Josué 5 - BIBLIA - traduson antigu in Krioulo

Sirkunsison na Jilgal

¹ Oca ku tudu reis di amoreus ku staba na ladu di Jordon pa kaida di sol, ku tudu reis di kananeus ku staba na kosta di mar, e obi kuma SIÑOR sekaba yagu di Jordon dianti di israelitas, tok no kamba, e panta tok e pirdi koraẑen pabia di Israel.

² Na ki tempu SIÑOR fala Josué: “Kumpu fakas di pedra risu, bu sirkunsida fijus di Israel.”

³ Asin Josué kumpu fakas di pedra risu, i sirkunsida fijus di Israel na ki kau ke coma monti di Sirkunsison.

⁴ Es ku manda i fasi asin: Tudu pobu ku sai na Ejitu, tudu omis ku tene idadi pa geria, e muriba ja na lala, na kamiñu, dipus de sai di Ejitu.

⁵ Tudu jinti ku sai e sirkunsidadu, ma nin un di kilis ku padidu na lala na kamiñu, dipus de sai na Ejitu, i ka sirkunsidadu.

⁶ Israelitas yanda-yandaba na lala korenta anu, tok tudu omis ku teneba idadi di geria oca ke sai di Ejitu muri, suma ke ka obdisi SIÑOR. Pabia SIÑOR jurmentaba elis kuma, i ka na disa elis oja tera ki falaba se papes ku juramentu kuma i na danu, tera riku ku ta pruduzi ciu.

⁷ Asin Deus lantanda se fijus na se lugar; i esis ku Josué sirkunsida. E ka sirkunsidaduba inda, pabia e ka ta sirkunsidaba jinti na kamiñu.

⁸ Dipus di tudu nason sirkunsidadu, e fika na kau ke staba nel tok e san.

⁹ Dipus SIÑOR fala Josué: “Ki disgrasa di Ejitu ku staba riba di bos, aos N rolal, N tiral di bos.” E ku manda ki kau comadu Jilgal te aos.

Festival di Paskua

¹⁰ Oca ku fijus di Israel staba na kampamentu na Jilgal, na kau rasu pertu di Jerikó, e fasi festival di Paskua na dia 14 di mis, kontra sol na noti.

¹¹ Dia dipus di Paskua, na ki mesmu dia, e kume prudutu di tera, ku sedu pon sin fermentu ku garan iladu.

¹² Dia dipus de kume ki kumida, maná para. Fijus di Israel kume prudutu di tera di Kanaan na ki anu; nunka mas e ka oja maná.

Josué oja anju

¹³ Oca ku Josué staba pertu di Jerikó, i yalsa uju, i oja un omi ku firma si dianti, ku teneba si mon na spada ki busi. Josué bai pa el i puntal: “Abo i di nos o di no inimigus?”

¹⁴ I ruspundil: “Nin un nin utru, ma N bin suma kumandanti di tropas di SIÑOR.” Josué mpina ku rostu pa con, i adoral, i puntal: “Ña Siñor, ke ku bu ten pa fala bu servu?”

¹⁵ Kumandanti di tropas di SIÑOR fala Josué: “Tira sapatu na bu pe, pabia kau ku bu sta nel i sagradu.” Josué fasi suma ku anju falal.