Kumsada 15 - BIBLIA - traduson antigu in Krioulo

Deus fasi kontratu ku Abron

¹ Dipus de kusas tudu pasa, SIÑOR bin papia ku Abron na vison, i falal: “Abron, ka bu ten medu. Ami i bu tajadera; N sedu bu garandi premiu.”

² Abron falal: “SIÑOR Deus, ke ku bu pudi dan? Ali N na yanda sin fiju. Kil ku na yarda ña kusas i Eliezer di Damasku.”

³ Abron fala mas: “Bu ka dan fijus. Un algin padidu na ña kasa, el ku na yardan.”

⁴ SIÑOR bin papia ku Abron, i falal: “Es omi ka na sedu bu yardadur, ma fiju ku na bin sai na bu propi kurpu, el ku na sedu bu yardadur.”

⁵ I lebal pa fora, i falal: “Jubi pa seu, bu fasi konta di strelas, si kontra bu pudi konta elis.” I rabida, i falal: “Asin ku bu jorson na sedu.”

⁶ Abron fia na SIÑOR; si fiansa pui Deus i ojal justu.

⁷ SIÑOR falal mas: “Ami i SIÑOR ku tirau na Ur na tera di kaldeus, pa dau e tera pa bu yarda.”

⁸ Abron punta: “SIÑOR Deus, kuma ku N pudi sibi si N na bin yardal?”

⁹ Deus falal: “Toma un baka di tris anu, un kabra di tris anu, un karnel macu di tris anu, un pumba di kasa ku un pumba di matu.”

¹⁰ Abron lebal tudu e kusas, i rapati kada un na metadi, i filanta elis dianti di ŋutru, ma i ka rapati pumbas.

¹¹ Utru kacus na riaba riba di ki difuntus; Abron fika i na serka elis.

¹² Oca sol na kai, Abron pasa ku sonu; sukuru kai riba del, i panta.

¹³ SIÑOR falal: “Bu pudi sibi sertu kuma bu jorson na bai sedu stranjeru na un tera ki ka di selis. E na sedu katibu, e na kastigadu kuatrusentus anu.

¹⁴ Ami tambi N na julga ki pobu ku tene elis na katiberasku. Dipus e na sai ku garandi rikesa.

¹⁵ Ma abo, bu na muri, bu bai pa bu papes ku pas, bu na nteradu ku bon bejisa.

¹⁶ Bu kuartu jorson na ribantadu pa li, pabia N ka na tira amoreus fora tementi se pekadu ka kaba inci si midida.”

¹⁷ Oca sol kai, kau sukuruba ja, i ojadu un furnu di fumu ku pacu di fugu ku na pasaba na metadi di ki karnis.

¹⁸ Na ki mesmu dia, SIÑOR fasi kontratu ku Abron, nunde ki falal: “N da bu jorson e tera disna di riu di Ejitu te na garandi riu Eufrates,

¹⁹ tera di keneus, kenezeus, kadmoneus,

²⁰ eteus, perizeus, refains,

²¹ amoreus, kananeus, jirgaseus ku jebuseus.”