Josué 10 - BIBLIA - traduson antigu in Krioulo

Sinku rei bai kontra Jibeon

¹ Adoni-Zedek, rei di Jerusalen, i obi kuma Josué toma Ai, i danal tudu, i fasi Ai ku si rei suma ki fasiba Jerikó ku si rei. I obi tambi kuma jinti di Jibeon fasi pas ku israelitas, kuma e mora pertu delis.

² I fika spantadu, pabia Jibeon seduba prasa garandi, suma un di prasas ku teneba rei; inda i mas garandi di ki Ai; tudu si omis e bon ba na gera.

³ Asin Adoni-Zedek, rei di Jerusalen, i manda rekadu pa Oan, rei di Ebron, Piran, rei di Jarmut, Jafia, rei di Lakís, ku Debir, rei di Eglon, i fala elis:

⁴ “Bo bin judan pa no geria ku Jibeon, pabia i fasi pas ku Josué ku fijus di Israel.”

⁵ Asin ki sinku rei di amoreus junta, ku sedu reis di Jerusalen, Ebron, Jarmut, Lakís ku Eglon, ku tudu se tropas, e taja Jibeon e atakal.

Josué bai juda Jibeon

⁶ Asin, omis di Jibeon manda rekadu pa Josué na kampamentu di Jilgal, e falal: “Ka bu bandona bu servus; bin kinti-kinti bu judanu, bu libranu, pabia tudu reis di amoreus ku ta mora na montaña e junta kontra nos.”

⁷ Asin Josué sai di Jilgal, ku tudu si tropas, ku kilis ku mas ten jitu ku koraẑen na gera.

⁸ SIÑOR fala Josué: “Ka bu ten medu delis, pabia N dau ja elis na bu mon; nin un delis ka na pudi firma bu dianti.”

⁹ Josué sai di Jilgal, i yanda tudu ki di noti, i bin riba delis di repenti.

¹⁰ SIÑOR pui elis na kunfuson dianti di Israel. Israel ngaña garandi vitoria riba delis na Jibeon, e serka elis na kamiñu ku ta bai pa Bet-Oron, e mata elis te Azeka ku Makeda.

¹¹ Oca ke na kuri di Israel na kamiñu ku ta ria di Bet-Oron pa Azeka, SIÑOR manda cuba di pedra garandi riba delis. Kilis ku muri di ki cuba e mas ciu di ki kilis ku fijus di Israel mata ku spada.

Sol ku lua fika paradu

¹² Na ki dia ku SIÑOR ntrega amoreus na mon di fijus di Israel, Josué fala SIÑOR dianti di israelitas: “Sol, para na Jibeon; abo lua, para na kobon di Aijalon.”

¹³ Asin sol para na un kau, lua tambi i para, tok pobu vinga di se inimigus, suma ki sta skritu na libru di Jasar. Asin sol fika paradu na metadi di seu, i tarda pa kai, tok kuas un dia ntidu pasa.

¹⁴ Nunka i ka tenba dia suma kila, nin antis nin dipus del. SIÑOR obi vos di un omi, pabia SIÑOR na geriaba pa Israel.

¹⁵ Dipus, Josué ku tudu Israel riba pa kampamentu di Jilgal.

Sinku rei di amoreus matadu

¹⁶ Ki sinku rei kuri e bai sukundi na un koba na Makeda.

¹⁷ Algin bai konta Josué i falal: “I ojadu ki sinku rei sukundidu na un koba na Makeda.”

¹⁸ Josué fala elis: “Bo rola pedras garandi, bo pui na boka di koba, tambi bo pui omis pa e guarda elis,

¹⁹ ma ka bo para. Bo serka bo inimigus, bo ataka kilis ku fika tras. Ka bo disa elis yentra na se prasas, pabia SIÑOR bo Deus i ntrega elis ja na bo mon.”

²⁰ Josué ku fijus di Israel kaba mata elis tudu. Son pukus ku sobra, e kapli pa prasas fortifikadu.

