Josué 21 - BIBLIA - traduson antigu in Krioulo

Prasas di jorson di Levi

¹ Kabesas di familia di levitas ciga na saserdoti Eleazar, Josué, fiju di Nun, ku ŝefis di familias di jorsons di Israel,

² na Siló, na tera di Kanaan, e fala elis: “SIÑOR da ordi na boka di Moisés kuma no ten ku dadu prasas pa no mora nel, ku kampadas na roda pa no limarias ba ta kume.”

³ Asin fijus di Israel obdisi palabra di SIÑOR, e da levitas parti di se yardansa, ku sedu prasas ku se kaus di bakia na roda.

⁴ Sorti kai riba di koatitas konformi se familias. Levitas di jorson di saserdoti Aron risibi, pa sorti, trezi prasa di jorsons di Judá, Simeon ku Benjamin.

⁵ Utru fijus di Koat risibi, pa sorti, des prasa di familias di jorsons di Efrain ku Dan, ku metadi di jorson di Manasés.

⁶ Fijus di Jerson risibi, pa sorti, trezi prasa di familias di jorsons di Isakar, Aser ku Naftali, ku metadi di jorson di Manasés na Basan.

⁷ Fijus di Merari, konformi se familias, e risibi dozi prasa di jorsons di Ruben, Gad ku Zebulon.

⁸ Asin, fijus di Israel da levitas, pa sorti, ki prasas ku se kampadas na roda, suma ku SIÑOR da ordi na boka di Moisés.

⁹ Esis i nomi di prasas di jorsons di Judá ku Simeon

¹⁰ ku dadu pa fijus di Aron, ku sedu di familias di Koat, di jorson di Levi. Purmeru sorti bai pa elis.

¹¹ E da elis prasa di Arba (ku sedu Ebron ), ku si kampadas pa limarias, na monti di Judá. (Arba sedu pape antigu di Anak.)

¹² Ma lugaris di labur ku tabankas na roda, e daduba ja pa Kaleb, fiju di Jefoné, pa si yardansa.

¹³ Asin, pa fijus di saserdoti Aron e da Ebron (ku sedu prasa di rogu pa algin ku mata si kumpañer), ku kampadas pa limarias na roda; e da tambi Libna ku si kampadas,

¹⁴ Jatir, Estemoa,

¹⁵ Olon, Debir,

¹⁶ Ain, Jutá ku Bet-Semes — novi prasa ku se kampadas na roda, ku ki dus jorson da.

¹⁷ Di jorson di Benjamin e da Jibeon, Jeba,

¹⁸ Anatot ku Almon — kuatru prasa ku se kampadas na roda pa limarias.

¹⁹ Tudu prasas di saserdotis, fijus di Aron, e sedu trezi, ku se kampadas na roda.

²⁰ Familias di Koat, di jorson di Levi ku sobra, e risibi, pa sorti, prasas di jorson di Efrain.

²¹ Na monti Efrain e dadu Siken, prasa di rogu pa algin ku mata si kumpañer, Jezer,

²² Kibzain ku Bet-Oron — kuatru prasa, tudu ku se kampadas na roda.

²³ Di jorson di Dan e risibi Eltek, Jibeton,

²⁴ Aijalon ku Gat-Rimon — kuatru prasa ku se kampadas na roda.

²⁵ Di metadi di jorson di Manasés e dadu Taanak ku Gat-Rimon — dus prasa ku se kampadas na roda.

²⁶ Tudu ki des prasa ku se kampadas na roda e dadu pa kilis ku sobra na familias di Koat.

²⁷ Di metadi di jorson di Manasés, fijus di Jerson, di jorson di Levi, e dadu Golan, prasa di rogu, na Basan, ku Beesterá — dus prasa ku se kampadas na roda.

²⁸ Di jorson di Isakar e risibi Kision, Daberat,

²⁹ Jarmut ku En-Ganin — kuatru prasa ku se kampadas na roda.

³⁰ Di jorson di Aser e dadu Misal, Abdon,

³¹ Elkat ku Reob — kuatru prasa ku se kampadas na roda.

³² Di jorson di Naftali e dadu Kedes, prasa di rogu na Galileia, Amot-Dor ku Kartan — tris prasa ku se kampadas na roda.

³³ Tudu prasas di jersonitas, konformi se familias, e seduba trezi, ku se kampadas na roda.

³⁴ Levitas ku sobra na familia di Merari e risibi di jorson di Zebulon: Joknean, Kartá,

³⁵ Dimna ku Naalal — kuatru prasa ku se kampadas na roda.

³⁶ Di jorson di Ruben e risibi Bezer, Jaaz,

³⁷ Kedemot ku Mefaat — kuatru prasa ku se kampadas pa limarias.

³⁸ Di jorson di Gad e risibi Ramot na Jilead, prasa di rogu pa algin ku mata si kumpañer, Maanain,

³⁹ Esbon ku Jazer — kuatru prasa ku se kampadas pa limarias.

⁴⁰ Asin familias di Merari ku sobraba na levitas e dadu, pa sorti, ki dozi prasa.

⁴¹ Tudu prasas di levitas na metadi di jorsons di fijus di Israel e sedu korenta i oitu, ku se kampadas na roda.

⁴² Kada un de prasas teneba si kampada pa limarias na roda.

⁴³ Asin SIÑOR da Israel tudu tera ki jurmentaba da se papes; e toma konta, e mora nel.

⁴⁴ SIÑOR da elis diskansu na tudu ladu, suma ki jurmentaba se papes di antigu. Di tudu se inimigus, ningin ka firma se dianti; SIÑOR ntrega elis tudu na se mon.

⁴⁵ Nin un di ki bon palabras ku SIÑOR papiaba pa pobu di Israel i ka maina; tudu bin kumpri.