Jonas 2 - BIBLIA - traduson antigu in Krioulo

Orason di Jonas

¹ Na bariga di pis Jonas ora SIÑOR si Deus,

² i falal: “N coma SIÑOR na ña kasabi; el i ruspundin. La fundu na koba di mortu N comau pa sakur; bu obi ña fála.

³ Na metadi di mar bu botan na un kau fundu; korenti di yagu rodian. Tudu bu ondas ku maron e pasa riba di mi.

⁴ N fala kuma N tiradu lunju di bu rostu, ma N na vira rostu pa bu templu sagradu.

⁵ Yagu rodian te na garganti; mar kubrin. Planta di mar maran na kabesa.

⁶ N disi te bas di montañas; ferus di tera prindin un bias pa sempri, ma abo, SIÑOR ña Deus, bu libra ña vida di koba fundu.

⁷ Oca N sinti kuma N na pirdi ña vida, N lembra di SIÑOR; ña orason ciga nunde bo na bu templu sagradu.

⁸ Kilis ku pui sintidu na idulus ku ka bali e ta pirdi ki fabur ke pudiba ten,

⁹ ma N na pursentau sakrifisiu ku kantiga di gardisimentu; N na kumpri purmesa ku N fasiu. Salbason ta bin di SIÑOR.”

¹⁰ SIÑOR da ordi pa pis; kila vomita Jonas na ntera.