²¹ Tudu tropas riba ku pas pa Josué, na kampamentu di Makeda. I ka tenba algin ku osa fala un palabra kontra fijus di Israel.

²² Josué fala: “Bo yabri boka di ki koba, bo tira ki sinku rei, bo tisin elis.”

²³ Asin e tira ki sinku rei na koba, ku sedu reis di Jerusalen, Ebron, Jarmut, Lakís ku Eglon.

²⁴ Oca ke leba elis pa Josué, i coma tudu omis di Israel, i fala kumandantis di tropas ku baiba ku el: “Bo bin masa e reis na garganti.” Elis e bai, e masa elis na garganti.

²⁵ Josué fala elis: “Ka bo ten medu, nin ka bo panta. Bo sedu forti, bo ten koraẑen, pabia asin ku SIÑOR na fasi tudu bo inimigus ku bo na geria ku elis.”

²⁶ Dipus Josué mata elis, i pindra elis na sinku po; e fika nforkadu na ki pos te di tardi.

²⁷ Oca sol na kai, Josué da ordi pa e tira elis na ki pos. E bota elis na koba nunde ke sukundiba nel, e pui pedras garandi na boka di koba, ku sta la inda te aos.

Josué ngaña mas seti rei

²⁸ Na ki mesmu dia Josué toma Makeda, i mata rei ku tudu jinti di prasa ku spada. I kaba ku elis tudu; nin i ka disa restu. I fasi rei di Makeda suma ki fasiba rei di Jerikó.

²⁹ Dipus Josué ku tudu Israel pasa di Makeda pa Libna, e geria kontra el.

³⁰ Tambi SIÑOR da Libna, tudu ku si rei, na mon di Israel, ku mata ku spada tudu jinti ku staba la, sin disa nin un son. E fasi si rei suma ke fasi rei di Jerikó.

³¹ Dipus, Josué ku tudu Israel pasa di Libna pa Lakís, e tajal, e geria kontra el.

³² SIÑOR da Lakís na mon di Israel, ku tomal na sugundu dia. E toma spada, e mata tudu jinti ku staba na prasa, suma ke fasi Libna.

³³ Oran, rei di Jezer, i bai juda Lakís, ma Josué matal ku si pobu, tok nin un son ka fika ku vida.

³⁴ Josué ku tudu Israel pasa di Lakís pa Eglon, e tajal, e geria kontra el,

³⁵ e tomal na ki mesmu dia, e mata ku spada tudu jinti ku staba na prasa, e kaba ku elis tudu na ki dia, suma ke fasi Lakís.

³⁶ Dipus, Josué ku tudu Israel bai di Eglon pa Ebron, e geria kontra el,

³⁷ e tomal, tudu ku si tabankas, e mata ku spada si rei ku tudu jinti ku staba la. E ka disa nin un son ku vida, e dana prasa tudu, e kaba ku tudu jinti, suma ke fasiba Eglon.

³⁸ Josué ku tudu Israel rabida, e geria kontra Debir,

³⁹ e tomal, ku si rei, ku tudu si tabankas, e mata ku spada tudu jinti ku staba la. E kaba ku elis tudu; e ka disa nin un son; e fasi Debir ku si rei suma ke fasi Ebron, suma ke fasi Libna ku se rei.

⁴⁰ Asin Josué toma tudu ki tera, montañas, ladu di sul, bulañas, riadas di yagu, ku tudu se reis. I ka disa nada ku vida; tudu ku teneba folgu, i kaba ku el, suma ku SIÑOR Deus di Israel manda.

⁴¹ Josué mata elis desdi Kades-Barneia te na Gaza, suma tambi tudu tera di Gosen te na Jibeon.

⁴² Josué toma tudu ki reis ku se teras na un kampaña son, pabia SIÑOR Deus di Israel na geriaba pa Israel.

⁴³ Dipus, Josué riba, ku tudu Israel, pa kampamentu di Jilgal.