Josué 13 - BIBLIA - traduson antigu in Krioulo

Josué rapati tera

¹ Oca Josué teneba ja idadi avansadu, SIÑOR falal: “Bu beju ja dimas; tera ku ka tomadu inda i ciu.

² Tera ku dibi di tomadu inda i es: tudu reẑion di filisteus ku jesuritas,

³ desdi riu Sior, ku sta na frontera di Ejitu, te na Ekron, mas pa norti (e con, i ta faladu ki sedu di kananeus, ma reis di filisteus ta moraba na Gaza, Asdod, Askelon, Gat ku Ekron), ku tera di aveus;

⁴ desdi sul, tudu tera di kananeus, Meara ku sedu di jinti di Sidon, te na Afeka, na frontera di amoreus,

⁵ suma tambi tera di jebalitas, tudu Líbanu pa ladu di saida di sol, desdi Baal-Gad, lungu di monti Ermon te na entrada di Amat.

⁶ “Ami N na tira fora, na fabur di fijus di Israel, tudu jinti ku mora na montañas, desdi Líbanu te na Misrefot-Main, ku sedu tudu jinti di Sidon. Abo bu na juga sorti pa rapati ki tera pa Israel pa i sedu se yardansa, suma ku N mandau disna.

⁷ Bu na rapati e tera gosi pa novi jorson ku metadi di jorson di Manasés, pa i sedu se yardansa.”

Rapatimentu di tera na utru banda di Jordon

⁸ Utru metadi di Manasés, ku rubenitas ku gaditas, e risibiba ja se yardansa na utru banda di Jordon pa saida di sol, ku Moisés, servu di SIÑOR, daba elis.

⁹ Se tera bai di Aroer, ku sta lungu di kobon di Arnon, ku ki prasa ku sta na metadi di kobon, ku tudu kau rasu di Medeba te na Dibon;

¹⁰ tudu tabankas di Sion, rei di amoreus, ku renaba na Esbon, te na tera di fijus di Amon;

¹¹ Jilead, tera di jesuritas ku maakatitas, tudu monti Ermon, ku tudu Basan te na Salka;

¹² ku tudu con di Og na Basan, ku renaba na Astarot ku Edrei (el i seduba un di jigantis ku sobra). Moisés ngañaba ki jinti, i toma se tera,

¹³ ma fijus di Israel ka tira fora jesuritas nin maakatitas; asin e mora na metadi di Israel te aos.

¹⁴ I ka da jorson di Levi yardansa, manera ku Deus falal kuma sakrifisius kemadu pa SIÑOR, Deus di Israel, elis ku na sedu se yardansa.

¹⁵ Moisés da tera pa jorson di Ruben, konformi se familias.

¹⁶ Se tera bai desdi Aroer, ku sta lungu di kobon di Arnon, ku ki prasa na metadi di kobon, tudu ki kau rasu te na Medeba,

¹⁷ Esbon ku tudu si prasas na planaltu, ku sedu Dibon, Bamot-Baal, Bet-Baal-Meon,

¹⁸ Jaza, Kedemot, Mefaat,

¹⁹ Kiriatain, Sibma, Zeret-Saar na monti na metadi di kobon,

²⁰ Bet-Peor, riadas di Pisga, Bet-Jesimot,

²¹ tudu prasas di planaltu, ku tudu con di Sion, rei di amoreus, ku renaba na Esbon, ku Moisés mata, tudu ku ŝefis di Midian, ku sedu Evi, Reken, Zur, Ur ku Reba, ku staba bas di Sion, e moraba na ki con.

²² Tambi ki diviñadur Balaon, fiju di Beor, fijus di Israel matal ku spada, juntu ku utrus ke mata.

²³ Frontera di fijus di Ruben seduba riu Jordon. Ki reẑion, ku si prasas ku tabankas, i seduba yardansa di fijus di Ruben, konformi se familias.

²⁴ Es i kil ku Moisés daba jorson di Gad, konformi se familias:

²⁵ tera di Jazer, ku tudu prasas di Jilead, ku metadi di tera di fijus di Amon, te na Aroer ku sta dianti di Rabá;

²⁶ desdi Esbon te na Ramá-Mizpá ku Betonin, tambi desdi Maanain te na frontera di Debir,

²⁷ na kobon, Bet-Aran, Bet-Ninrá, Sukot ku Zafon, ku sobra di restu di con di Sion, rei di Esbon, ku sedu tera na utru banda di Jordon pa saida di sol, te na mar di Kineret.

²⁸ Ki prasas ku tabankas e sedu yardansa di fijus di Gad, konformi se familias.

²⁹ Es i kil ku Moisés daba metadi di jorson di Manasés pa se yardansa, konformi se familias:

³⁰ Se tera, ku kumsa desdi Maanain, i seduba tudu Basan, ku tudu con di Og, rei di Basan, ku tudu sesenta tabanka di Jair ku sta na Basan,

³¹ metadi di Jilead, Astarot ku Edrei, prasas di con di Og na Basan. Es tudu i dadu pa metadi di fijus di Makir, fiju di Manasés, konformi se familias.

³² Es i yardansa ku Moisés rapati ocal na kau rasu di Moab, na ladu di Jerikó pa saida di sol, na utru banda di Jordon.

³³ Moisés ka da yardansa pa jorson di Levi; SIÑOR Deus di Israel i se yardansa, suma ki fala elis ba.