Kumsada 11 - BIBLIA - traduson antigu in Krioulo

Kunfuson di linguas

¹ Jinti di tudu mundu teneba un lingua son, e ta papiaba di mesmu manera.

² Oca ku omis na bai pa ladu di saida di sol, e oja un kau ku ka tene montaña, na tera di Babilonia, e mora la.

³ E fala ŋutru: “No kumpu tiẑolus, no kema elis diritu.” E usa tiẑolu na lugar di pedra, alkatron na lugar di kal.

⁴ E fala ŋutru: “No kumpu un prasa garandi pa nos, ku kasa kumpridu ku na toka na seu. No ta ranja nomi pa no ka pudi pajigadu pa tudu mundu.”

⁵ SIÑOR disi pa jubi prasa ku kasa kumpridu ku omis na kumpuba.

⁶ SIÑOR fala: “E pobu i un son; e tene mesmu lingua. Jubi gora ke ke kumsa na fasi! Pa dianti, tudu ke misti fasi, e na pudi fasil.

⁷ No disi, no kunfundi elis lingua, pa ka e pudi ntindi ŋutru.”

⁸ Asin SIÑOR pajiga elis di ki kau pa tudu mundu. E para kumpu ki prasa.

⁹ E ku manda e pui ki kau nomi di Babel, pabia la ku SIÑOR kunfundi lingua di jinti di tudu tera. I di la ku SIÑOR pajiga elis pa tudu mundu.

Jorson di Sen

¹⁰ Es i jorson di Sen. Dus anu dipus di diluviu, oca ku Sen teneba idadi di 100 anu, i padi Arfasad.

¹¹ Dipus di padi Arfasad, Sen vivi 500 anu, i padi fijus macu ku femia.

¹² Arfasad vivi 35 anu, i padi Salá.

¹³ Dipus di padi Salá, i vivi 403 anu, i padi fijus macu ku femia.

¹⁴ Salá vivi 30 anu, i padi Eber.

¹⁵ Dipus di padi Eber, i vivi 403 anu; i padi fijus macu ku femia.

¹⁶ Eber vivi 34 anu, i padi Peleg.

¹⁷ Dipus di padi Peleg, i vivi 430 anu; i padi fijus macu ku femia.

¹⁸ Peleg vivi 30 anu, i padi Reú.

¹⁹ Dipus di padi Reú, i vivi 209 anu; i padi fijus macu ku femia.

²⁰ Reú vivi 32 anu, i padi Serug.

²¹ Dipus di padi Serug, Reú vivi 207 anu; i padi fijus macu ku femia.

²² Serug vivi 30 anu, i padi Naor.

²³ Dipus di padi Naor, Serug vivi 200 anu; i padi fijus macu ku femia.

²⁴ Naor vivi 29 anu, i padi Tera.

²⁵ Dipus di padi Tera, Naor vivi 119 anu, i padi fijus macu ku femia.

²⁶ Tera vivi 70 anu, i padi Abron, Naor ku Aran.

²⁷ Es i jorson di Tera. Tera padi Abron, Naor ku Aran. Aran padi Lo.

²⁸ Oca ku si pape Tera staba inda bibu, Aran muri na tera nunde ki padidu, comadu Ur na tera di Babilonia.

²⁹ Abron ku Naor e kasa. Nomi di minjer di Abron i comadu Sarai. Nomi di minjer di Naor i comadu Milka, ku seduba fiju femia di Aran, pape di Milka ku Iská.

³⁰ Sarai ka teneba fiju, pabia i seba.

³¹ Tera toma si fiju Abron, si netu Lo ku sedu fiju di Aran, ku Sarai, minjer di si fiju Abron, i sai ku elis di Ur di tera di Babilonia, pa bai pa tera di Kanaan. E bin te na Aran, e mora la.

³² Tudu vida di Tera sedu 205 anu; i muri na Aran.