Josué 4 - BIBLIA - traduson antigu in Krioulo

Pedras di lembransa

¹ Oca ku tudu pobu kaba kamba Jordon, SIÑOR fala Josué:

² “Kuji dozi omi na metadi di pobu, un di kada jorson,

³ bu fala elis pa e lambu dozi pedra na metadi di Jordon, na kau ku saserdotis firmaba, pa e leba elis pa ditanda elis na kau ku bo na durmi nel aos di noti.”

⁴ Josué coma ki dozi omi ki kuji na fijus di Israel, un di kada jorson,

⁵ i fala elis: “Bo pasa dianti di arka di SIÑOR bo Deus pa metadi di Jordon. Kada un ta lambu un pedra na si ombra konformi numeru di jorsons di Israel,

⁶ pa i sedu suma sinal na bo metadi. Na futuru, ora ku bo fijus punta bos ke ku e pedras signifika,

⁷ bo ta fala elis kuma, yagu di Jordon para kuri dianti di arka di kontratu di SIÑOR. Oca ku arka kamba Jordon, yagu di riu para kuri. E pedras na sedu lembransa pa sempri pa pobu di Israel.”

⁸ Asin fijus di Israel fasi suma ku Josué manda elis. E lambu dozi pedra na metadi di Jordon, konformi numeru di jorsons di Israel, suma ku SIÑOR fala Josué; e leba elis pa kampamentu, e ditanda elis la.

⁹ Josué junta tambi dozi pedra na metadi di Jordon, na kau ku pe di saserdotis ku kargaba arka di kontratu firmaba nel. La ke sta te aos.

¹⁰ Saserdotis ku kargaba arka e firma na metadi di Jordon, tok tudu fasidu ku SIÑOR manda Josué pa i fala pobu, konformi ordi ku Moisés daba ja Josué. Pobu janti e kamba.

¹¹ Oca jinti kamba tudu, arka di SIÑOR ku saserdotis e kamba tambi na uju di ki jinti.

¹² Omis di Ruben, di Gad, ku metadi di jorson di Manasés, yarmadu, e kamba dianti di utru fijus di Israel, suma ku Moisés falaba.

¹³ Serka di korenta mil omi, yarmadu pa gera, e pasa, na pursensa di SIÑOR, pa kau rasu lungu di Jerikó, pruntu pa geria.

¹⁴ Na ki dia SIÑOR garandisi Josué na uju di tudu Israel; e rispital duranti tudu dias di si vida, suma ke rispitaba Moisés.

¹⁵ SIÑOR fala Josué:

¹⁶ “Manda saserdotis ku na karga arka di tustumuñu pa e sai na Jordon.”

¹⁷ Asin Josué manda saserdotis, i fala elis: “Bo sai na Jordon.”

¹⁸ Saserdotis ku karga arka di kontratu di SIÑOR e sai na riu. E pui pe na tera seku son, ki yagu di Jordon torna suma ki staba, tok i na darma.

¹⁹ Na dia 10 di purmeru mis, pobu sai na Jordon, e pui se kampamentu na Jilgal, lungu di Jerikó na ladu di saida di sol.

²⁰ La na Jilgal Josué firmanta ki dozi pedra ke tiraba na metadi di Jordon.

²¹ I fala fijus di Israel: “Na futuru, ora ku bo netus punta se papes ke ku e pedras signifika,

²² bo ta fala elis kuma Israel kamba Jordon na tera seku,

²³ pabia SIÑOR bo Deus fasi yagu di Jordon pa i seku bo dianti tok bo pasa, suma ki seka Mar Burmeju pa nos tok no kamba.

²⁴ I fasi asin pa tudu nasons di mundu sibi kuma mon di SIÑOR i forti, pa bo pudi sempri rispita SIÑOR bo Deus.”