Kumsada 12 - BIBLIA - traduson antigu in Krioulo

Deus coma Abron

¹ SIÑOR fala Abron: “Sai na bu tera, na metadi di bu parentis, na kasa di bu pape, bu bai pa un tera ku N na mostrau.

² N na fasiu un garandi nason, N na bensuau, N na fasi bu nomi pa i sedu garandi; bu na sedu un benson.

³ N na bensua kilis ku bensuau. N na maldisua kilis ku maldisuau. Tudu rasas na mundu na sortiadu pabia di bo.”

⁴ Asin Abron sai, suma ku SIÑOR falal. Lo bai ku el. Abron teneba setenta i sinku anu oca ki sai na Aran.

⁵ I leba si minjer, Sarai, ku si subriñu Lo, ku tudu rikesas ke juntaba, ku katibus ke ranja na Aran. E sai pa bai pa tera di Kanaan, e ciga la.

⁶ Abron pasa na metadi di tera, i ciga na lugar sagradu di Siken, na pe di karvaju di Moré. Na ki tempu kananeus staba na tera.

⁷ SIÑOR bin pa Abron i falal: “N na da e tera pa bu jorson.” Abron kumpu la un altar pa SIÑOR ku binba pa el.

⁸ Di la i bai dianti pa monti na ladu di Betel na saida di sol, i yarma si tenda. Betel staba na ladu di kaida di sol; Ai staba na ladu di saida di sol. I kumpu tambi un altar la pa SIÑOR, i coma nomi di SIÑOR.

⁹ Dipus Abron pega kamiñu mas, i fika i na bai puku puku pa ladu di sul.

Abron bai pa Ejitu

¹⁰ Na ki tera i tenba fomi. Abron bai pa Ejitu pa pasa tempu la, pabia di ki garandi fomi.

¹¹ Oca ki pertuba ja Ejitu, i fala si minjer Sarai: “N sibi kuma abo i minjer bonitu.

¹² Ora ku omis di Ejitu ojau e na fala: ‘Es i si minjer.’ Dipus e na matan, ma e na disau ku vida.

¹³ Ba ta fala kuma abo i ña irma, pa kusas pudi kurin diritu pabia di bo; pa e pudi disan ku vida.”

¹⁴ Oca ku Abron yentra na Ejitu, omis di la oja minjer, manera ki bonitu dimas.

¹⁵ Ŝefis di Faraó, ku sedu rei di Ejitu, e ojal, e ngabal dianti di Faraó. Minjer lebadu pa kasa di Faraó.

¹⁶ Faraó trata Abron diritu pabia del. Asin Abron ngaña karnelis ku bakas, ku burus macu ku femia, ku kamelus ku katibus macu ku femia.

¹⁷ SIÑOR manda garandi duensas riba di Faraó ku jinti di si kasa pabia di Sarai, minjer di Abron.

¹⁸ Asin Faraó coma Abron, i puntal: “Es i ke ku bu fasin? Ke ku manda bu ka falan kuma i bu minjer?

¹⁹ Pabia di ke ku bu fala kuma i bu irma, tok N tomal pa ña minjer? Gosi, ali bu minjer; tomal, bu bai!”

²⁰ Faraó da ordi pa si omis aserka di Abron. E tiral pa fora di tera, ku si minjer, ku tudu ki teneba.