas: “Jubi, bu preña, bu na padi un fiju, bu na comal nomi di Ismael, pabia SIÑOR obi di bu kasabi.

¹² I na sedu omi brabu; si mon na sta kontra tudu jinti, mon di tudu jinti kontra el. I na mora lunju di tudu si ermons.”

¹³ Agar coma nomi di SIÑOR ku falaba ku el “Abo i Deus di vista”, pabia i punta: “Nta N ka oja ki algin ku na ojan?”

¹⁴ Pabia di kila ki fonti i comadu Ber Laai Roi, ku signifika fonti di ki algin bibu ku ta ojan. I sta na metadi di Kades ku Bered.

¹⁵ Agar padi un fiju ku Abron. Abron coma nomi di fiju ki padiba ku Agar Ismael.

¹⁶ Abron staba na idadi di oitenta i seis anu oca Agar padi Ismael.