Josué 24 - BIBLIA - traduson antigu in Krioulo

Ultimu palabras di Josué

¹ Dipus Josué junta tudu jorsons di Israel na Siken; i coma garandis di Israel, ku se ŝefis, juisis ku funsionarius. E bin pursenta dianti di Deus.

² Josué fala tudu pobu: “Asin ku SIÑOR Deus di Israel fala: ‘Na tempu antigu, bo papes, suma Tera, pape di Abraon ku Naor, e moraba na utru ladu di riu Eufrates; e ta sirbiba utru deusis,

³ ma N toma bo pape Abraon na ki utru ladu di riu, N fasil pa i yanda pa tudu tera di Kanaan, N buri numeru di si jorson, N dal Isak.

⁴ Pa Isak N da Jakó ku Esaú. N da montaña di Seir pa Esaú pa i sedu di sil, ma Jakó ku si fijus e bai pa Ejitu.

⁵ “‘N bin manda Moisés ku Aron; N kastiga Ejitu (bo sibi ke ku N fasi na se metadi); dipus N tira bos di la.

⁶ Oca ku N tira bo papes na Ejitu, bo bin te na mar; ejipsius serka bo papes ku karus, ku tropas ku ta yanda na kabalu, te na Mar Burmeju.

⁷ E coma SIÑOR pa i juda elis; el i pui sukuru na metadi di bos ku ejipsius; i tisi mar riba delis, i kubri elis. Bo ujus oja ke ku N fasi na Ejitu. Dipus bo mora na lala, bo tarda la.

⁸ “‘N tisi bos pa tera di amoreus ku moraba na utru banda di Jordon. E geria kontra bos, ma N pui elis na bo mon, N kaba ku elis bo dianti. Bo toma konta di se tera.

⁹ Oca Balak, fiju di Zipor, rei di moabitas, lanta pa geria kontra Israel, i manda coma Balaon, fiju di Beor, pa i bin maldisua bos,

¹⁰ ma ami N ka seta obi Balaon. Asin i fika i na bensua bos. De manera N libra bos na mon di Balak.

¹¹ “‘Dipus, bo kamba Jordon, bo ciga na Jerikó. Moraduris di Jerikó e geria kontra bos, suma tambi amoreus, perizeus, kananeus, eteus, jirgaseus, eveus ku jebuseus, ma N da elis na bo mon.

¹² N manda bagera bo dianti, ku serka elis, suma tambi ki dus rei di amoreus. I ka bo spada nin i ka bo mansasa ku tira elis.

¹³ N da bos tera ku bo ka tarbaja, ku prasas ku bo mora nelis ma bo ka kumpu; bo na kume uvas ku azeitonas ku bo ka paranta se pes.’

¹⁴ “Asin, bo rispita SIÑOR, bo sirbil ku korson limpu, ku bardadi. Bo bota fora ki deusis ku bo papes sirbiba kontra e staba na utru ladu di riu Eufrates tambi na Ejitu; bo sirbi SIÑOR.

¹⁵ Si bo ka konkorda pa sirbi SIÑOR, bo kuji aos kin ku bo dibi di sirbi, si i ki deusis ku bo papes sirbiba na utru ladu di riu, o si i deusis di amoreus ku bo mora propi na se tera. Ma ami ku ña familia, no na sirbi SIÑOR.”

¹⁶ Pobu ruspundi e fala: “Lunju di nos pa no bandona SIÑOR pa no bai sirbi utru deusis!

¹⁷ SIÑOR i no Deus, i el ku fasinu, juntu ku no papes, sai na katiberasku na tera di Ejitu. El ku fasinu ki garandi sinalis dianti di no uju, i guardanu na tudu kamiñu ku no yanda nel, na metadi di tudu pobu ku no pasa.

¹⁸ SIÑOR serka dianti di nos tudu e jinti, tudu ku amoreus ku moraba ne tera; anos tambi no na sirbi SIÑOR pabia i no Deus.”

¹⁹ Josué fala pobu: “Bo ka na pudi sirbi SIÑOR, pabia i sedu Deus puru ku ten siumi di bos; i ka na purda bo disobdiensia nin bo pekadu.

²⁰ Nin manera ku SIÑOR sedu bon pa bos purmeru, si bo largal, bo sirbi deusis strañu, i na rabida, i fasi bos mal, i kaba ku bos.”

²¹ Pobu fala Josué: “Nau! Ma no na sirbi SIÑOR.”

²² Josué fala pobu: “Bo sedu tustumuñas kontra bo kabesa propi kuma bo kuji SIÑOR pa bo sirbil.” E ruspundi: “No sedu tustumuñas.”

²³ Josué fala elis: “Bo bota fora deusis strañu ku sta na bo metadi, bo ntrega bo korson pa SIÑOR Deus di Israel.”

²⁴ Pobu fala Josué: “No na sirbi SIÑOR no Deus; no na obdisi palabra ki fala.”

²⁵ Na ki dia Josué fasi kontratu ku pobu. La na Siken i da elis regras ku leis.

²⁶ I skirbi ki palabras na libru di lei di Deus; i toma un pedra garandi, i firmantal bas di karvaju ku staba lungu di kau sagradu di SIÑOR.

²⁷ Josué fala tudu pobu: “Ali e pedra i na sedu tustumuñu pa nos, pabia i obi tudu palabras ku SIÑOR kontanu. Tambi i na sedu tustumuñu kontra bos pa bo ka konta mintida pa bo Deus.”

²⁸ Asin Josué dispidi pobu; kada kin bai pa si propi kasa.

Mortu di Josué ku di Eleazar

²⁹ Dipus de kusas, Josué, fiju di Nun, servu di SIÑOR, i muri ku sentu i des anu.

³⁰ E nteral na tera di si yardansa, na Timnat-Sera, ku sta na monti di Efrain, na norti di monti di Gaás.

³¹ Israel sirbi SIÑOR duranti tudu vida di Josué, ku tudu vida di garandis ku kontinua vivi dipus di Josué, ku sibi tudu ke ku SIÑOR fasiba pa Israel.

³² Tambi, na Siken, e ntera os di José, ku fijus di Israel tisi desdi Ejitu. E nteral na ki terenu ku Jakó kumpraba na mon di fijus di Amor, pape di Siken, pa sen mueda di prata. Ki terenu yardadu pa jorson di José.

³³ Eleazar, fiju di Aron, muri tambi; e nteral na monti ku si fiju Fineias dadu na montaña di Efrain.