Josué 17 - BIBLIA - traduson antigu in Krioulo

Yardansa di metadi di jorson di Manasés

¹ Es i tera ku sorti da Manasés, ku sedu purmeru fiju di José. Makir, purmeru fiju di Manasés, seduba pape di jileaditas, ku risibiba ja Jilead ku Basan, pabia makiritas e seduba omis di gera.

² Ki tera ku sorti da, i pa utru fijus di Manasés konformi se familias, ku sedu: Abiezer, Elek, Asriel, Siken, Efer ku Semida. Esis i fijus macu di Manasés, fiju di José.

³ Zelofead, fiju di Efer, fiju di Jilead, fiju di Makir, fiju di Manasés, i ka teneba fiju macu, ma son femias. Ali se nomis: Makla, Noa, Ogla, Milka ku Tirza.

⁴ Esis bin ciga dianti di saserdoti Eleazar, Josué, fiju di Nun, ku ŝefis, e fala elis: “SIÑOR da ordi pa Moisés pa i danu yardansa na metadi di no ermons macu.” Asin, suma ku SIÑOR fala, Josué da elis yardansa na metadi di ermons di se pape.

⁵ Manasés risibi des kiñon di tera, fora di tera di Jilead ku Basan ku sta na utru banda di Jordon,

⁶ pabia fijus femia di jorson di Manasés e risibi yardansa na metadi di macus. Utru fijus di Manasés teneba tera di Jilead.

⁷ Frontera di Manasés i kumsa desdi Aser te Mikmetá, ku sta dianti di Siken. Dipus, frontera bai pa sul te jinti ku mora na En-Tapua.

⁸ (Manasés teneba tera di Tapua, ma Tapua propi, na frontera di Manasés, i pertensiba fijus di Efrain.)

⁹ Frontera bai pa sul te na riusiñu di Kaná. La i tenba utru prasas di Efrain na metadi di prasas di Manasés. Frontera di Manasés sta na norti di riusiñu, i kaba na mar.

¹⁰ Na sul, tera seduba di Efrain, na norti di Manasés; mar sedu se frontera pa kaida di sol. Na norti, tera di Manasés toka na Aser; na saida di sol i toka na Isakar.

¹¹ Na tera di Isakar ku di Aser, Manasés teneba Bet-Sean ku Ibleon, ku se tabankas na roda; e teneba tambi jinti ku mora na Dor, na Endor, Taanak, ku Mejidu, tudu ku se tabankas na roda.

¹² Fijus di Manasés ka pudi tira fora jinti ku moraba na ki prasas, pabia kananeus ntema pa fika na ki mesmu tera.

¹³ Oca fijus di Israel torna mas forti, e pui kananeus fasi tarbaju forsadu, ma e ka tira elis fora.

¹⁴ Fijus di José papia ku Josué, e puntal: “Pabia di ke ku bu danu son un parti pa no yardansa? Anos no ciu suma ku SIÑOR bensuanu te li.”

¹⁵ Josué ruspundi elis: “Suma bo ciu, montañas di Efrain e sedu un kau pertadu pa bos, bo bai matu, bo pabi kau pa bos na tera di perizeus ku refains.”

¹⁶ Fijus di José falal: “Montañas ka na ciganu. Tambi tudu kananeus ku mora na kau rasu e tene karus di feru, suma jinti di Bet-Sean ku se tabankas, ku kilis ku sta na kobon di Jizreel.”

¹⁷ Josué fala jorson di José ku sedu Efrain ku Manasés: “Abos bo ciu, bo ten garandi forsa. Bo ka na tene son un parti,

¹⁸ ma montaña na sedu di bos. I tene manga di arvuri, ma bo na kortal, pa i sedu di bos desdi un ladu te na utru. Nin ke sedu forti, e tene karus di feru, ma bo na tira kananeus fora.”