Judas 1 - BIBLIA - traduson antigu in Krioulo

Kumsada ku manteña

¹ Ami Judas, servu di Jesus Kristu, ermon di Tiagu, N na skirbi pa kilis ku Deus coma, ku vivi na amor di Deus no Pape, ku Jesus Kristu ta guarda suguru.

² N misti pa Deus buri si miserikordia ku pas ku amor riba di bos.

Pursoris falsu

³ Amadu ermons, oca N na buska pa skirbi bos aserka di salbason ku no junta, N sinti garandi nesesidadi di skirbi bos logu, pa da un avisu forti pa bo pega tesu na luta pa fe ku Deus ntrega si pobu un bias pa sempri.

⁴ Utru jinti ku nega Deus e ranja-ranja manera di yentra, e tursi palabra ku konta aserka di fabur di no Deus, pa i sedu diskulpa di se mau vida; e nega Jesus Kristu, kil son ku ta manda, ku sedu no Siñor. Disna, Skritura jumna konta e kondenason ke sta nel.

⁵ N sibi kuma bo sibi e kusas, ma N misti lembranta bos kuma, oca Siñor liberta pobu di Israel, i tira elis na tera di Ejitu. Mas tardi, i kaba ku kilis ku ka fiaba.

⁶ Suma tambi anjus ku ka fika dentru di otridadi ke dadu, ma e nega se propi lugar, Deus rakada elis bas di sukuru, maradu pa sempri ku korenti, pa e julgadu na ki garandi dia.

⁷ Bo lembra tambi di Sodoma ku Gomora, ku prasas ku pertu elis. Jinti di la e fasi suma ki anjus, e yanda na vida susu, e torkia usu di seksu, e sufri kastigu di fugu ntidu, pa sedu avisu pa utru jinti.

⁸ Na mesmu manera tambi, e jinti e ta tene suñu ku ta leba elis pa e dana se kurpu ku pekadu; e ta nega fika bas di otridadi; e ta koba anjus di seu.

⁹ Ŝef di anjus propi, Migel, oca ki na diskuti ku diabu, e na junda-junda pabia di kurpu di Moisés, i ka osa fala palabra mau pa kondenal, ma i falal: “Siñor ta raprindiu.”

¹⁰ Ma e jinti e ta tene palabra mau di kusas ke ka ntindi. I ten utru kusas ke ta ntindi suma ku limaria ku ka ta kuda ta ntindi. I e kusas propi ku ta dana elis.

¹¹ Koitadi delis! E bai na kamiñu ku Kain bai. Pa amor di diñeru e murguja na eru suma Balaon. E rafila suma Koré; e pirdi suma el.

¹² E jinti i manca na bo festa di amor. Ora ke na kume ku bos, e ka ta ten rispitu; e sedu bakiaduris ku ta bakia son se kabesa; i suma nuven ku bentu ta leba di un ladu pa utru, ku ka ta cubi; suma po ku ka ta padi na si tempu, i rinkadu tudu ku si rais, i muri un bias.

¹³ E sta suma maron di mar brabu ku na sukuma si susidadi di borgoña, o suma strela ku yara i na kurkuri. Deus separa un lugar di garandi sukuru pa elis pa sempri.

¹⁴ Enok tambi, ki di seti jorson dipus di Adon, i anunsia aserka de jinti, i fala: “Bo jubi, Siñor na bin ku milyaris di si santus,

¹⁵ pa julga tudu jinti, pa kondena kilis ku nega Deus pa kusas mau ke fasi sin mporta ku Deus, ku tudu se palabra duru ke fala kontra el.”

¹⁶ E jinti ruidur e ciu keŝasiñu; e ta yanda konformi se diseẑu mau. Palabras di garandesa ta sai na se boka. E ta bari utru jinti paja pa se interes.

¹⁷ Kiridu ermons, bo lembra palabras ku apostolus di no Siñor Jesus Kristu konta bos disna.

¹⁸ E fala bos kuma, na kabantada de tempu, i na ten jinti fasiduris di trosa, ku na yanda konformi se diseẑu mau, sin mporta ku Deus.

¹⁹ I esis ku ta tisi rapatimentu na metadi di jinti. E ta sigi son vontadi di se kabesa; e ka tene Spiritu di Deus.

Konsiju

²⁰ Ma abos, amadus, bo fortifika bo vida riba di bo fe ki puru dimas. Bo ba ta ora na Spiritu Santu.

²¹ Bo fika sempri dentru di amor di Deus, nkuantu bo na pera no Siñor Jesus Kristu, na si miserikordia, pa i da bos vida ku ka ta kaba.

²² Bo sinti pena di kilis ku sta na duvida.

²³ Bo rabata utrus na fugu, bo salba elis. Bo ten pena di utrus, ma ku medu tambi; bo nuju te ropa mancadu ku pekadu ku kurpu ta dija.

Orason di ngaba Deus

²⁴ Deus ku ten puder pa libra bos di kai, pa leba bos dianti di si pursensa gloriosu, sin kulpa, ku alegria,

²⁵ ki un Deus son, no Salbadur, pa no dal gloria pa meiu di no Siñor Jesus Kristu, no rikuñisil suma Rei ku na manda, ku ten puder, antis di kumsada di tempu, ku gosi, i pa tudu sempri. Amen.