Kolosensis 2 - BIBLIA - traduson antigu in Krioulo

¹ N misti pa bo sibi garandi mpeñu ku N ten pa bos, ku kilis di Laodiseia, ku tudu kilis ku ka ciga di ojan inda,

² pa se korson pudi inci di bon animu, pa e sedu unidu na amor, pa e rikusidu na garandi ntindimentu, pa e ten tudu kuñisimentu di sigridu di Deus. E sigridu i Kristu propi,

³ ku tudu rikesa di jiresa ku kuñisimentu sta sukundidu nel.

⁴ N fala asin pa ka ningin ngana bos ku palabra falsu, nin ki parsi bon palabra,

⁵ pabia, nin ku N ka sta ku bos na kurpu, ma N sta na spiritu ku bos. N kontenti pa N oja kuma ku bo forma ku ordi ku firmesa na bo fe na Kristu.

Vida firmi na Kristu

⁶ Manera ku bo risibi Kristu Jesus suma Siñor, asin ku bo ten ku yanda unidu ku el.

⁷ Bo pui bo rais fundu nel, bo kumpu bo vida riba del, bo fika mas forti na fe, suma ku bo nsinadu, bo inci bo korson di gardisimentu.

⁸ Bo toma sintidu pa ka ningin fasi bos prezu ku si ideias di nganu ku ka ten balur, ku bin di nsinamentu ku omi ta pasanta pa si fiju, ku fiju di si fiju, ku bin tambi di nsinamentu di mundu, ma i ka bin di Kristu.

⁹ Tudu ku Deus sedu i sta na Kristu, na si kurpu umanu.

¹⁰ Abos, suma ku bo sta ligadu ku el, bo sta kompletu. I el ku sta riba di tudu gubernu ku otridadi di ar.

¹¹ Na bo union ku Kristu bo sirkunsidadu; i ka ku mon di omi na kurpu, ma i sirkunsison di Kristu, pa liberta di naturesa di karni.

¹² Na batismu bo nteradu ku el; tambi bo lantandadu ku el pabia di bo fe na puder di Deus ku lantandal di mortu.

¹³ Bo staba mortu pabia di bo pekadu, tambi pabia bo seduba jintius ku ka ta sigi lei di Moisés, ma Deus vivifika bos juntu ku Kristu. I purdanu tudu no pekadu,

¹⁴ i riska dibida ku skirbiduba kontra nos, ku regras ku na kansanuba; i tomal, i pregal na krus.

¹⁵ Na mesmu krus i dispi gubernu ku otridadi di ar se puder, i fasi elis spetakulu dianti di jinti; i leba elis katibu na vitoria di Kristu.

¹⁶ Ka bo disa ningin julga bos pabia di kume o bibi, o pabia di dia sagradu, lua nobu, o dia di diskansu.

¹⁷ E kusas seduba sombra di kil ku na bin. Kurpu di ki sombra i Kristu.

¹⁸ Ka bo seta kondenason di jinti ku ta misti julga bos, ku ta finji umildi, ku ta adora anjus, ku ta fala kuma e oja vison. Ki jinti sta incadu amonton pa se ntindimentu di se propi kabesa,

¹⁹ e larga Kristu ku sedu kabesa. Bas di kabesa, kurpu tudu i ta alimentadu. Juntas ku ligamentus e ta ligal na un son, pa i kirsi suma ku Deus misti.

Muri ku Kristu pa vivi ku el

²⁰ Si bo muri ja ku Kristu, bo sta libri di nsinamentu di mundu, ke ku manda bo na yanda inda suma bo sta na mundu? Ke ku manda bo na obdisi ordi di kilis ku na fala bos:

²¹ “Ka bo toka! Ka bo purba! Ka bo pui mon!”?

²² Tudu e kusas ten ku kaba ora ki usadu. I son nsinamentu ku ordi di omi.

²³ I pudi parsi kusa di jiresa, ku si adorason di forsa di vontadi, ku umildadi finjidu, ku disiplina forti di kurpu, ma i ka ten nin balur pa kombati kontra diseẑu di karni.