Jo 9 - BIBLIA - traduson antigu in Krioulo

Jo ka pudi ruspundi Deus

¹ Jo ruspundi i fala:

² “Sin, N sibi kuma i bardadi. Kuma ku un omi pudi sedu justu dianti di Deus?

³ Si i misti diskuti ku el, nin un di mil kusa i ka pudi ruspundil!

⁴ Si jiresa i fundu, si puder i garandi. Kin ku ciga di purfia ku el, i kapli kastigu?

⁵ I ta mundanta montis sin e ka sinti; na si raiba i ta rabida elis.

⁶ I ta bulbuli con tok i sai na si lugar; firkijas di tera ta tirmi.

⁷ I ta papia ku sol; kila ka ta sai; i ta tapa klaridadi di strelas.

⁸ I el son ku distindi seu, i yanda riba di maron di mar.

⁹ I el ku kumpu strelas: Ursa, Orion ku Setistrela, ku grupu di strela di sul.

¹⁰ I ta fasi garandi kusas ku ka pudi ntindidu, ku milagris ciu tok i pasa.

¹¹ I ta pasa ña dianti, ma N ka ta ojal. i ta ripiti pasa, ma nin N ka ta sintil.

¹² Si i rabata un kusa, kin ku na pul pa i tornal? Kin ku na puntal: ‘Ke ku bu na fasi?’

¹³ Deus ka na tuji si raiba; jinti ku juda Raab e na mborka bas del.

¹⁴ “Nta ami, kuma ku N pudi ruspundil, o kuji palabras pa diskuti ku el?

¹⁵ Mesmu ku N seduba justu, N ka pudiba ruspundil, si i ka pa pidi Deus, ña Juis, miserikordia.

¹⁶ N pudi comal, i ruspundin, ma mesmu asin, N ka fia si i na para oreja pa ña palabra.

¹⁷ I ta kebrantan ku turbada, i buri ña cagas sin roson.

¹⁸ I ka na dan tempu pa N da folgu, ma i na incin ku kasabi.

¹⁹ Si i forsa ku no na papia del, el ku ten forsa. Si i justisa, kin ku na comal pa tribunal?

²⁰ Mesmu ku N seduba justu, ña boka na kondenan. Si N fala kuma N sedu retu, i ta coman kulpadu.

²¹ “Mesmu ku N sta sin kulpa, N ka na fasi kasu di ña vida, N na njutil.

²² Pa mi, tudu i mesmu; e ku manda N ta fala kuma, Deus ta kaba ku algin mau o bon.

²³ Si un mal bin di repenti, i mata, Deus ta ri kansera di kil ku ka ten kulpa.

²⁴ Con i ntregadu na mon di jinti mau. Deus kubri rostu di juisis; si i ka el ku fasil, kin ku fasil?

²⁵ “Ña dias na pasa kinti-kinti mas di ki algin ku na kuri. E kuri e bai; nin N ka oja sabura.

²⁶ E na pasa suma barku pikininu di vela, o suma agia ku na ria pa rabata.

²⁷ Si N fala: ‘N na diskisi di ña keŝa, N na kumpu ña rostu, N ri,’

²⁸ N ta sinti medu di tudu ña dur, pabia N sibi kuma Deus na tenen suma kulpadu.

²⁹ Suma N ojadu kulpadu, kuma ku N na luta amonton?

³⁰ Mesmu ku N laba ku yagu di nevi, N purifika ña mon ku soda,

³¹ i na botan na koba di lama, tok ña ropa nuju ña kurpu.

³² “Deus i ka omi suma mi, ku N pudi ruspundi, pa no pudi nfrenta ŋutru na kau di justisa.

³³ I ka ten ningin na no metadi ku pudi pui mon riba di nos dus.

³⁴ N na pidil pa i tira si mantampa riba di mi, pa ka i pantandan ku si kastigu meduñu.

³⁵ Asin N ta papia sin medu del. Tementi i ka tiral, N ka pudi papia sin medu.