Josué 23 - BIBLIA - traduson antigu in Krioulo

Konsiju di Josué

¹ Manga di tempu pasa disna ku SIÑOR da Israel diskansu di tudu se inimigus na roda; Josué beju ba ja dimas.

² I coma tudu Israel, se garandis, se ŝefis, se juisis ku se funsionarius, i fala elis: “Ami N beju ja dimas.

³ Abos bo oja tudu ku SIÑOR bo Deus fasi tudu e nasons pabia di bos, pabia i SIÑOR bo Deus ku geriaba pa bos.

⁴ Bo oja kuma ku N rapati bos, pa sorti, tera de nasons ku sobra, pa i sedu yardansa di bo jorsons, tudu ku tera di nasons ku N kaba ku el, desdi Jordon te Mar Mediteraneu na kaida di sol.

⁵ SIÑOR bo Deus na pinca elis, i tira fora bo dianti. Abos bo na toma konta di se tera, suma ku SIÑOR bo Deus fala bos.

⁶ “Bo sedu forti, bo pui sintidu pa fasi tudu ku sta skritu na libru di lei di Moisés, pa bo ka disvia del, nin pa direita nin pa skerda.

⁷ Ka bo junta ku e nasons ku sobra inda na bo metadi; ka bo coma nomis di se deusis, nin ka bo jurmenta nelis; ka bo sirbi elis, nin mpina se dianti,

⁸ ma bo pega SIÑOR bo Deus, suma ku bo fasi te aos.

⁹ “SIÑOR tira bo dianti nasons garandi i forti; te aos ningin ka ciga di firma bo dianti.

¹⁰ Un omi son na bo metadi na serka mil, pabia i SIÑOR bo Deus ku ta geria pa bos, suma ki fala bos.

¹¹ Asin, bo pui sintidu pa ama SIÑOR bo Deus.

¹² “Si bo da SIÑOR kosta, bo junta ku restu de nasons ku fika na bo metadi, si bo kasa ku elis, bo fasi sos ku elis,

¹³ bo sibi sertu kuma SIÑOR bo Deus ka na kontinua tira pa fora e nasons bo dianti. Asin e na bin sedu armadilia ku ridia pa paña bos, ŝikoti pa bo kostas ku fidida pa bo uju, tok bo kaba tudu ne bon tera ku SIÑOR bo Deus da bos.

¹⁴ “N sta ja na kamiñu ku tudu jinti un dia ten ku bai. Bo sibi diritu dentru di bo korson kuma, nin un palabra son ka maina di tudu ki bon palabras ku SIÑOR bo Deus fala aserka di bos. Tudu purmesa kumpridu; nin un son ka maina.

¹⁵ Manera ki kumpri tudu ki bon kusas ki fala bos, asin tambi ku SIÑOR bo Deus na kumpri si ameasas, tok i kaba ku bos ne bon tera ki da bos.

¹⁶ Si bo kebra ki kontratu ku SIÑOR bo Deus manda bos, bo bin bai pa sirbi utru deusis, bo mpina se dianti, nta raiba di SIÑOR na yardi kontra bos; logu bo na pirdi ne bon tera ki da bos.”