Josué 16 - BIBLIA - traduson antigu in Krioulo

Yardansa di Efrain

¹ Es i tera ku sorti da fijus di José: Frontera kumsa desdi Jordon lungu di Jerikó, na ladu di fonti di Jerikó na saida di sol, i bai pa lala, i subi na tera di montañas di Betel.

² Di Betel i bai pa Luz, i pasa na frontera di arkitas te na Atarot;

³ i ria pa banda di kaida di sol te na frontera di Jaflet, tambi te na frontera di Bet-Oron di bas; di la i bai te Jezer, i bai kaba na mar.

⁴ Asin Manasés ku Efrain, jorsons di José, e risibi se yardansa.

⁵ Es i tera di fijus di Efrain konformi se familias: frontera di se yardansa pa saida di sol i sedu Atarot-Adar te Bet-Oron di riba.

⁶ Di Mikmetá na norti i bai pa saida di sol te Taanat-Siló, i pasa pa Janoa.

⁷ Dipus i ria di Janoa pa Atarot ku Naarat, i toka na Jerikó, i sai na riu Jordon.

⁸ Di Tapua, frontera bai pa ladu di kaida di sol te na riusiñu di Kaná, i bai sai na mar. Es i yardansa di jorson di fijus di Efrain, konformi se familias,

⁹ tudu ku utru prasas ku separaduba ja pa elis na metadi di yardansa di fijus di Manasés, tudu ku se tabankas.

¹⁰ E ka tira fora kananeus ku moraba na Jezer; te aos kananeus mora na metadi di efraimitas, ma e ten ku fasi tarbaju forsadu suma katibus.