Kolosensis 4 - BIBLIA - traduson antigu in Krioulo

¹ Abos, mestres, bo trata bo katibus na manera justu i bon. Bo lembra kuma bo tene tambi un Mestre na seu.

Ordis

² Bo pega tesu na orason; bo yabri sintidu nel pa bisia; bo fala Deus obrigadu.

³ Bo ora tambi pa nos, pa Deus pudi yabrinu porta pa no konta si palabra, tambi no fala di sigridu di Kristu. I pabia de palabra ku manda N sta prezu.

⁴ Bo ta ora pa N pudi fala e sigridu klaru, suma ku N dibi di falal.

⁵ Bo yanda na jiresa ku kilis ku ka sedu krenti, bo purbita kada oportunidadi ku bo ten.

⁶ Bo kombersa dibi di sabi, ku ta da gustu pa obi, pa bo sibi kuma ku bo dibi di ruspundi kada un.

Manteña di kabantada

⁷ No ermon amadu, Tíkiku, fiel tarbajadur ku sta juntu ku mi na tarbaju di Siñor, i na konta bos kuma ku N sta.

⁸ I pa e fin ku N na mandal nunde bos, pa bo sibi no stadu, pa i da bos animu.

⁹ No fiel ermon amadu, Onésimu, ki un di bos, i na bai juntu ku el. E na da bos noba di tudu ku na pasa li.

¹⁰ Aristarku, ku sta prezu juntu ku mi, manda bos manteña, ku Markus tambi, parenti di Barnabé, ku N mandaba konta bos aserka del, pa bo risibil si i bai nunde bos.

¹¹ Jesus ku comadu Justu manda bos manteña. Di krentis judeu, esis i uniku ku ta tarbaja ku mi pa renu di Deus. E sedu garandi ajuda pa mi.

¹² Manteña di Epafras, utru membru di bo grupu, ki servu di Kristu, ku sempri i ta luta pa bos na orason, pa bo pudi fika firmi, bo sedu maduru na fe, bo fasi sempri tudu ku Deus misti.

¹³ N pudi testifika del kuma ki tarbaja ku tudu vontadi pa bos, ku kilis tambi ku sta na Laodiseia, ku kilis di Ierápolis.

¹⁴ Manteña di Lukas, no mediku ku no ama, ku Demas.

¹⁵ Bo da no manteña pa ermons ku sta na Laodiseia, pa Ninfa ku igreẑa ku sta na si kasa.

¹⁶ Dipus ku e karta leidu na bo metadi, bo fasi pa i leidu tambi na igreẑa di Laodiseia. Abos tambi bo ten ku lei karta ku na sai di Laodiseia.

¹⁷ Bo fala Arkipu pa i pui sintidu pa kabanta tarbaju ki dadu na sirvis di Siñor.

¹⁸ I ami ku na skirbi es ku ña mon: Manteña di mi Paulu. Bo lembra kuma N sta prezu. Fabur di Deus ta sta ku bos. Amen.