Kolosensis 3 - BIBLIA - traduson antigu in Krioulo

¹ Bo lantandadu pa vida juntu ku Kristu. Asin bo pui sintidu na kusas ku sta na seu, nunde ku Kristu sinta na direita di Deus.

² Bo guarda bo pensamentu na kusas di seu; i ka na kusas di tera,

³ pabia bo muri; bo vida sta sukundidu ku Kristu na Deus.

⁴ Kristu, ku sedu no vida, ora ki parsi, bo na parsi juntu ku el; bo na ten parti na si gloria.

Vida beju ku vida nobu

⁵ Bo mata ki partis na bos ku sedu di tera, suma pekadu seksual, susidadi, diseẑu mau, vontadi forti pa mal, ku risu mon (ku sedu suma adora idulu).

⁶ Pabia di kusas suma es, raiba di Deus na bin riba di jinti ku ka ta obdisil.

⁷ I e kusas ku bo ta yandaba nel na tempu ku pasa, oca bo ta viviba nel.

⁸ Gosi bo ten ku tira tudu e kusa fora, suma raiba, mau jeniu, ku maña. Koba mal ku palabra fiu e ka dibi di sai na bo boka.

⁹ Ka bo konta palabra di mintida pa ŋutru, pabia bo dispi ja naturesa beju ku si kustumus,

¹⁰ bo bisti ja naturesa nobu ku na arnobadu sempri na parsensa di kil ku kumpul; bo na lebadu pa kunsi Deus diritu.

¹¹ Ali i ka ten separason entri gregu ku judeu, entri kil ku sirkunsidadu ku kil ku ka sirkunsidadu, entri stranjeru ku jintiu brabu, entri katibu ku libri, ma Kristu i tudu; i sta na tudu.

¹² Bo sedu pobu di Deus; i ama bos, i kuji bos pa bo sedu di sil. Asin bo ten ku bisti un korson di miserikordia, bondadi, umildadi, mansesa ku pasensa.

¹³ Bo nguenta ŋutru, bo purda ŋutru si algin ten keŝa kontra utru; suma ku Siñor purda bos, bo fasi asin tambi.

¹⁴ Riba di tudu e kusa bo buri amor ku ta liga tudu kusa pa forma unidadi kompletu.

¹⁵ Pas ku Kristu da, pa i manda na bo korson. I pa e pas ku Deus coma bos tudu juntu na un kurpu. N misti tambi pa bo korson inci gardisimentu.

¹⁶ Bo disa palabra di Kristu fika na bo korson, na si rikesa, ku tudu jiresa. Bo nsina, bo konsija ŋutru, bo kanta salmus, inus ku kantigas spiritual, bo kanta pa Deus ku gardisimentu na bo korson.

¹⁷ Tudu ku bo fasi, palabra o tarbaju, bo fasil na nomi di Siñor Jesus; bo fala Deus no Pape obrigadu na si nomi.

Vida di familia

¹⁸ Abos minjeris, bo baŝa pa bo omis, suma ku algin di Siñor dibi di fasi.

¹⁹ Abos omis, kada kin ama si minjer; ka bo sedu brabu pa elis.

²⁰ Abos fijus, bo obdisi bo pape ku bo mame na tudu, pabia i es ku Siñor ta kontenti ku el.

²¹ Abos papes, ka bo irita bo fijus, pa ka e fika disanimadu.

²² Abos katibus, bo obdisi bo mestres na tera na tudu kusa. I ka son na se rostu pa pui elis pa e kontenti ku bos, ma bo fasil ku limpu korson, ku rispitu pa Siñor.

²³ Tudu ku bo na fasi, bo fasil di tudu bo korson, suma ku bo na fasi pa Siñor; i ka pa omi.

²⁴ Bo lembra kuma Siñor na paga bos ku ki kusa ki rakada pa si pobu, pabia i Kristu ki Mestre ku bo na sirbi.

²⁵ Kada algin ku fasi mal i na pagadu mal ki fasi, pabia Deus ka ta fasi diferensa di jinti.