Josué 11 - BIBLIA - traduson antigu in Krioulo

Reis di norti ngañadu

¹ Oca Jabin, rei di Azor, obi e noba, i manda rekadu pa Jobab, rei di Madon, pa reis di Sinron ku di Aksaf,

² pa reis ku staba na norti na montañas, na bulaña di sul di Kineret, na kau rasu, na Nafot-Dor na banda di mar,

³ pa kananeus na ladu di saida di sol, ku kaida, pa amoreus, eteus, perizeus, jebuseus na montaña, tambi pa eveus lungu di montaña di Ermon na tera di Mizpá.

⁴ Asin e sai ku tudu se tropas, manga del, ciu suma reia na praia di mar, ku kabalus ku karus ciu tok e pasa.

⁵ Ki reis tudu e junta se forsa, e bai pui kampamentu lungu di yagu di Meron, pa geria kontra Israel.

⁶ SIÑOR fala Josué: “Ka bu ten medu se dianti, pabia amaña ne ora N na ntrega elis pa Israel, tudu mortu. Bu na pui se kabalus manku, bu na kema se karus ku fugu.”

⁷ Josué ku tudu si tropas bai kinti-kinti, e ciga di repenti riba delis lungu di yagu di Meron.

⁸ SIÑOR da elis na mon di israelitas, ku mata elis, e serka elis te na Garandi Sidon, tambi te na Misrefot-Main, te na kobon di Mizpá pa ladu di saida di sol. E mata elis tok e ka disa nin un son.

⁹ Josué fasi suma ku SIÑOR falal: i pui se kabalus manku, i kema se karus na fugu.

¹⁰ Na ki tempu Josué rabida, i toma tambi Azor, i mata si rei ku spada, pabia Azor i seduba kabesa di tudu ki reis.

¹¹ E toma spada, e mata tudu jinti ku staba la; nin e ka disa nada ku teneba folgu; Josué kema Azor ku fugu.

¹² Josué toma tudu prasas di ki reis, i mata tudu se reis ku spada. I kaba ku elis tudu, suma ku Moisés, servu di SIÑOR, mandaba.

¹³ Israelitas ka kema prasas ku staba riba di se montis pikininu; son prasa di Azor ku Josué kema.

¹⁴ Fijus di Israel toma tudu rikesas ku limarias di ki prasas, ma e mata tudu jinti ku spada, tok e kaba ku elis. E ka disa nada ku teneba folgu ku vida.

¹⁵ Suma ku SIÑOR da ordi pa si servu Moisés, asin ku Moisés da ki ordi pa Josué; Josué kumpril. I ka disa nada ku ka fasidu di tudu kil ku SIÑOR manda Moisés.

¹⁶ Asin Josué toma tudu ki tera, montañas, tudu ladu di sul, tudu tera di Gosen, kau rasu, bulañas, montañas di Israel ku se kau rasu,

¹⁷ desdi monti Alak ku ta subi pa Seir, te Baal-Gad, na kobon di Líbanu, lungu di monti di Ermon; tambi i toma se reis tudu, i mata elis.

¹⁸ Josué fasi gera manga di tempu kontra tudu ki reis.

¹⁹ Fora di eveus ku mora na Jibeon, i ka tenba nin un prasa ku fasi pas ku fijus di Israel; tudu tomadu na gera,

²⁰ pabia SIÑOR pui se korson duru, pa e bai geria kontra Israel, pa e pudi kabadu ku elis tudu, sin sinti pena delis, pa Israel mata tudu suma ku SIÑOR mandaba Moisés.

²¹ Na ki tempu Josué kaba ku anakins di montañas di Ebron, di Debir, Anab, tudu montañas di Judá ku tudu montañas di Israel. Josué kaba ku elis tudu ku se prasas.

²² Nin un anakin ka sobra na tera di fijus di Israel; e sobra son na Gaza, Gat ku Asdod.

²³ Asin Josué toma tudu ki tera konformi tudu ku SIÑOR falaba Moisés; Josué dal suma yardansa pa fijus di Israel, i rapatil konformi se jorsons. Asin tera diskansa gera.