Jo 8 - BIBLIA - traduson antigu in Krioulo

Bildad fala di justisa di Deus

¹ Bildad di Suá ruspundi i punta:

² “Te kal tempu ku bu na papia kusas suma es? Bu palabras i suma turbada di bentu.

³ Deus ka ta tursi justisa; kil ku ten tudu puder ta fasi sempri kil ki sertu.

⁴ Oca ku bu fijus peka kontra el, i ntrega elis pa kastigu di se pekadu.

⁵ Ma si bu buska Deus, si bu pidi kil ku ten tudu puder pa i mostrau miserikordia,

⁶ si bu sedu puru, retu, Deus ka na tarda, i na disperta pa bu fabur, i na tornau na bu kau sertu.

⁷ Bu kumsada i na parsi pikininu komparadu ku garandesa di bu kabantada.

⁸ “Punta jinti antigu, bu buska sibi ke ku se papes nsinaduba.

⁹ Pabia anos, no padidu aonti, no ka sibi nada. No dias na mundu sedu suma sombra.

¹⁰ Nta no papes ka na nsinau? E ka na papia ku bo? E ka na rapati se ntindimentu ku bo?

¹¹ Nta tarafi pudi kirsi sin lama? I ka pirsisa di yagu?

¹² Si yagu ka ten, i ta muri sedu, antis di pudi kortadu.

¹³ Asin ki kabantada di tudu kilis ku diskisi di Deus; speransa di kil ku ka mporta ku Deus i na kortadu.

¹⁴ Se speransa na tajadu, kusa ke fiansa nel i suma teia di araña.

¹⁵ I ta ngosta na ki teia; i ka ta nguenta; Si i pega nel, i ta pajiga na si mon.

¹⁶ Ki omi i suma planta ben reguadu, na sol; si fojas nobu ta laga na jardin.

¹⁷ Si rais ta rodia na pedras, i ta yentra te na pedras garandi.

¹⁸ Si i rinkadu na si lugar, si lugar ta negal, i fala: ‘Nunka N ka ojau.’

¹⁹ Asin ku vida ku kontentamentu di ki omi mau kaba. Utrus na lanta na si lugar.

²⁰ “Deus ka na nega algin bon, ma i ka na pega mon di kilis ku fasi mal.

²¹ I na pui pa bu ri, pa bu grita ku kontentamentu.

²² Bu inimigus na bisti kunfuson; tendas di jinti mau na pirdi.”