Jo 7 - BIBLIA - traduson antigu in Krioulo

¹ “Nta vida di omi li na mundu i ka suma gera? Si dias ka sedu suma di algin ku na tarbaja ciu pa i pudi kume?

² I suma katibu ku na da folgu fundu ku diseẑu pa sombra, suma tarbajadur ku na pera si pagamentu.

³ Es ki ña sorti: manga di mis amonton; kada noti, tristesa.

⁴ Si N dita pa durmi, N ta punta: ‘Te kal ora ku sol na mansi pa N pudi lanta?’ Noti ta bida kumpridu; N ta rola na kama tok sol mansi.

⁵ Ña kurpu inci bicus, i kubri ku kaska di caga. Ña peli findi; materia na sai.

⁶ Ña dias na bai mas dipresa di ki lansadera di tisidur; e na kaba sin speransa.

⁷ “O Deus, lembra kuma ña vida i suma bentu; N ka na torna oja sabura.

⁸ Kilis ku na ojan gosi, e ka na torna ojan. Bu uju sta riba di mi, ma N ka na sta mas.

⁹ Suma ku nuven ta disparsi i bai, asin ku difuntu ku ta bai pa koba i ka ta riba.

¹⁰ Nunka mas i ka na riba pa kasa; si kau ka na torna kunsil mas.

¹¹ “Asin N ka na kala; N na papia na foronta di ña spiritu, N na keŝa na ña kasabi.

¹² Nta ami i mar, o ami i limaria di mar, pa bu pun guarda?

¹³ N ta pensa kuma ña kama na kalman, i na lebian ña kansera.

¹⁴ Ma bu ta pantan ku suñus, bu ta sombrian ku visons.

¹⁵ N ta mas misti pa algin kalkan na garganti, pa N muri, te pa N ba ta sufri e dur.

¹⁶ N sta fartu di ña vida; N ka misti vivi mas. Disan, pabia ña dias i suma bentu.

¹⁷ “Kin ki omi, pa bu pui sintidu nel, pa bu pui bu korson riba del?

¹⁸ Bu ta jubil parmaña, sempri bu ta probal.

¹⁹ Kal tempu ku bu na disan, nin si i pa N nguli ña kuspiñu?

²⁰ Si N peka, kal mal ku N fasiu, abo ku ta bisia jinti? Ke ku manda bu fasin bu alvu, pa N sedu kargu pa ña kabesa?

²¹ Ke ku manda bu ka na purdan ña pekadu, bu tira ña maldadi? N na bin dita na reia; bu na buskan, ma N ka na sta la.”