Joel 2 - BIBLIA - traduson antigu in Krioulo

¹ Bo toka korneta na Sion, bo da sinal di avisu na ña monti sagradu. Tudu moraduris di tera pa e tirmi, pabia dia di SIÑOR na bin; i sta ja pertu.

² I na sedu dia di sukuru ku tristesa, dia di nuvens, pretu nok. Suma ku lus di sol ta spaja riba di monti di mandrugada, tropas garandi, forti, e na bin, suma ku nunka i ka tenba disna di tempu antigu, nin i ka na bin ten na anus ku na bin.

³ Dianti ku tras sedu suma fugu ku na yardi ku forsa, i kaba ku tudu. Tera se dianti i suma jardin di Eden, ma se tras i un lala sin paja; nada ka na kapli delis.

⁴ E ta parsi kabalu, e ta kuri suma tropas di kabalu.

⁵ Ku baruju suma di karu e na salta riba di montañas, e na somna suma brasa di fugu ku na kema matu seku, suma tropas forti ku sta na liña di gera.

⁶ Ora ku nasons oja elis e na bin, e na tirmi; tudu rostu ta bida brankasenti.

⁷ E na kuri pa bin suma tropas forti; e na kamba mura suma omis di gera. Kada kin na marŝa na si lugar; nin e ka ta disvia di se filera.

⁸ E ka ta maja ŋutru; kada kin pega na si kamiñu; E bai ku forsa kontra difesa, nin e ka para.

⁹ E ciga na prasa kinti-kinti, e kuri na muras, e subi na kasas, e kamba na janelas suma ladron.

¹⁰ Se dianti tera na bulbuli, seu na tirmi, sol ku lua bida sukuru, strelas para numia.

¹¹ SIÑOR yalsa fála dianti di si tropas, ku ciu dimas; kilis ku na obdisi si ordis e forti. Dia di SIÑOR i garandi, i meduñu; kin ku pudi nguental?

Miserikordia

¹² SIÑOR fala: “Mesmu ne ora, bo riba pa mi ku tudu bo korson; bo junjuŋa, bo cora, bo miskiña.

¹³ Te pa bo rumpi bo ropa, minjor bo rumpi bo korson.” Bo riba pa SIÑOR bo Deus, pabia el i ta sinti pena, i ta mostra amor; i ta tarda pa paña raiba, i ten garandi bondadi; i ta muda di mal ki pensa fasi.

¹⁴ Talves i ta riba, i muda si ideia, i bensua bos ku frutu di kebur, pa bo pudi pursenta oferta di kumida ku bibida pa SIÑOR bo Deus.

¹⁵ Bo toka korneta na Sion, bo da ordi pa un dia di junjun, bo anunsia juntamentu pa buska Deus.

¹⁶ Bo junta pobu, bo purpara elis pa runion sagradu, bo junta garandis, bo junta mininus, ku kilis ku na mama; noivu ku noiva pa e disa se kuartu, e bin.

¹⁷ Saserdotis, ku ta sirbi SIÑOR, pa e cora na metadi di altar ku entrada di templu, pa e fala: “SIÑOR, salba bu pobu. Ka bu ntrega bu yardansa pa utru nasons koba elis, e fasi elis trosa. Kuma ke na bin punta na metadi di nasons: ‘Nunde se Deus?’ ”

Rasposta di Deus

¹⁸ Dipus, SIÑOR na sinti ciu pa si tera, i na ten pena di si pobu.

¹⁹ SIÑOR na ruspundi, i fala si pobu: “Ali N na manda bos trigu, biñu nobu ku azeiti; bo na farta ku elis. N ka na torna ntrega bos pa nasons koba bos.

²⁰ “Ki tropas di gamfañotis ku na bin di norti, N na serka elis lunju di bos, N pinca elis pa un tera seku, sin paja. Kilis di dianti na pincadu pa Mar Salgadu, kilis di tras pa Mar Mediteraneu. E na bin podri, tok se ceru mau subi, pabia di tudu ke fasi.

²¹ “O tera, ka bu medi; kontenti ku alegria, pabia SIÑOR fasi kusas garandi.

²² Abos, limarias di matu, ka bo medi, pabia kau di bakia na lala na kirsi paja. Arvuris na da se fruta, pe di uva ku figera na padi.

²³ Abos, fijus di Sion, bo kontenti ku alegria na SIÑOR bo Deus, pabia i na da bos cuba na midida sertu; i na manda cuba di kumsada ku kabantada, suma na tempu antigu.

²⁴ Kaus di masa na inci ku trigu; biñu nobu ku azeiti na ciu tok i darma na kau ki ta guardadu nel.

²⁵ “N na paga bos na konta di ki anus ku gamfañotis kume bo kusas, ki gamfañotis di tudu koldadi, ki garandi nuven di tropas ku N manda kontra bos.

²⁶ Bo na kume ciu, bo farta, bo ngaba nomi di SIÑOR bo Deus, ku fasi garandi maravilyas pa bos. Nunka mas ña pobu ka na pasa borgoña.

²⁷ Bo na sibi kuma N sta na metadi di Israel, kuma ami i SIÑOR bo Deus, i ka ten utru. Nunka mas ña pobu ka na pasa borgoña.

Purmesa di darmamentu di Spiritu

²⁸ “Mas tardi, N na darma ña Spiritu riba di tudu jinti. Bo fijus macu ku femia e na anunsia rekadu di Deus; bo omis beju e na ba ta suña; bo jovens na oja visons.

²⁹ Na ki tempu tambi N na darma ña Spiritu riba di ña servus macu ku femia.

³⁰ N na mostra milagris na seu ku tera, di sangi, ku fugu, ku kulunas di fumu.

³¹ Sol na bida sukuru, lua na bida sangi, antis di ciga ki dia garandi i meduñu di SIÑOR.

³² Na ki tempu, tudu algin ku coma nomi di SIÑOR i na sedu salbu. Na monti di Sion, tambi na Jerusalen, i na ten libramentu, suma ku SIÑOR fala, na metadi di kilis ku fika ku vida, kilis ku SIÑOR coma.