Joel 1 - BIBLIA - traduson antigu in Krioulo

Praga di gamfañotis

¹ Es i palabra ku SIÑOR bin fala ku Joel, fiju di Petuel.

² Abos garandis, bo para atenson; bo sukuta, abos tudu ku mora ne tera. Nta es ciga di kontisi na bo tempu, o na tempu di bo papes?

³ Bo konta es pa bo fijus, bo fijus ta konta se fijus, kilas ta konta se fijus.

⁴ Nuvens di gamfañotis bin; kil ku purmeru nuven sobra, sugundu nuven kume; kil ku sugundu nuven sobra, terseru nuven kume; kil ku terseru nuven sobra, kuartu kumel.

⁵ Abos camiduris, bo korda, bo cora; abos ku ta bibi biñu, bo jimi pabia di falta di biñu nobu, pabia uvas pa kumpul kumedu ja tudu.

⁶ Un nason bin ataka ña tera; e tene forsa, e ciu dimas; se dinti i suma dinti di lion; e tene keŝada suma lion beju.

⁷ E bati ña pes di uva, e dana ña figeras, e tira se kaska, e botal na con; se ramus bida branku.

⁸ Miskiña suma bajuda ku mara saku pabia di mortu di namoradu di si bajudesa.

⁹ Oferta di kumida ku bibida kortadu na kasa di SIÑOR; saserdotis, servus di SIÑOR, e sta tudu tristi.

¹⁰ Lugar danadu, tera sta tristi, pabia trigu kabadu ku el; uvas seku, azeiti na falta.

¹¹ Abos labraduris, bo fika tristi, abos ku tene ortas di uva, bo jimi, pabia di trigu ku sevada, pabia kebur di matu pirdi.

¹² Pe di uva seku, figera lati, suma romera tambi, ku palmera ku masiera; tudu arvuris di matu seku; kontentamentu di jinti seku tambi.

Ripindimentu

¹³ Abos saserdotis, bo mara saku, bo miskiña; abos ku ta sirbi dianti di altar, bo jimi. Bo bai bo pasa noti bistidu di saku, abos ku ta sirbi ña Deus; pabia oferta di kumida ku bibida ka na bai pa kasa di bo Deus.

¹⁴ Bo da ordi pa dia di junjun, bo anunsia juntamentu pa buska Deus; bo junta garandis ku tudu moraduris di tera na kasa di SIÑOR bo Deus, bo yalsa fála, bo coma SIÑOR.

¹⁵ Ai, ki dia! Dia di SIÑOR sta ja pertu; i na bin ku garandi danu di Deus ku ten tudu puder.

¹⁶ Jubi, kumida kortadu dianti di no uju! Alegria ku kontentamentu kaba na kasa di no Deus.

¹⁷ Simentera bida podri bas di con; bembas danadu, armazens batidu, pabia di trigu ku seku.

¹⁸ Sinti kuma ku limarias na cora! Bakas tudu na yanda na kunfuson pabia paja ka ten. Koralis di karnel tambi na sufri.

¹⁹ N na comau, SIÑOR, pabia fugu toma konta di kau di bakia, i kema tudu arvuris di matu.

²⁰ Limarias di matu tambi na cora pa bo, pabia rius seku; fugu kema lala; kau di bakia ka ten.