Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Jo 6 - BIBLIA - traduson antigu in Krioulo


Jo justifika si keŝas

1 Jo ruspundi i fala:

2 “Si ña dur ku ña kasabi pudu na balansu, i pesadu diritu,

3 na bardadi i na pesa mas di ki reia di mar. E ku manda ña palabra turmentadu.

4 Fleŝas di Deus ku ten tudu puder sta na mi; ña spiritu na bibi se venenu. Forontas meduñu di Deus e juntadu kontra mi.

5 Buru di monti ka ta cora lungu di paja verdi; Turu, si i na kume, i ka ta fasi baruju.

6 Ma kumida ta sabi sin sal me? O klara di ovu tene gustu?

7 N ka ta misti kumida suma kila; i ta fasin pa N duensi.

8 “N misti pa Deus dan ki kusa ku N pidi; el son ku N na pera,

9 pa Deus sta pruntu pa kebrantan, pa larga mon, pa kaba ku mi.

10 Kusa ku ta seduba ña konsolason, ku ta pun pa N jukuta ku kontentamentu na ña dur ku ka ta disan, i kuma N ka nega palabra di Deus santu.

11 “Ke ku N na pera suma N ka ten ja forsa? Ke ku manda ña vida na tarda si ña tempu kaba?

12 Nta ña forsa i suma di pedra? O ña karni i risu suma bronzi?

13 N ka ten forsa pa juda ña kabesa. Tudu ku pudiba judan, N tiradu el.

14 “Amigu dibi di mostra amor pa kil ku foronta, mesmu ki para rispita Deus ku ten tudu puder.

15 Ña ermons e sedu infiel pa mi, suma riusiñu ku ta seku. Utru ora i ta tene manga di yagu,

16 i ta kubri ku jelu; nevi ta sukundi nel, Ora ki diskonjela, i ta bin sedu korenti di yagu.

17 Ma na tempu di kalur i ta seku, i ta kalma, i pirdi na si lugar.

18 Grupus di jinti ku sta na bias e ta disvia di kamiñu pa jubi ki riu, e ta bin pa lala, e pirdi.

19 Jinti di Tema e na buska ki riu; nogosiantis di Sebá na peraba pa ojal.

20 E ciga la, e fika tarpajadu; e fiansaba kuma e na oja yagu, ma e ka bin oja nada.

21 Abos bo sta suma ki rius; bo ojan suma kusa meduñu, bo medi.

22 Nta N ciga di fala bos: ‘Bo dan un pursenti’? O: ‘Bo patin un kusa di bo rikesa’?

23 O N fala bos: ‘Bo libran na mon di kil ku na kalkan’? O: ‘Bo kumpran na mon di ŝefis mau’?

24 “Bo nsinan, ami N na kala; bo fasin ntindi nunde ku N yara.

25 Na bardadi, palabras retu ta de! Ma es tudu ku bo fala, ke ki ta proba?

26 Nta bo na buska manera pa raprindin, suma ku ña palabras sedu suma bentu, palabras di un omi ku pirdi speransa?

27 Bo pudiba sta pruntu te pa juga sorti pa ngaña orfan, o pa splora bo amigu.

28 Bo ten pasensa, bo jubi pa mi, bo na oja kuma N ka na konta mintida bo dianti.

29 Bo torna pensa; ka bo akusan di pekadu. Bo pensa diritu; bo na oja kuma N sedu justu.

30 Nta pekadu sta na ña boka? N ka pudi nota si N na papia palabras di maldadi?

© 1993-2020, Instituto de Tradução e Alfabetização 

Wycliffe Global Alliance
ကြှနျုပျတို့နောကျလိုကျပါ:



ကြော်ငြာတွေ