Kumsada 13 - BIBLIA - traduson antigu in Krioulo

Abron ku Lo rapati

¹ Abron sai na Ejitu, i bai pa sul di Kanaan, el ku si minjer ku tudu kusas ki teneba. Lo bai ku el tambi.

² Abron tornaba ja riku dimas na limaria di kasa, na prata ku uru.

³ I sai na ladu di sul, i yanda di un lugar pa utru, tok i ciga na Betel. I pasa pa ki kau na metadi di Betel ku Ai, nunde ku na kumsada i yarmaba si tenda,

⁴ i kumpu un altar. I coma nomi di SIÑOR la.

⁵ Tambi Lo, ku ta baiba ku Abron, i teneba manga di karnel ku bakas ku tendas.

⁶ Tera ka pudiba sustenta elis tudu juntu, pabia se limarias ciu ba, tok e ka pudiba fika juntu.

⁷ I tenba jus na metadi di bakiaduris di Abron ku bakiaduris di Lo. Kananeus ku perizeus e moraba tambi na tera na ki tempu.

⁸ Abron fala Lo: “I ka dibi di ten jus na no metadi, nin na metadi di no bakiaduris, pabia anos i ermons.

⁹ Nta tudu tera ka sta bu dianti? No rapati; si bu bai pa mon skerda, ami N na bai pa mon direita; si bu bai pa mon direita, ami N na bai pa mon skerda.”

¹⁰ Lo yalsa rostu, i jubi pa bulañas di Jordon, te na prasa di Zoar, i ojal ben reguadu suma jardin di SIÑOR, o suma tera di Ejitu. (Es i seduba antis di SIÑOR kaba ku tera di Sodoma ku Gomora.)

¹¹ Lo kuji pa si kabesa tudu ki bulañas di Jordon; i pega si kamiñu, i bai pa ladu di saida di sol. Asin e rapati ku ŋutru.

¹² Abron mora na tera di Kanaan; Lo mora na metadi di prasas di bulaña, i yarma si tenda pertu di Sodoma.

¹³ Omis di Sodoma seduba mau, e ta fasiba pekadu ciu kontra SIÑOR.

¹⁴ Dipus di Lo rapati ku Abron, SIÑOR fala Abron: “Yalsa uju, bu jubi disna di kau nunde ku bu sta nel, pa ladu di norti, di sul, di saida di sol ku si kaida.

¹⁵ Tudu tera ku bu na oja, N na dau el, abo ku bu jorson pa sempri.

¹⁶ N na fasi bu jorson suma reia, manera ku, si algin pudi fasi konta di reia, asin tambi i pudi fasi konta di bu jorson.

¹⁷ Lanta, bu bai pa tudu ladu di tera, pabia N na dau el.”

¹⁸ Abron disarma si tenda, i bai mora pertu di pes di karvaju di Manre, na prasa di Ebron. I kumpu un altar la pa SIÑOR.