Josué 14 - BIBLIA - traduson antigu in Krioulo

Josué da Kaleb Ebron suma yardansa

¹ Es i kil ku fijus di Israel risibi suma yardansa na tera di Kanaan, kil ku Eleazar, saserdoti, ku Josué, fiju di Nun, ku kabesas di familias di jorson di Israel, rapati pa elis.

² Suma ku SIÑOR daba ordi pa Moisés, yardansa rapatidu pa sorti pa ki novi jorson ku metadi,

³ pabia Moisés daba ja yardansa pa ki dus jorson ku metadi na utru banda di Jordon, ma i ka da levitas nin un yardansa na se metadi.

⁴ Fijus di José e seduba ja dus jorson — Manasés ku Efrain. Levitas ka dadu con pa e yarda, si i ka sedu prasas pa mora nel, ku kaus pa bakia se limarias.

⁵ Asin fijus di Israel rapati tera suma ku SIÑOR daba ordi pa Moisés.

⁶ Un dia, omis di Judá ciga pa Josué na Jilgal. Kaleb, fiju di Jefoné, kenezeu, i falal: “Bu sibi palabra ku SIÑOR fala Moisés, omi di Deus, na Kades-Barneia, aserka di mi ku bo.

⁷ N teneba idadi di korenta anu oca Moisés, servu di SIÑOR, mandan di Kades-Barneia pa N jimpini tera. N tisil rasposta suma ku N sintiba na ña korson.

⁸ Ña ermons ku bai ku mi e fasi korson di pobu ribi, ma ami, N firma na sigi SIÑOR ña Deus.

⁹ Ki dia Moisés jurmenta, i falan: ‘Tera ku bu pe masa i na sedu di bo ku bu fijus suma yardansa pa sempri, pabia bu firma na sigi SIÑOR ña Deus.’

¹⁰ Ali SIÑOR guardan ku vida, suma ki fala; korenta i sinku anu pasa ja disna ku SIÑOR fala e palabra pa Moisés, oca ku Israel na yandaba na lala inda. Alin li, N tene idadi di oitenta i sinku anu.

¹¹ Inda aos N sta forti suma na dia ku Moisés mandan; ki forsa ku N tenba pa gera, pa yentra ku sai, i el ku N ten te gosi.

¹² N pidiu pa bu dan ki montaña ku SIÑOR fala del na ki dia. Abo propi bu obi na ki tempu kuma anakins staba la, moradu na se prasas garandi, fortifikadu, ma si SIÑOR sta ku mi, N na tira elis fora, suma ki fala.”

¹³ Josué bensua Kaleb, fiju di Jefoné, i dal Ebron suma yardansa.

¹⁴ Asin Ebron sedu di Kaleb, fiju di Jefoné, kenezeu, suma yardansa, te aos, pabia i firma na sigi SIÑOR Deus di Israel.

¹⁵ Nomi di Ebron seduba purmeru Kiriat-Arba, pabia di Arba ku sedu un garandi omi na metadi di anakins. Tera diskansa di gera.